1 Tinggwang de ngngwa heta keteime kecu nzwa, Tinggwang ngaugia de luu pwa kemta teidi helo nnui dage anui kiela. 2 Kedanemene pa rangla,

"Luulu kebui ting ga Ih nnui kwa kingneilu,

nah kelikelu tingba benai Ih nnuide ngha beu."✝

Ainie, cu luulu kebui tingda. Ainie, cu kelikelu tingba da.

3 Anui mige dwa gage kekaam kenam ge de kaima, ciu eh anui heta tei kebamde kemta liedi melu kerane. 4 Iciu meliene, anui Tinggwang kilame lie kecu maleune gade anui keulia la; milung ketie, lungrei, kehebwak, keherei kecu gade, 5 dap kecu, hebaang ketei, kehebwak, heta ketei, zip gai kelak, kemzeu gade, 6 kemci, maci, milung ketie, mizai keyi, Kemci Rabe, keku kesangbe gade, 7 sam kesangbe gade, Tinggwang kengkieng gade; anui ba zetle nah hile kesamsang reunet keteu gade, 8 herüt kepeu nah herüt peu kemak gade, rang kemsia nah rang kehemi dau liede, anuide kenret mege nzwala, dede kesangbe rangla; 9 ci kemakme nzwa, dede ci hemisüt; ketsaime nzwa dede, ainie ringbam; teikeherei dede teitset dima;✝ 10 suisiet teupung kebamme nzwa, dede suiyi bam muila; kegahme nzwa, dede mahei kekiee ge hekwalu; magede kegah nzwa, dede maleune bamla.

11 Corinth ga kebam sinamedung! Anui masang eh nnuide ranglia gaida, nah anui nlung nnuide ngkei mzaha pwa peubam. 12 Anui nnuide kaam ma, dede nnui lung ga kebam kecet dene nnuide kaam dida. 13 Cu nnuide henamedung dage nzwa Ih rangla—makeyi tei regwalu—nnui lung ngkei nza silu.

14 Nlumkemakme de ngngwa ngwanggai ncüt so. Dainzwa makesangbe nah hezai kegah ngngwa hekang lulai? Mede dainzwa kebaa kemui de ngngwa kekangbau lulai? 15 Nah Khrista Beliar* de ngngwa dai kesamdau pwa bamno? Mede kenlumme ge nlumkemakme de ngngwa daige kemacüt bam no? 16 Nah Tinggwang kerecaki mamiedung de ngngwa daipai samdau pwabam no? Kedanemene anui au ringkela Tinggwang kerecaki, Tinggwang rang kegai nzwa:

"Ih penui kakga lungh bam zie, nah penui kakga tet lazie;

nah Ih penui Tinggwang zie,

nah penui a minadung zie."✝

17 Ciziemne,

"Penui kakgade mpet dilu

nah tsam dilu," de eh Rampaube rangla,

"nah mcikemakbe deuso,"

"iciude Ih nnuide ngngwa luzie."✝

18 "Nah Ih nnui pei tei luzie,

nah nnui a napeime nah a napuime tei luzie,"✝

Ngkiengtube Rampaube rangla.