1 Judah deu gwangpei Jehoiakim hegwang tei kelu mmi pe kecumbe kum, Babylonme gwangpei Nebuchadnezzar Jerusalem ga gwang nah namdi de twagwa lu mania la kegwang pelane tei mtak ti lu kerane. 2 Rampaube Nebuchadnezzar de Judahme gu hegwangpei Jehoiakim reu ngkiengkelu peu, nah pa pecu Tinggwang ki gade kemci niadung de peu. Pa penuide Babylonme deu gage ngngwa gwanglu, pe tinggwang ki gage, nah pa kemci niadung de pe rabe mabamdung gage kailu.✝ 3 Nebuchadnezzar pekang ga ditube Ashpenaz dage Israelme kangge hegwangme kelak gade de nah kelak keyidung gade de ngngwa peda gwanglo aja kaibeu, 4 rehangme lunghmau kemakme, hezu keyime, ningcing kemriakme, maci nah kecikecet le kepui tei kebamme, nah hegwangki ga heta teilu kebuime. Pecu penui dage Babylonme gu hekwa helet ledeubeu kera rangbeu. 5 Hegwangpei penui ziemne tingba ramsang ne tyei kera penuide hegwangpei tyei kela taktyeidung de nah pa sak kela zau pwa peu la. Rehangme aidungde de tingkum kecum ziemne heta ledeu nah reli kera peu, nah cipau cai, penui hegwangpei gwa tei kerane. 6 Aipaumedung kakgade Daniel, Hananiah, Mishael, nah Azariah, aidung de Judah leuh gade kedet kelume 7 Ashpenaz penuide hezi msiakpeu: Pa Daniel de Belteshazzar qulu, Hananiah de Shadrach qulu, Mishael de Meshach qulu, nah Azariah de Abednego qulu.

8 Dede Daniel au pe lungcet gade pekatei pecu hegwangpei taktyeidung mede pa sak kela zau lepwa pecu renet zai gade mci kemak tei lak lie cetlu. Cine pa Ashpenaz dade pekatei pecu tei hera di me kera aja kiegai. 9 Cidau Tinggwang ne Ashpenaz de helung teibeu eh Daniel dage suiyi nah kehung nah herüt peda bam kera peu. 10 Kedibe Daniel dage rangdi, "Ih a mpaube hegwangpei de hing. Pa nang taktyei dai tyei nah sak maisia bi acu aja peu pwabam. Daitei eh pa rehangme n heume kak gade ncu lepwa ngausia di lulai? N ziemne hegwangpei a peu dangdi lubui bam." 11 Cine kedibe ne Daniel, Hananiah, Mishael nah Azariah de pie rengei kera nlum kegai Melzar de Daniel kempau. 12 Pa rangdi, "Ziangrei ge ziemne anuide, n kilamedung de kedak pielo. Anuide tyei kera ginei nah dui saklu kera rünne peulo. 13 Iciu eh anuide rehangme hegwangpei taktyei tyei kebamme de keu heda pie lulo, delwe nnui kengau rehi nzwa eh anui dage nnui ta teigai lulo."

14 Cine hegwa keteibe pecu ngngwa suizwa lu, nah penuide ziangrei ting ge kedak pie. 15 Ziangrei cang kedi benai, rehangmedung hegwangpei taktyei keyi leu tyei kebamme swade penui yi ncang, nah penui lui de yikidi. 16 Cine hegwa keteibe hegwangpei taktyei keyidung nah zau penui dade keu nzia di delwe penui de ginei rünne peu gai. 17 Rehang mdai aidungde dage, Tinggwang ne maci nah hekwahelet cilu kela helung ningcing maci leune peu, nah Daniel marengeidung nah hemangdung leune cilu bamdi.✝ 18 Hegwangpei ne peting riet kenzeu de cangdi eh penuide ngngwa gwang kera ting di ge, kedibe penuide ngngwa Nabuchadnezzar dwa gwanglu. 19 Hegwangpei penuide kempau gai, nah hemaabe kakgade migede Daniel, Hananiah, Mishael, nah Azariah penui nzwa heda cang gailakdi. Penui hegwangpei dwa ga sap eh pe gwatei kera mteilu. 20 Ningcing maci teu hegwangpei penuide ma keteu kegai leune gade, pe hegwangram ga kerekamedung pelane nah ketsaime de mpau lie rang kelamedung swade penui pia kerei ge yiki lie kecu penuide ngaulu. 21 Daniel cika hegwangpei Cyrus mmi raitube hegwang tei kecu kecang hegwatei bam.