1 Anui daibe rang zieno Abraham, anui paume pumteihbe zai rehi gade, ngaukelu? 2 Kedanemene magade Abraham de pe batadung ziemne tei masang lucai, pa nganglu kera pekie bam lubui, dede Tinggwang dwade au ma.✝ 3 Kesanglaisiu daipai rangla no? "Dede Abraham Tinggwang de nlumlu, nah pecu masang lie eh luulu."✝ 4 Mata keteibe, pecu ziehi kepeude au mapeu lie eh pei gailak, cide au pa hikelu da. 5 Dede mige mata teila kemakbe pa nlumla kemakme de tei masang beu kelabe de nlum lucai, pe kenlum au masang lie eh luu lula. 6 Cine David liede batadung si mene Tinggwang ne masang lie eh luu kelube de samlam beu. 7 Pa kesanglaisiu ga ranggai,

"Hezaibe gikah eh bata kesia keteime penui mau gibeu kedimedung,

nah penui maudung gumdi kecumedung au samlam pungtu.

8 Rampaube minabe reu pe mau peidi kemakme au samlam pungtu."✝

9 Iciucai samlam aide hegeukerumme da rünne ranggai bamni, mi hegeurum kemakme dungde sino? Kedanemene anui rangla, "Abraham de au kenlum dene tei masang luda." 10 Ciciu cai dainzwa cide peilu dino? Abraham hegeurum keludau mi, hegeurum kemakne no? Cide au hegeurumkelu caine ma, dede hegeurum kemakne lie. 11 Pa pe kenlum dene pecu tei masang kelu kaugiak pa hegeurum kemakne de hegeukerumme rehi pa ngaulu, iciu eh pa nlumkelu pelane pei teilu kerane, penui hegeurum meliede, iciu eh penuide masang kecuga peincüt gailu kerane.✝ 12 Nah pa hegeurumkelu peibe teilu hegeurum kelume ziemne rünne ma dede anui pau Abraham pe geurum kemakne kenlum teu eh kelungh puisau de mzui kelame, ziemne de da.

13 Kedanemene Abraham dage nah pe leuhme dage pa kideube mapwabe zielie kecu sampet kai kebeude hezaibe gade gwang ma dede kenlum masang gade. 14 Kedanemene magade hezaibe gade kelunghme de mapwame teizie liecai, kenlum au tei nrwa dida, nah sampet au kemta dida. 15 Kedanemene hezaibe au Tinggwang lunghop keugwangbeu kelane, dede hezai kegah ga au gikah kecude bamla ma. 16 Aipau kiede ziemne kenlum gade sampet kaikebeu au ngaugia rehi gade nah Abraham leuhme pelane de peu kerane, hezaibe kangga kebamme rünne ma, dede Abraham kenlum mzi kelume ziemne de. Pa au anui pelane pei da, 17 Kesanglaisiu ga ainzwa raupwala, "Ih ncu peu heleuh kekieege pei teibeu dida,"✝ pa nlum kela Tinggwang dwa gade, tsaikedime de kering peu kelabe nah ma lunghla kemak dungde tei mlung kegaibe. 18 Keregui bam kera pekie gah liede pa nlumlu, pa heleuhdung kekiee ge pei teilu kera nlum eh, pe dage rangkebeu nzwa, "N leuhmedung cinzwa kiee luzie." 19 Kenlum ga mneidi mene, pa pekatei pe pum de au tsai kedi gage cet gaidi (kedanemene pa mmi haige kenzwa kedine), nah pa Sarah henabam tsaikedi kecuga cet gaidi.✝ 20 Dede Tinggwang sampet kaikebeu ziemne, Abraham pe kenlum suihau dima. Meliene, kenlum ne pecu teingkieng silu nah pa Tinggwang de ketwa peu. 21 Tinggwang pe sampet kai kebeude teicanglu kebui pa nlum cangsiak bam. 22 Ciziemne aide ne de pecu pei pwa masang lie di.✝ 23 Nah Tinggwang pecu masangkelame ge lie qu kelude au, Abraham ziuyi rünsangne ziemne pei luma, 24 dede anui ziemne desi, masang kelame gelie de pei silu kera au, anui ketsai gade Jisu anui Rampaube de kwakcuh kelube de nlum kelume. 25 Aide pa delie anui maudung ziemne pe pum kaikebeube nah anuide tei masanglu kerane kwakcuh kelube.✝