1 Anuikatei anuide twa dai zeu dereu ni? Anui mi kedame nzwa, nnui dage, mede nnui dade zierangketei laisiudung teu maisia ni? 2 Nnui au anui gu laisiu da, mina pelane ci nah peilu kera anui nlung gage rau teula, 3 nnui au anui kusüt kecu Khrista dade laisiu gelie kecu lia kegai ge, cide keraudui le rauma, dede ringkela Tinggwang Rabe le raulu, tangtsukwakdung gage ma, dede mina nlung gage.✝ 4 Nah anui Khrista gade Tinggwang da anui kenlum cikenzwa bam. 5 Anui anuikatei teilubui eh ma keheibe de anui dade gwanglie kecube ma. Meliene, anui teilu kebuibe au Tinggwang dade gwangla, 6 pa ne anuide peu samkakkelu kehecibe gwa teilukebui tei beula, cide hezai raukelube gade ma dede Rabe gade. Kedanemene hezai raukelube au ketsai teugwang beula, dede Kemci Rabe kering peula.✝

7 Ketsai teu gwang kela hezai, tangtsu gage rau kelu laisiu kaudung de, baaha gwang eh Israelme Moses zu kebaa de gahdi zeu liede pie gailak dicai, 8 Kemci Rabe ta au kendu kieeki zie meni? 9 Cine kemmau bata de ndu liecai, kesamsang zierang ta de daikenzwa gede kieeki zieno! 10 Kesang, aipau ria gade au nu piage ndusüt gwang kecude pe kendu gah dida, kedanemene pe kendu mtingki kecude ziemne.✝ 11 Kedanemene kaknage bamlu kela de kendu bam liecai, bammui kela de au kendu daikenzwa gede kieeki zieno.

12 Anui keregui cikenzwa ge kebamne, anui au kuusüt eh bata teila, 13 Moses pezu hepai le kezuidi kedibe nzwa ma, iciu eh Israelme gahdi kezeu kebaa de penli kecang pie melu kerane.✝ 14 Dede Israleme kecetdung au takdi. Kedanemene henai kecangde, samkakkelu kehegwa de kepeidau, cipau zu kehezuipai dene penui peusui haapwa bamdi eh penui kesangbe cilu meda. Nah kehezuipai cide au Khrista de kenlum rünne gade lwak lubui. 15 Dede henai kecangde, Moses zai kepei dau, kehezuipai de penui nlung ga haapwa bamla. 16 Dede mige Rampaube* da nreugwang keludau, kehezuipai de lwak mpet dila.✝ 17 Rampaube au Rabe, nah Rampaube Rabe kebam ga, suirang bam lula. 18 Cu anui pelane, mizu kezuidi mene, Rampaube kebaa kendu de ngau bam dida, nah anuide teintsam pwa pe rehi kebaa kendu diki kecu gage kai luda; kedanemene aide, Rampaube, pa au Rabe dade gwanglu.