1 Ciziemne nang au kenzeu gah,* O minabo, keheibede mi tutiak kelame, kedanemene nang kedame tutiak kelane nkatei ncu mmau la. Kedanemene nang mi tutiak kelame de cikesiak ge teila delu. 2 Dede Tinggwang tutiak au cikenzwa tatei kelame tutiak kecudau kesangbe rehi gade teikela anui cibam. 3 Dede aide cet gailo, nang cinkenzwa ta teila kelame tutiak la liede nang de cikesiak ge teila. Tinggwang tutiak gade nang paklu buini? 4 Mede nang pe ngaugia kedide, nah pa keherei ziehi tei kemri de, nah pelung ketie de au made melie eh cetla ni? Nang Tinggwang ngaugia de au peu ncu helungnreulu kera gage ngngwa gailu kera kecu nang ci meni? 5 Dede n mlung takham kecune nah helungnreu kerau dene nang au lunghop tingba benai, nah Tinggwang tutiak kenzuibe keulia kecudau n katei ziemne lunghop hekwabam dida. 6 Mi keheibe dede pe bata tei kegai rehi nzwa Tinggwang peucaili daizie:✝ 7 helung tie eh, bata keyi rehi gade hetwa, nah herüt, nah kesamsang peeila kecume de, Tinggwang kelungta kering peuzie. 8 Dede keheibe de pekatei peziu peei kelame, nah kesangbe samzai teila kemakme dede kesang kemak samzai tei kelame da, Tinggwang lunghop nah zaisiet rata gwang zie. 9 Kesia tei kela mina keringria leune dage Tinggwang keherei nah suisiet teugwang beuzie, keraibe Jewme, nah Gentileme dage de. 10 Dede ma keyibe teikela leune da hetwa, nah herüt, nah lungciepbe gwang zie, keraibe Jewme, nah Gentileme dage de. 11 Kedanemene Tinggwang heneuherüt teila melu.✝ 12 Hezaibe si mene kemau tei kelame hezai si mene kap dizie, nah hezaibe kangga de kemau tei kelame hezaibe ne pe tutiak zie. 13 Kedanemene Tinggwang dwade masang kelame au hezai siu kelume au ma, dede cide au hezai teimzai kelame pecu tei masang luzie. 14 Gentileme, hezai kegahme, penui zai gade hezaibe tadung teila, cidungde au penui ziemne hezaibe da, penuida hezaibe gah liede. 15 Aide gade penui hezai gade teimai kesia tadung de penui mlung gage raupwa kenzeu keulia dida. Penui lungcet ne de kesang delie kecu penuide keulia la, nah penui kecet ne penuide madauge mmau mede madauge penui lam pwala. 16 Cide Tinggwang mina pelane kengkim lungcet tutiak kecu benai tei luzie, Khrista Jisu gade, Ih samliakeyi kerang rehi de gade.

17 Dede magade nang nkatei ncu Jewme lie qu nah hezaibe reu ngngei eh nah Tinggwang ha teu hegie lacai, 18 nah pe lungning ci nah daipaude yitu bi kedetlu, kedanemene nnuide hezaibe gade sauliadi delu; 19 nah magade nang nkatei ncu miakcitme puisau keteime ge, kemui ga kelame ziemne kebaa gelie eh, 20 kemieme de keledeube, henamedung gu keledeube, nah hezaibe gade nang maci nah kesangbe bamlie eh ci mci lucai, 21 iciucai nang mide ledeu kelabe, nkatei ncu de ledeula meni? Nang rega so de ledeu kelabe, nang rega lani?✝ 22 Nang migede kemmha ta teiso de eh rangkelabe, nang kemmha ta tei lani? Nang mamie kereca ngkau kelabe, nang kerecaki gu rega lani? 23 Nang hezaibe gade ngang kelabe, nang hezai gikah eh Tinggwang de rütkemak ta tei lani? 24 Kedanemene "Nnui ziemne Gentileme kakga Tinggwang zi rangmsia la," cide Kesanglaisiu ga raunzeu kecu nzwa.✝ 25 Kedanemene hegeukerum* n ziemne pemi bam kesang magade nang hezaibe mzai lucai, dede magade nang hezai gikah lacai, nang hegeurum kelude au rumkemak nsam ge dizie.✝ 26 Cine, magade, hegeurum kemakme hezaibe teimai kesaide mzai lacai, pa pe geurum meliede rumkelu nzwa dilak ni? 27 Mige pelui hegeurum kemak ge pa hezaibe mzai lacai ncu mmau lakni? Aide au kedanemene nang hezai rauteu kelade nah hegeukerum de bam, dede nang hezai teipang kelane! 28 Kedanemene pa au Jewme hegwazube rünne gade ma; mede hegeukerum de pumteihbe hegwazube rünne gade ma. 29 Dede pa au helungbe gade Jewme ge, nah hegeukerum au mi mlung gade, Rabe gade, raukelu hezai gade ma. Mina cikenzwame gu ketwa au mina dade gwang ma dede Tinggwang dade.✝