1 Ih nnui dage samliakeyi zierang tei kegaide, cu Ih nnuide peu cigai daila, sinamedung, cide nnui luulu da, nah nnui cide ga sap bam, 2 Ih nnui dage zierang tei kegai samde nnui herak ntip bam lucai, cide ne nnuide kelilu zie, nnui kenlum kemta gedi maige. 3 Kedanemene Ih de ngaukelu mlangtube Ih nnuide peu dida, cide kesanglaisiu ga raupwa kela nzwa, Khrista anui mau ziemne tsai kebeude, 4 nah pecu kung kedi nah iciu eh kesanglaisiu ga nzwa pa langcumne benai ring cuh dai kelude,✝ 5 nah pa Cephas * nah pecai kereiekena bau de pecu peu ngau kegaide. 6 Pecai pa piage gage pe caisuime haimengei swade kekiee de peu pecu ngaugai, penui kekiee ge ringbam reu, dede kangge au tsai dida. 7 Pecai pa James nah langkegaime pelane de peu pecu ngaugai. 8 Kamtube, Ih peting kemakne mnakelu nzwa liede acu peu pecu ngaugai. 9 Kedanemene Ih au langkegaimedung kakgade ceutu nabe, acu langkegaime liede qu daulak, kedanemene Ih Tinggwang ngqwa de teikeherei gwanglu. 10 Dede Ih cu ainzwa kebam de au Tinggwang ngaugia gade, nah pe ngaugia ada kebam de au kemta teidi ma. Meliene, Ih penui pelane swa matei heri ki, ciude cide Ih ne ma, dede Tinggwang ngaugia ada kela dene. 11 Cine cide Ih ne mede penui ne liede ainzwa eh ledeula, nah nnui nlum luda.

12 Cu Khrista ketsai gade ringcuh kelude zierang teila cai, dainzwa nnui kakga kangge ketsaime ringcuhdai kelu gahlie ranglu laino? 13 Dede ketsaime ringcuhdai kecu gah cai, Khrista de de kwak cuhlu meda; 14 nah Khrista de ketsai gade kwakcuh lu meliecai, anui zierang tei kelade de kemta dida, nah nnui kenlum de de kemta dida. 15 Cipau reude, anui Tinggwang zierang kenret teila dida, kedanemene Tinggwang Khrista de ketsai gade kwakcuh dailu delie anui zierang tei kelane, ketsaime ringcuh dai me kesang liecai, pa pecu kwakcuh luma. 16 Kedanemene ketsaime de kwak cuhlu mecai, Khrista de de kwakcuh luma; 17 nah Khrista de kwak cuhlu mecai, nnui kenlum au kemta; nnui cude nnui mau ga lareu. 18 Iciu cai Khrista de nlum eh tsai kedimedung de kap dida. 19 Anui aipau teilung de rünne ziemne Khrista de regui bam liecai, anui au minadung pelane kakde nggiatume delie.

20 Dede cu Khrista de ketsai gade kwakcuh luda, tsai kedime kakde petsi raitube. 21 Mipei ge dade ketsai gwang* kelu nzwa, mipei ge dade ketsai gade ringcuhdai kecude gwanglu. 22 Adam gade pelane tsai kedi nzwa eh Khrista gade pelane de tei nring luzie. 23 Dede hangge ge de penlia gade zie: Khrista petsi raitube, pecai pa cailikegwang dau, Khrista gu tei kelamedung zie. 24 Pecai Khrista kedime pelane, kengkieng keteu nah kengkieng pelane ngkapdi de nah pa hegwangram Peibe Tinggwang de peudi de kideu penli dizie.✝ 25 Khrista pe ngauraume pelane de pe pi kangga ge kaidi kemaktane pa ne dibam maisia.✝ 26 Ngaurau kamtube ngkapdi kerabe au ketsai.✝ 27 Kedanemene Kesanglaisiu rangla "Tinggwang ma pelane pe pi kang gage kai dida." Dede, "Pa ma pelane pwa pe kekang gage kai dida," de kerang dau, pa pe kang gage kai kedibe de cika si kemak mcigi da.✝ 28 Pecai, ma pelane de pe kangga ge kaikelu cai, Nabe de ma pelane pwa pe kangga ge kai kebeube de kangga ge pekatei pecu kai dizie, iciu eh Tinggwang ne ma pelane reu ditube teilu kerane.

29 Mecai, ketsaime ziemne duipum tei kelume daipai teilai? Ketsaime ringcuh dai me kesang liecai, daitei penui ketsaime ziemne duipum tei lano? 30 Daitei anuide bamdapkak msangne kengngi kerehim ga la laino? 31 Sinamedung, Ih tingba ramsangne ketsai dau bam! Ih anui Rampaube Jisu Khrista gade nnui ziemne hegie kelade ziemne Ih aide sampet gaila. 32 Mina kecet ria gade, Ih Ephesus namdi gade renaam kaunedung de ngngwa regicai, Ih daipai kemmi bamno? Ketsaime cuhdaila meliecai, "Anui tyei nah sak bam go, kedanemene ncünne anui tsai zielu."✝ 33 Nnuide cwa diso: "Mi kangngwa kesia gade mizai keyi de teimsia dila." 34 Nnui lung petau ga caili gwanglu! Nah kemau tei sita dilu. Kedanemene nnui midung ge Tinggwang ha cima, Ih aide nnui ngngam rang gaila.

35 Dede midung ge rangzie, "Dainzwa eh ketsaime cuhdai lai, nah penui pum dainzwa eh penui gwang zie no?" 36 Nang kemiebo! Nang ling kegaide tsaigai mai ringcuh dai lama. 37 Nah nang ling kegaide au, pe bang lungh cuh kerade ma, dede petsira ge, wheat mede ma kedage lubui. 38 Dede Tinggwang ne pe suibe nzwa cide pe pum ge peuzie, nah petsiradung ketket de, pepum rip peuzie.✝ 39 Ring kela kaune leune teih nzwakap ma. Meliene, mina pumteih tsam, nah makaune pumteih tsam, nah nruine pumteih tsam, nah heka de tsam. 40 Tinggim pumdung nah kideu pumdung de bam. Dede Tinggim kendu au kideube kendu dade tsam. 41 Tingnaimiak kendu au tsam, nah hekei kendu de tsam nah hegidung kendu de tsam. Kedanemene hegi ge hegi kedage dade pe kendu tsam kecune. 42 Cine ketsaime ringcuh kecu cide nzwa da. Riemdi kera gage ling kegaide, tsaidai kelak gage ringcuh dai lula. 43 Cide hengam tei eh linggai; dede ndu eh cuhlu. Cide mnei eh linggai; dede ngkieng eh cuhlu. 44 Cide pumteih ge eh linggai; dede rabe pumteih ge eh cuhlu. Pumteihbe pum ge bamcai, rabe pumteih de bam zie. 45 Cine ainzwa raupwa la, "Adam mina raitube ringkela keringria ge teidi." Adam kekambe kering kepeu rabe ge teidi. 46 Dede rabe rai ma dede pumteihbe, nah pecaine rabe. 47 Kideube gade mina raitube Adam de tangdei le teilu. Dede Khrista, mina pekenabe au Tinggim gade gwang.✝ 48 Kideube gu tei kelame au tangdei le teikelube nzwa da; nah tinggim gu tei kelame au tinggim gade kegwangbe nzwa da. 49 Nah anui cu tangdei le teikelu mina rehi kecu nzwa, anuide Tinggim gade kegwangbe rehi de nzwa dizie.✝

50 Cu Ih aide rangla, sinamedung, miteih nah mijai dene Tinggwang hegwangram gum gailak. Mede rimdi kerabe rimdi kelakpe de gum gailak. 51 Ainie! Ih nnui dage macetkecok ge ranggai la: anui pelane zip dilak, dede anui pelane tsam dizie, 52 kaknage gage, miakhip kegai gage, telui kamtube kwa kegai gage. Kedanemene telui kwa gaizie, nah ketsaime tsaidaidi kelakme tei eh ringcuh luzie, nah anui tsam dizie. 53 Kedanemene rimdi kerabe pumteih aide rimdi kelakbe de kailu maisia, nah tsaidi kerabe pumteih aide tsai kelakpe de kailu maisia. 54 Nah rimdi kerabe pumteih aide rimdi kelakbe kailude nah tsaidi kerabe pumteih tsaidi kelakbe kailude, iciu de Kesanglaisiu ga raupwa kelade teicang luzie,

"Ketsai de ngkap dida; ngkieng cangsiak luda."✝

55 "Ketsai, daiga nang ngkiengkelu lano?

Ketsai, daiga n tet lano?"✝

56 Dede ketsai tet au kemau, nah kemau kengkieng au hezai. 57 Dede anui Rampaube Jisu Khrista gade anuide ngkiengkelu kepeube Tinggwang de twa.* 58 Ciziemne, kehung sinamedung, ntip bamlu nah nlai diso, Rampaube gade nnui ta tei kegaide kemta dila kemak ci eh Rampaube ta teinaang bammui lulo.✝