1 Kedanemene anui lunghkebam kideu ga paiki de ngkap dicai, anui Tinggwang dade lunghlu kera kige kebam cibam, mina bale tei kemak tinggim ga kelungta kebam kige.✝ 2 Kedanemene aipau paiki gade anui mrabam, tinggim gade kegwang anui kide gumlu kera regui eh, 3 kedanemene anui cide teubahlu liecai, anui au ki kegahme ge nzwata dizie. 4 Anui aipau paiki ga kebam dau, anui keherei eh mra bamla, kedanemene anui kideube pumbe pütdi neu kecune ma, dede tinggim paini teu bahlu keneune, iciu eh ringkebam dene ketsaide ngamlu kerane. 5 Cu ma aide ziemne anuide mtei pwa kelabe de au Tinggwang, pe samdung teicang beu zielie anuide Rabe kai kebeube. 6 Ciziemne anui kekuu bam muila, anui pumteihbe ki ga kebamtane anui Rampaube dade mdei kela cibam liede, 7 kedanemene anui kengau gade mene kenlum gade tetla. 8 cu anui au kuubam, nah pumteihbe gade tetdi delwe Rampaube de ngngwa kilung ga bam neu dida. 9 Cine anui kilung ga bam liede mede tetdi de, pe suiyibe teila kera anui lungning da. 10 Kedanemene anui pelane de Khrista tutiak bam dwaga gwang zie, iciu eh hang gege kecu pumteihbe gade tei kedidung, keyi nah kesia de pa tei kedi rehi gade ngau luzie.✝

11 Ciziemne, Rampaube mie kehing pekie ci eh anui mide kecung lala. Dede Tinggwang ne anuide ci cangsiak bam, nah nnuide nnui lung gade anuide cibam kera Ih regui bam. 12 Anuikatei anui zierang nnui dage teidai ma, dede anui pelane nding gade nnuide peu hegielu kera zuiyi keyi pwapeu bam, iciu eh peu nnuide helungbe ziemne mene hegwazube ziemne hegie kelame de sam keli beulu kerane. 13 Kedanemene anui miedi liecai, cide au Tinggwang ziemne; anui mcing bamcai, cide au nnui ziemne. 14 Kedanemene Khrista keku ne anuide kezeu lala, aide nlumlu eh: Khrista pelane ziemne tsaigai beu; ciziemne pelane de teilung kehegwade gade tsai dida. 15 Nah pa pelane ziemne tsaibeu, ciu eh ring kebamme penuikatei penui ziemne ring bam si kelakne, dede penui ziemne tsai gai nah kwakcuh kelube ziemne. 16 Ciziemne, anui cu gade mige dede pumteih ria gade cetla meda. Anui pumteih ria gade Khrista de cetla liede, cu au anui pecu cikenzwa gage cet sila meda. 17 Ciziemne, keheibe de Khrista ga ladi cai, pa au mina keheci ge dida. Kehegwabe tetdi da. Ainie, kehecibe gwang bam dida.✝ 18 Nah ma aidungde pelane Tinggwang, Khrista gade anuide peu pecu ngngwa kezuyi dai kelube dade gwang. Nah pa ngngwa keyi ta keteide anuide peu da. 19 Cide au, Khrista gade Tinggwang kideube de peu pecu ngngwa kezuyi dailu, penui mau pei penuide mmau mene, nah anuide ngngwa keyi ketei samde nlumbeu.

20 Ciziemne, anui au Khrista sam teu kerangme dida, Tinggwang anui dade pe sam rangla. Khrista keleu tei anui nnui dade kie gaila: "Tinggwang de ngngwa kezuyi dailu lo!"✝ 21 Kemau cikemakbe de, anui ziemne Tinggwang pecu kemaube tei dida, iciu eh pecu ngngwa anuide Tinggwang masang de ga silu kerane.