1 Akumedung, sampet aidungde anui da kebamne, anuikatei anuide pumteih nah rabe teihera kedidung gade teimci kap lugo, nah Tinggwang mie hing eh mcicang lulo.

2 Anui dage nnui lung ngkeigai lo! Anui migede de kemau ta teigai ma. Anui migede de tei rejam dima, anui migede de cwa dima. 3 Ih nnuide mmaugai kerane rang ma; kedanemene nnui au anui lung ga bamlie Ih ranggai da, anui ngngwa ket tei bammui kera, ringde nah tsaide. 4 Nnuida a kenlum kedi ge bam; nnui ziemne Ih hegiesüt lula. A lung ga kekuu le puibam. Anui reidung pelane gade suiyi ada pui nliem bam.

5 Anui Macedonia deuceu ga gwang keludaude, anui pumteih kemtak gede bam ma. Meliene, kehei gade anui da kehebwak le puidi—hegwale ngngwa kesia nah milung ga kengngi. 6 Dede Tinggwang, pesui ngkung kelame de lungciep peu kelabe, Titus gwang kegai gade anuide lungciep peu, 7 nah pa kegwang gade rünne mene, dede nnui lungciep teu pelung tei relui kegai gade de. Pa nnui regui bam kela, nnui suisia bam kela, nah acu hengin kebam de anui dage paulia gia, iciu eh a suiyi de kiee silu. 8 Kedanemene Ih nnuide laisiu raukegai gade nnui suisiet teidi liede, Ih cide ngngai ma (keraidau Ih ngngai liede) kedanemene laisiu cide nnui suisiet teidi liede tingkaknage gwale kemak Ih cilu. 9 Cu Ih a suiyi bam, nnui lungrei kebam ziemne ma, dede nnui lung rei eh helungnreu kelune. Kedanemene Tinggwang lungning gage nnui lung reigai, ciu eh keheibe gade de nnui anui ziemne kekap dau melu kerane. 10 Kedanemene Tinggwang suisiet kai kegai mariemde au kelikelu helungkenreu ngngai dila kemak teugwang beula. Dede kideu suisiet au ketsai peula. 11 Pielo, Tinggwang lungning gade nnui lung rei kegaidau aide ne nnui dade daige petlu dibi: nnui lung kaisüt, nnui nzeu lie kecu laikai teisüt, nnui rata süt, nah ngngi süt, nnui hengin süt nah nnui laikai teisüt, nah kemau de saja peu! Nnui maleune ga nnuikatei nnuide aide ga nzeu lie kecu lia gaida. 12 Cine Ih nnui dage raugai liede, cide mateimau kedibe ziemne ma, mede matei maugai eh keherei kegaibe ziemne de ma, dede nnui anui keleu tei eh laikai tei kegaide Tinggwang dwagade nnuide lialu kerane. 13 Aipau kiede ziemne anuide tei ngkuulu.

Cu anui kerelui ngau kelu nreu de, Titus suiyi de ziemne anui suiyi sütlu, kedanemene nnui pelane pe lung tei relui kebeune. 14 Ih pe dade nnui ziemne keheigade hegiedi liede, Ih ngngam dima. Meliene, anui nnui dage maleune kesangbe gade rang kegai nzwa, anui Titus dade hegie kegaide au kesang kecu ci luda. 15 Nah pa nnuide keku de au diki, kedanemene nnui pelane pe samzai tei, nah nnui ngngi nah mbeu eh pecu ngngwa kelude pa nsung bamlu. 16 Ih a suiyi la kedanemene ma pelane gade nnuida a kenlum kebam ziemne.