1 Kedanemene Ih nnui da suisiet teu eh gwang dai kelak cetlu. 2 Kedanemene Ih nnui suisiet teidi liecai, Ih ne tei rejam kegaibe ne meliecai, caune a suiyi teibeu lulai? 3 Nah Ih aide nzwa pedwa raugai da, iciu eh Ih kegwang dau, a suiyi tei kerame ne a dage suisiet teigaidi melu kerane. Ih a suiyi kela ga nnuide nnui suiyi kera nnui pelane da a kenlum bam. 4 Kedanemene Ih nnui dage keherei cangsiak nah lungrei gade nah a miakdui lwasüt eh raugai, nnui suisiet tei kerane ma, dede Ih nnui pelane de daikenzwa gede hungbi kecu peu nnuide cilu kerane.

5 Dede magade mige mi kedage suisiet tei cai, pa cide a dage rünne suisiet teigai ma, dede kiege gade au nnui pelane dage teigai da.(Aide Ih kerang au pe dade a zai siasütdi neu kemakne.)✝ 6 Hemaabe be aipau de dage saja peu kegai swa simede yida, 7 cine, nnui pecu pemau gibeu nah pelung tei nciep beulu kerabe. Iciu meliecai, cikenzwame lungrei kekiee le kepui teidi zielu.✝ 8 Cine Ih nnuide pecu nnui keku kesangde mtei dwa gade keulia lulo kecung gaila. 9 Ih aipau kie de ziemne de laisiu raugai da, iciu eh nnui makeheibe gade samzai tei mi mebi kecu Ih nnuide cilu kerane. 10 Cu nnui keheibe de kehei leune mau gibeu cai, Ih de gibeu zie, kedanemene kesang Ih mimau gi kebeu de (Ih mimau kehei leune gibeu liecai), Ih nnui ziemne Khrista dwa gade gibeu dida, 11 iciu eh peu Satan* de anui reu ngkieng pwadi melu kerane. Kedanemene anui pe ciemdung cikemakbe melu.

12 Cu Ih Troas namdi ga gwang keludau, Rampaube gade acu Khrista samliakeyi de pau kera ziemne lampui ge ngkeibeu. 13 Ih a lung keherei sütdi, kedanemene Ih a sinabe Titus* de cikade ngaulu kemakne. Cine Ih penuide gidi eh Macedonia ga miedi.

14 Dede Tinggwang, Khrista gade anuide ngkieng kelu gage saulia mui kelabe de twa, nah heni leune ga pe maci ha kehengui de peu anui dade cila dida. 15 Kedanemene anui au Tinggwang da Khrista gu marim kehengui geda, kelikelumedung nah kapdi kerame kakga, 16 kesang, kapdi kerame ziemne au ketsai riem ge, dede ringlu kerame ziemne au marim kehengui kering ge. Cau ne aidungde teilu bui no? 17 Anui au gielu kerane mikedame nzwa Tinggwang sam zwatyei ma, iciu meliene Tinggwang anuide lang kegai nzwa, lungsang tei eh Khrista gade anui Tinggwang dwa marangla.