1 Ih hegie maisia, kemmi gede gah liede. Dede Rampaube dade kegwang marengeidung nah keuliakegaidung de ha Ih rangla zie. 2 Ih mige Khrista de kecime ge mmi kereiemdai dwa tinggim pekecumbe ga ngngwa nghang kedi ci, Ih pe pumteihbe simi mebi ci ma. Tinggwang cibam. 3 Nah Ih mina aipaude de—pe pumteihbe de simi, pe pumteihbe de si mebi Ih cima, Tinggwang cibam— 4 pecu kereluini ga ngngwa nghangdi nah pa rang cigai kelak samdung, mina depeu rangkelakbe siu. 5 Mina ai kenzwame ziemne Ih hegie zie. Dede Ih akatei a ziemne hegie lak, a kemneidung ziemne zielie maige. 6 Ih hegie neula liede, Ih kemieme ge tei dilak, kedanemene Ih kesangbe rang zielu. Dede Ih ma aidungde tei meda, ciu eh migede ada de pa kengaude mede kesiude gwale mning mmiki melu kerane. 7 Nah iciu eh keuliakegai miswakegah de ziemne Ih a zaidi melu kerane, a pumteih ga hetu ge kai pwabam, satan samgwame ge, Ih a zaidi melu kerane pa acu teikeherei kerane. 8 Ih piacum Rampaube dade cide peu a dade tetdi lulo a nggia kie. 9 Dede pa a dage ranggai, "A ngaugia de nang teumai kesia pelane da, kedanemene kemnei gade a kengkieng tei mmi canglu lalu." Cine Ih a kemnei de ziemne a suiyi eh ngangki zie, iciu eh Khrista kengkieng de a da bamlu kerane. 10 Ciziemne Ih Khrista ziemne kemnei ga, kii kegaidung ga, kehereidung ga, teikeherei nah suisiet dau kecu ga Ih nnung bam. Kedanemene Ih mnei kebam dau, Ih ngkieng kebamne.

11 Ih kemieme ge dida! Nnui ne acu aide tei kera ketang, nnui ne acu twa kerabe nsam liede. Kedanemene Ih magede melie de cipau "kemlang-langkegaimedung," swade Ih de sia swama.✝ 12 Langkegaime ge kesang rehidung de helung tie eh nnui kakga teilia gaida, marehidung nah miswakegahdung nah mimakecang batadung tei eh. 13 Dai rehi gade ngqwa kedadung de swade nnuide be pie msiaki no, Ih nnuida gwang eh nnuide tei nrütdi kemak gwale? A mau aide gibeu lo! 14 Ainie! Ih pia pe kecumbe nnuida gwang kera mtei luda, nah Ih nnuide tei nrüt dilak. Kedanemene Ih nnui gudung peei ma, dede nnuide peeila. Kedanemene henamedung pe penui puipei ziemne ma hekwa kerabe ma, dede penui puipei pe name ziemne ma hekwala. 15 Cu au Ih a suiyisüt eh mpet peuzie, nah nnui rabedung ziemne mpet cangsiak beuzie. Ih nnuide kuki cai, acu be ku cam kerabe ni? 16 Dede cinzwa liede, Ih nnuide teinrüt dima, dede midungge Ih heciem tei eh nnuide cwadi lie rangla. 17 Ih nnui dage mina langkegai gade nnui ziuyi keuteu dini? 18 Ih Titus de nnui da gwang kerane kecunggai, nah pe dage sinabe keda gede langgai. Titus nnui dade pe ziuyi peei ni? Titus anai lungge tei eh tet meni? Anai pikie gega ngngwa tet meni? 19 Anui nnui dade anui nzeu rang lalie nnui cet lani? Anui Tinggwang dwade Khrista zi teu eh rangbam, dede ma aidung pelane, kehungmedung, nnuide teingkieng lu kerane. 20 Kedanemene Ih kegwang dau Ih nnuide regui kela nzwa nah nnui acu regui kela nzwa ngaulu tadi kera Ih hing bamlie. Kesamlim kecu, miriak kecu, rata, kengaurau, mide rang kemsia, kemta sam kerang, ngang kecu, nah kehebwak bamdi lubui. 21 Ih gwangdai lude, nnui dwade a Tinggwang acu tei henahbeu lubui, nah mina kekiee ge kemau tei kedime nah mcikemak nah kemmha ta nah pumteih lungningbe tei kela gade penui lung nreulu kemakme de ngau eh Ih asui sia dizie.