1 Paul, Tinggwang lungning gade Khrista Jisu ne langkegaibe, nah Timothy anui sinabe, Corinth namdi ga kebam Tinggwang ngqwa, nah kemcime pelane Achaia cuikui leune ga kebamme dage kekai.* 2 Anui Pei Tinggwang nah Rampaube Jisu Khrista dade kegwang lungciep nah ngaugia de peu nnuida bam lulo.

3 Tinggwang nah anui Rampaube Jisu Khrista Peibe, ngaugia Peibe nah maleune gade helungtaumla beu kelabe Tinggwang de peu hetwa pungkelube tei lulo, 4 pa ne anui rei pelane gade anuide tei relui beula, iciu eh anui kehei leu ga rei kelame de Tinggwang ne anuide tei relui kebeu de teu kerelui peulu kerane. 5 Kedanemene Khrista reidung ga anui ngngwa reikelu nzwa, cinzwa eh anuide Khrista gade kerelui ngau lula. 6 Dede anuide keherei lalie cai, cide au nnui relui nah kelilu kera ziemne da; anui reluilu cai, cide au nnuide tei reluilu kerane, iciu eh anui keherei kegai de nzwa nnui rei kecu dau helungtie eh lialu kerane. 7 Nah anui keregui nnui da kebam de au ntip bam, nnui keherei kecu ga ngngwa reibeu kelame kecu ci eh, iciu delwe kerelui ga liede. 8 Kedanemene anui peu nnuide cimene laneu ma, sinamedung, Asia deuceu gade anui keherei kecu ha de. Anuide tei keherei sütdi eh anui liagai kelak reige rei eh anui ringlu kera de cetlu tadi. 9 Kesang, anuide teitset dilo eh sam kaikebeu bam dida, iciulu eh anuikatei anuide nlumdi melu kerane, dede Tinggwang ketsaime de kwakcuh kelube de nlumlu kerane. 10 Ketsai kengngi cikenzwa gade pa anuide kelibeu, nah Tinggwang anuide keli beuzie. Anui pe dage anui keregui kai dida, nah pa anui mapie jüja la luzie, 11 nnui anui mding tei eh ngngwa kekie ketei ga ncütkelu gade. Iciude mina kekiee ge kekie gade anuide ngha kebeune mina kekiee ge anui ding tei eh pecu ketwa peu luzie.

12 Kedanemene anui hegie kela au aide da: anui lungcet zierang de, cide kideu ga anui teilung nah bam keraide nnuide ngngwa riangkeu kecu ga anui mci nah Tinggwang masang gage lunggai lu kecu deda, cide pumteih maci gade ma, dede Tinggwang ngaugia gade. 13 Kedanemene anui nnui dage ma kedage de raugai ma, dede nnui pei nah cilu kebuibe rünne. Nah nnui cicangsiak luzie ha Ih regui bam, 14 nnui ma kesa ci kelu nzwa, iciu eh Rampaube Jisu cailikegwang tingba benai anui ziemne nnui hegie luzie, anuide nnui ziemne hegielu kera nzwa.

15 Nah aide ci mci eh Ih nnui da gwang railu kera riemlu, iciu eh nnuide peu samlam reude samlam ngaulu kerane, 16 Ih Macedonia deuceu ga kemie dau nnuide kah gwang redau nah Macedonia gade kegwang dau nnui da gwang peu nnuide acu langpwa Judea deuceu gage tetkaidi kerane. 17 Cine Ih ainzwa tei kera riem kecu dau, Ih lunghau dini? Mede Ih riem kelude mina mariem gade ni, iciu eh, Ih "Yeo, yeo" nah "Ma, ma" de piage gage rang ni? 18 Dede Tinggwang au samsang kela nzwa, nnui dage anui sam au, "Yeo" nah "Ma," de kecube ma. 19 Kedanemene Tinggwang Nabe, Jisu Khrista, anui—Ih nah Silvanus nah Timothy nnui kakga ge pe ha rang kelabe de, "Yeo" nah "Ma" de kecube melie, dede pe au "Yeo" de muila. 20 Kedanemene Tinggwang sampet pelane pe dade au "Yeo" delu. Cine Tinggwang kendu ziemne anui pe zi teu "Amen" de rangla. 21 Cu Tinggwang ne anuide Khrista gade nnuide ngngwa ket ketei kebeube da, nah pa ne anuide keniaklu da, 22 pa anuide giak kegaibe de da, nah pa pe sam teicang beu zielie Kemci Rabe anui nlung gage kaibeu da.

23 Cu Ih Tinggwang de a teilung zierang lie qu gaila—Ih Corinth namdi gade gwangdai kemak au nnuide mbai beu kerane. 24 Aide au nnui kenlum nreu anui di bam de kecune ma, dede, anui au nnui suiyi ziemne nnuide ngngwa heta tei kelame, kedanemene nnui kenlum ga sap ntip kebamne.