1 Cu Ih, Paul, nnui dade kiebi gaila, Khrista henah nah nciep kecu gade—Ih nnuide ngngwa kebamdau henah nah nciep, dede Ih nnuide ngngwa bam kemakdau Ih kuu dila! 2 Ih kegwangdau a lung tei msia melu kerane Ih nnui dade kie gaila, midungge anuide pumteih zai gade heta tei lalie rang kelame dade Ih a zai siasüt zielu. 3 Kedanemene anui pumteihbe ga la liede, pumteihbe zai teu regi lama. 4 Anui reunet teu regi keladung au pumteihbe gu ma, dede kengkiengbam tei msialu kera nah kesamlim kecu dungde teu ngkaulu kera Tinggwang kengkieng, 5 nah ngang cu Tinggwang maci de renia kela leune de, nah anui lungcet leune teu Khrista samzai baang tei lula. 6 Nah nnui samzai teicang kelucai, anui samzai teikemakta leune de saja peu kera mtei luzie. 7 Nnui ma hegwazu piebam dida. Keheibe de pekatei pecu le Khrista gu lie lacai, peu pecu cetdai lulo, pa Khrista gu kecu nzwa anuide Khrista gu delu. 8 Kedanemene nnuide tei ngkap kedi be mene nnuide teucuh lu kerane Rampaube anuide kepeu kengkieng de ziemne Ih ngangla liede, Ih ngngam dilak. 9 Iciu eh Ih a laisiu dele nnuide keheu kera nzwadi melu kerane. 10 Kesang, nnui mikangge rang eh, "Paul laisiudung au ngkieng nah ci, dede pa anuide ngngwa kebam dau au mnei, nah pe marang au pemi gah." 11 Peu cikenzwame de anui nnuide ngngwa bam kemak dau laisiu ga rau kegai nzwa, anui gwang tei zielie kecu cilu maisia. 12 Midungge penuikatei penuide twa kelame dade anui hemaa tei ntsam mede anuide keu keda lama. Dede penuikatei penuide teu kedame de mdet, nah penuide keu kedame de teu keda kelame au magede cima. 13 Ciuliede anui teigai kelak nreu ngang dilak, dede Tinggwang anuide nlum kebeu ta gade zie, cide nnui dede si. 14 Anui katei anuide tei mdi lama, anui nnuida gwang kemak nzwa, kedanemene anui Khrista samliakeyi teu kemdei nnui taiga kecang gwang da. 15 Anui nganglu kebui nreu ngang di lama, mi kedame tadung ziemne, dede anui keregui au nnui kenlum mmi reureu de nnui kakga anui ta tei mdi silu kera deda, 16 ciu eh nnui swa kemdei cuikuidung ga samliakeyi de paulu kerane, nah mi kedame dage heta tei keludung ziemne ngang melu kerane.

17 Kesanglaisiu rangkela nzwa, "Dede peu ngang kelabe de Rampaube gade nganglu."✝

18 Kedanemene pekatei pecu twa kelabe de luulu lama, dede Tinggwang ne twa kelabe de luu lula.