1 Cine cu Khrista Jisu da la kedime ziemne au mmaugai kera* gahda. 2 Kedanemene Khrista Jisu ga kering Rabe zaide ne kemau zai nah ketsai gade ncu kelilu da. 3 Kedanemene Moses zaibe au pumteihbe gade mnei kedine teigai kelakbe Tinggwang tei luda. Pa pekatei pe Na Jisu de kemau ratak tei kera ziemne kemau pumteih nzwa eh langgai, nah pa pumteihbe gage kemau de mmau dida. 4 Pa aide teikegai au hezai makesiadung anui dade tei canglu kerane, anui pumteihbe zai ga mene Kemci Rabe zai ga lunghlu kelame. 5 Kedanemene pumteihbe zai gade lungh kelame pumteihbe gudung gage pelung kai teula la, dede Kemci Rabe zai gade lungh kelame Kemci Rabe gudung gage pe lung kai teula la. 6 Kedanemene pumteihbe gage lungning kaiteu kela au ketsai, dede Kemci Rabe gage lungning kaiteu kela au kering nah lungciep. 7 Aide kedanemene pumteihbe gage lungning kaiteu kela au Tinggwang ngaurau lu, cide au Tinggwang zaibe kangga bamla kemak ziemne, nah cide bamde gailak. 8 Dede pumteihbe ga kelame Tinggwang suiyi tei gailak. 9 Ciciude, nnui au pumteihbe ga lama dede Rabe ga la, magade Tinggwang Rabe nnui lungga lunghla kesang liecai. Dede mige peda Khrista Rabe la mecai, pa Khrista da lama. 10 Dede Khrista nnui lungga lacai, pumbe au kemau ziemne tsai dida, dede kesamsang ziemne Rabe au ringla. 11 Jisu de ketsai gade kwakcuh kelube Rabe de n lungga lunghla kesang liecai, pa Khrista Jisu de ketsai gade kwakcuh kelube pe Rabe gade nnui lungga kelade gade nnui rimdi kera pumde de kering peuzie.

12 Cine, sinamedung, anui au hepau kepungme ge, dede pumteihbe zai gade lungh kerane pumteihbe pau pungbam ma. 13 Kedanemene nnui pumteihbe lungning gade lunghcai, nnui au tsai zieda, dede Rabe gade pumteihbe bata dungde nnui teitset dicai, nnui ring luzie. 14 Kedanemene Tinggwang Rabe ne lampui saukela leune, cidungde au Tinggwang namedung delie. 15 Kedanemene nnui hebaang teidi kera rabe ngau luma, iciu eh nnui ngngi eh lungh daidi kera; dede nnui pe name teidi kera Rabe ngaulu, ciziemne anui, "Apei Tinggwang, Peibo!" de qula. 16 Rabe pekatei de anui rabe de ngngwa eh anui Tinggwang name delie kecu zierang teila. 17 Nah anui pe name liecai, anui pe ma pwaleu kerame, Tinggwang mapwame deda. Anui au Khrista de ngngwa mapwa kencütme, anui de pecu ngngwa keherei kesang liecai pecu ngngwa ndulu kerane.

18 Kedanemene Ih cetkecu cudau ting reikecu dungde au anuide kendu keuliagai kerade de keu keda gailak. 19 Kedanemene damkeludung Tinggwang name de keuliagai kerade nlwa eh regui eh kwabam dida. 20 Kedanemene damkelu dungde peu kemta kangga la dida, pekatei pesui gade ma, dede keregui ge kebam gade cide tei kegaibe ziemne, 21 cide damkelude de rimdi kera baang teikela gade teumpetlu delwe Tinggwang name suirang ketei kendu gage teugwang luzie. 22 Kedanemene cu kecangde damkelu pelane ket tei eh teei eh mra kebam anui cibam. 23 Cide rünne ma, dede anuikatei de, Rabe tsi raitube kebamme, anui anuikatei liede anui lung gade mrabam, anuide pe name teilu kera kwa eh, anui pumbe de rilu kerane. 24 Kedanemene keregui aide gade anuide kelilu da. Cu kengau kereguide au keregui ma. Kedanemene cau ngau kebam de regui eh bam lano? 25 Dede anui ngaula kemak de regui eh bamcai, anui helungtie eh cide de kwa bamla.

26 Dede cide kesiakge, Kemci Rabe de anui kemnei ga anuide ngha la. Kedanemene anui dainzwa kielu maisiabi kecu anui cila kemakne, dede Kemci Rabe pekatei anui ziemne kie bamla rangcang gai kelak kemra kwa gade. 27 Dede mina mlung de peei kelabe Kemci Rabe lungningbe de cila, kedanemene pa kemcime ding tei eh Tinggwang lungning nzwa kiebam kelane.

28 Kedanemene Tinggwang de hung kelame ziemne au, Tinggwang pe mariem ziemne qu kelume ziemne, pa maleune de keyi ziemne teikela anui cibam.* 29 Kedanemene pa mrai cikelame de, Tinggwang peu pe na nzwalu zielie eh mrai kedet teula dida, iciu eh peu pecu sinamedung kekiee kakgade neraibe teilu kerane. 30 Nah pa mrai kedet kelume dungde, cidungde de pa qu luda. Nah pa qu kelume dungde, penuide pa tei masang luda. Nah pa tei masang kelume dungde, pa penuide tei ndu beu dida.

31 Iciucai ma aidungde ziemne anui dai ranglai? Tinggwang anui kilam lacai, caune anuide renia lulai?✝ 32 Pa pekatei pe na de de kaizeudi kemakbe de de anui pelane ding gade pecu kai kebeube, dainzwa eh pa ma pelane pecu desi eh anuide mta peu mene talai?* 33 Caune Tinggwang gu kedet kelume de mmau lulai? Tinggwang ne mide tei masang beu kelabe. 34 Mmau kelabe de cauno? Khrista Jisu au tsai kedibe, dede cipau reude, ringcuhdai kelube, Tinggwang ba zetle kebambe, nah anui ziemne kie kebambe. 35 Caune Khrista keku gade anuide teuntsam lulai? Keherei, mede hepüt kerüt, mede sah kegai, mede kemzeu, mede paini kegah, mede kengngi, mede kiengtie ne zieni? 36 Kesanglaisiu ga rauteukela nzwa,

"Nnui kemmi ziemne anuide petingnai teitset bam dida.

Anuide au cetpwa meurünna daptset keradung gede nzwabam dida."✝

37 Dede ma aidung pelane ga anui au anuide kukelabe gade ngkiengkelu reu ngkieng kelume ge dida. 38 Kedanemene Ih cisiakte luda ketsai liede, mede kering, mede tinggimgwame, mede kengkiengdung, mede cu kebamdung, mede gwangdai kerabedung, mede kengkiengme, 39 mede kecehu, mede kecok, mede damkelu keheibe de, anui Rampaube Khrista Jisu gade Tinggwang keku de gade anuide teuntsam gailak.