1 Ih mie nakke liede nnuide peu acu ngngwa lialu neu bam, dede kesang nnui acu ngngwa lia bamda! 2 Kedanemene Ih nnui ziemne rabe lungriak teu eh ariak lala, kedanemene Ih nnuide pwa mipei hangge dage tei mmeu beukera sampet dida, nnuide relei kemci ge nzwa Khrista de peulu kerane. 3 Dede heneibe pe ningcing yi delwe Eve de cwakedi nzwa, nnui lungcet lungsang nah kemci Khrista da kebam de kemau gage teugaidi kera Ih hing bam.✝ 4 Kedanemene mige gwang anui pe zierang teila kemak keda Jisu zierang teicai, mede nnui luu kelu rabe kemak kedage de nnui luulu cai, mede nnui luu kelu samlia kemak kedage nnui luulu cai, nnui cide samzai teisüt la dida! 5 Ih de, "kemlang-langkegaimedung*" swade heleidi mezing lie Ih cet. 6 Ih sam kerang ga keteulu meliede, Ih maci lam au keteulu kemakme ma. Dede keheibe gade anui ma pelane ga nnuide peu aide ci mci gaida. 7 Ih Tinggwang samliakeyi de nnui dage pemi tei mene zierang tei kegai ziemne, nah Ih nnuide teucuhlu kerane acu tei henah kegaine Ih kemau teidi dini? 8 Nnui dage heta tei kerane Ih ngqwa kedadung hema tui eh penui dade hema luulu. 9 Ih nnuide ngngwa kebam dau, Ih teu maisia dide, Ih migede de tei naang dima. Kedanemene sinamedung Macedonia gade kegwangme Ih teumai kesia leune pwapeu. Ih nnuide tei nnangdi melu kerane mapelane gade Ih akatei acu kezeula, nah Ih cide tei eh lazie. 10 Khrista masangde a dala, iciu eh Ih hegie kela aide Achaia deuceu ga nlei tadi melu kerane. 11 Daitei? Ih nnuide hung kemak ziemne ni? Ih hung kela Tinggwang cibam! 12 Nah Ih tei kelade Ih tei jüja lazie, iciu eh penui ngang eh anui nzwa teila delie lu kerane ziuyi keyi pei kelame ziuyi de Ih keuteu dilu kerane. 13 Kedanemene mina cikenzwame au langkegai kenretmedung, kecwa ta tei kelame, penuikatei penuide Khrista ne langkegaime rehi teipung eh lala. 14 Miswakegah ge dema, kedanemene Satan kecangde pekatei pecu le kebaabe tinggimgwame rehi teipung eh lalu. 15 Cine Satan kilamedung makesang kilamedung rehi teipung lade cide miswakegah ge dema. Kekamle penui batadung nzwa penui ziehi ngau zie.

16 Ih rang daila: peu migede de Ih kemieme gelie kecu cet so. Dede nnui ciciu cet lacai, acu kemieme ge nzwa ngngwa lulo, iciude Ih de manage hegie luzie. 17 Ih rang kebam de, Ih Rampaube ne rang kera nzwa rang ma, dede kemieme ge nzwa hegiekela zai aide gade. 18 Mi kekiee ge pumteih lungningbe gade hegie kela nzwa, Ih de hegie zie. 19 Cine nnui, mriak kecume, nnui suingga eh kemieme de ngngwa lialu. 20 Kedanemene mige nnuide kila tei leide, mede mige nnuide ngkapdi liede, mede mige nnuide masipei meliede, mede mige pekatei pecu twala liede, mede mige nnui zu kepeu liede, nnui cide ngngwa lialu. 21 Anui cide ziemne mneisüt lie kecu rang kera Ih ngngam lie! Ciuliede, mikeheibe de ma keheibe ga kuu eh hegie lacai, Ih kemieme ge nzwa rangla, Ih de cide ziemne hegiela. 22 Penui Hebrewme ni? Ih deda. Penui Israelme ni? Ih deda. Penui Abraham leuhme ni? Ih deda. 23 Penui Khrista kilamedung ni? (Ih kemieme nzwa rangbam dida.) Ih au yiki kecume ge: heta tei ncokki, hebaang tei kieeki, peikap gai kelak ge dap, tsailu kebui kengyi pia kekieege dau. 24 Jewme muiteume ne acu teigeuria le "camreiehekui" kecu pia mengei dap."* 25 Piacum acu hegeutie le dap. Piage acu tangtsu le sam. Piacum lim nlim kecu Ih dau. Tingmui ziu ge nah tingba zie ge Ih dui kedi ga ladi. 26 Ih hebeuh kekiee ketei ga kengngi gala, hereuki gade, sütketyeime dade, a ramme dade, Gentileme dade, namdi gade, hetaideu gade, jaaidi gade, nah masangkemak kenlumme dade kengngi gala. 27 Ih bata kehung nah keherei daugwang, tingmui zip kemak ting kekieege dau, mzeu nah hereu, pia kekieege mmwang, ngkung nah paini teu kemak daugwang. 28 Kedabedung reude, tingnai ramsangne ngqwadung pelane ziemne a da lungnei le pui bamla. 29 Mige mnei dige, Ih de mnei dila; mige kemau tei dige, Ih lungrei le pui dila. 30 Ih hegie maisia cai, a kemnei keulia kelabedung ziemne Ih hegie zie. 31 Tinggwang nah Rampaube Jisu Pei, hetwa pung mui kelabe, Ih au nretla kemak cibam. 32 Damascus ga, hegwangpei Aretas kangga deuceudibe acu tui kerane namdi de kwalu. 33 Dede kirie ga hebaki ge gade acu marak ge gage pwa nghung beu, nah Ih pe ba gade paklu.