1 Cu anui kenlum gade ngkieng kelame au mneikelame gu kemneidung pungha maisia, nah anuikatei anui suiyibe teikerabe ma. 2 Peu anui hangge ge kecude pe kidabe ziuyi ziemne pe suiyi teilu, pecu teingkieng beulu kerane. 3 Kedanemene Khrista liede pekatei pe suibe teima. Meliene, Kesanglaisiu ga rang kelanzwa, "Ncu kiikelame samdung de, O Tinggwang, ada gwang dida."✝ 4 Kedanemene pedwa Kesanglaisiu ga raupwa kelade au anuide ledeulu kera ziemne raupwala, iciu eh Kesanglaisiu ga helungketie nah teikengkuu gade anui keregui ge bamlu kerane. 5 Cu peu helungketie nah teikengkuu Tinggwang depeu Khrista Jisu gade hangge gede ngngwa kelungzwa kecu peu kelube tei lulo. 6 Aide pecu peu teilo iciu eh nnui lung ge nah kwa ge tei eh Tinggwang nah anui Rampaube Jisu Khrista Peibe de twalu kerane.

7 Ciziemne hangge gede ngngwalu, Khrista liede, Tinggwang de ketwa gage nnuide ngngwagai kelunzwa. 8 Kedanemene Ih rangla Tinggwang masang gade Khrista de hegeukerum kanga kila ge teidi, iciu eh ndaa paumedung dage sampet kebeu dungde ci mcilu kerane,✝ 9 nah Gentileme dungde peu Tinggwang ngaugia ziemne pecu twalu kera ziemne. Kesanglaisiu ga raupwa kelanzwa,

"Ciziemne Ih ncu hetwa peuzie Gentilemedung kakgade

nah lei tei eh n zi twazie."✝

10 Kesanglaisiu ranggai dai,

"Nnui suiyilu, nnui Gentilemedung, pe minadungde ngngwalwe."✝

11 Nah rangdai gai,

"Rampaube de twalu, nnui Gentileme pelane;

nah peu mina pelane de pecu twalo."✝

12 Ciu eh Isaiah ranggai dai,

"Jesse leuhme lungh gwangzie, Gentileme reu dikera cuh kecube de liede; pe dade Gentilemedung keregui bam luzie."✝

13 Cu keregui kebam Tinggwang depeu nnui kenlum gade suiyi pelane nah lungciep le teipui kelube tei lulo, iciu eh Kemci Rabe kengkieng gade, keregui nnuida bamreu reulu kerane.

14 Dede Ih akatei de nnui ha de ci hemi bam, a sinamedung, hangge gede de kecung silu kebui nnui nnuikatei keyile kepui tei kebam, maci pelane le puipung kebam. 15 Dede Ih kuusüt eh nnui dage makiedung ge ha laisiu aika rausi gaila nnuide peu nsunglu kerane, kedanemene ngaugia Tinggwang ne acu kepeune. 16 Mtamapeu aide cai Ih Khrista Jisu kila Gentilemedung dage langkegaibe tei kera, cingkume ge nzwa Tinggwang samliakeyi de reca teibeulu kera. Ih aide tei maisia iciu eh Gentilemedung reca de Kemci Rabe gade tei mcilu eh peu luulu kera ge teilu kerane. 17 Cine Ih Khrista Jisu gade a bata Tinggwang ziemne teikegai hegielu kebui pekie ge bam. 18 Kedanemene Ih magede kuu eh ranglu kera gah Khrista ne acu teu Gentileme de samzai ketei gage ngngwagai kelude gwale. Ma aidungde teikelu au sam nah heta gade, 19 marehi nah mima kecangh, nah Tinggwang Rabe kengkieng gade. Aide ainzwakelu au, Jerusalem gade nah twagwa kebam Illyricum deudi kecang, Ih Khrista samliakeyi de rangrwa cangsiaklu kerane. 20 Aide nzwa eh, Ih teineu kelade au samliakeyi rangrwa kerade da, dede Khrista zi ci kebam heni ga ma, iciu eh Ih mi kedame ne pe bangdwa dwa kebeu reu gage tei melu kerane. 21 Dede Kesanglaisiu ga raupwa kelanzwa:

"Pe ha ranglia kemakme de pecu ngau zie,

nah siu kemakmedung de cilu zie."✝

22 Ciziemne nnuida gwang kera acu liede pia kekiee ge kaam dida.

23 Dede cu, Ih cuikui aidungde ga heta tei kera heni bam meda, nah Ih mmi kekiee ge nnuida gwang kera reguila dida. 24 Ih Spain deudi ga mie eh kahkegwangdau Ih nnuide ngau kera regui kesang bam dida, nah cika nnuide peu a beuh ga nghalu kerane, Ih kakge nnuide ngngwa bam eh kehega luda. 25 Dede Ih cu Jerusalem ga kenlummedung da kengha teumie zie. 26 Kedanemene Macedonia nah Achaia deuceu ga kebam kenlumme ne Jerusalem ga kebam kenlumme kakga kegahme ziemne makai ge peu kegaide penui suiyi eh peugai. 27 Aide penui suiyi eh tei kesang, kedanemene penui au penuide peu kerame delu. Kedanemene magade Gentilemedung penui rabe madung mzicai, penui cide kideube madungde peu kera penui nsam delu. 28 Ciziemne, Ih aipau ta de teicang keludau nah penui hekwa kelude ngaukelu cimci lude, Ih Spain deudi gage tetgai zie nah nnuide lampui gade redau zie. 29 Dede Ih nnuida kegwangdau, Ih Khrista samlam le kepui tei eh nnuida gwang kera Ih cibam.

30 Cu Ih nnui dade kiela, sinamedung, anui Rampaube Jisu Khrista gade nah Kemci Rabe keku gade, a ziemne Tinggwang dade nnui kekiedung gade acu ngngwa kie gailo. 31 Acu Judea deu ga nlumkemakme dade kelilu kerane nah a bata Jerusalem ziemne kemcimedung luulu kebui teilu kerane kielo. 32 Tinggwang lungning nzwa eh acu peu asui yi eh nnuida gwanglu kera nah Ih nnuide ngngwa ncüt eh kemtak ngaulu kerane kielo. 33 Cu peu lungciep Tinggwang de nnui pelane da bam kelube tei lulo. Amen.