1 Hegwangpei Nebuchadnezzar hezai aide langpwa kideu ga lungh kebam mina leune, heleuh leune, nah hekwahelet leune dage kaigai: Peu nnui da kezuyibe bam kelube teilo. 2 Marengeidung nah miswakegah batadung Hutube Tinggwang a dage tei kegai Ih nnui dage ranglia kera Ih a sui luda.✝

3 Pegu marengeidung dai kenzwa gede di no,

nah pegu miswakegah batadung dai kenzwa gede ngkieng no!

Pe hegwangram au madaude siadi kelak hegwangram,

nah pe kedi kengkieng ceheu ket cai ket bam mui lala."

4 Ih, Nebuchadnezzar, a ki ga Ih a suiyi eh lungh bam, nah Ih kepui ngau eh a hegwangki ga kehega eh bam. 5 Dede zeuziu ge hemang ge Ih mmi ge acu tei ngngi süt. Ih zeu kebam dau, mamiedung nah marengeidung Ih a mang gade ngaukegai acu tei kebwak sütdi. 6 Cine Babylon ga pe maci kebamme pelane de a dwa ga ngngwa gwang lo Ih hezai kaigai iciu eh penui a mang pekie cide a dage ranglia beulu kerane. 7 Pecai kerekame, ketsaime de kempau lie rang kelame, ningcing kemriakme, hekei hegi ha kecime gwang. Ih penuide a mang ranglia beu, dede penui a dage hemang kie cide ranglia beu luma. 8 Daniel a dwa ga gwanglu, pe zi a rabe zi teu eh Belteshazzar msiaklu, nah pe da kemci rabedung la, nah Ih pecu a mang paulia. 9 Ih pe dage ranggai, "Belteshazzar, kerekame kakte ditubo, n da kemci tinggwangdung kela Ih ci nah macet kecuk gede nziemne au pa zu di ma. Ih a mang dai ngau bi nah pekie cide dai bi kecu a dage ranglia beu. 10 Ih a zeu ga zip kebam dau ma aidungde a mang gade kengaubedung da: Ih piegai, nah kideu sumga tsingbang ge bam, nah pehu cide hu süt. 11 Tsingbang cide lungh cuh nah ngkieng süt cuhdi. Petün tinggim hangcang di, nah cide kideu penli kecang de ngaudi. 12 Cide penei hezuyi swet bam, petsi bui puiting bam, nah cika mileune ziemne taktyei bam. Renaam kaune pekang ga msiukelu ngaulu, nah nruinedung pekiakdung ga pecit teilu. Kering kaunedung pelane de cide gade matyei lu.✝ 13 Ih zeu kebam dau a mang gade ngau, nah kemci samgwame ge tinggim gade nghung. 14 Pa sahbak eh rangdi, ‘Tsingbang be bi ngkaudi nah pe kiakdung bi kecai di, pe neidung riodi, nah pe tsi tei zangdi. Makaunedung de peu pe kang gade pak dilu nah nruinedung de peu pe kiakdung gade limtet dilu. 15 Pe tsingmui pe mah reilwe kideu gage pütdiak gailu, cide hegeu nah hetageu rianggoi gele kangdi, luh ga cehei kenciep sum gage. Peu cide kideu ga mabang kakga makaune de ngngwa lungh bam di. 16 Peu pe lungcet mina lungcet gade tei kelidi, nah makaune lungcet pecu pwapeu lu cide tingkum hena kah gwang kemaktane. 17 Hezai aide samgwabe kai kebeu gade tiak luda. Hetiak aide kemcibe ne teilu da, iciu eh ring kebammedung Hutube Tinggwang ne mina gwangramdung reu hegwang lie kecu cilu kerane nah pa ne hegwang cide pesuibe de peupwa penui reu gage kai beula, henahtume dage kecang de.’ 18 Ih, Hegwangpei Nebuchadnezzar, hemang aide mmi da. Cu nang, Belteshazzar, pekie cide rangpwa a da lialo, kedanemene a hegwangram ga maci kebamme migede pekie rangpwa a dage lialu kera gah da. Dede nang cide teilubui bam, kedanemene kemci tinggwang rabe n da kelane."

19 Ge Daniel, pezi Belteshazzar lie kelabe de, tingkakge pesui siasüt bamdi, nah pe macet pecu keheudi. Hegwangpei rangdi, "Belteshazzar, hemang aide le pwane mede pekie cide le pwane ncu keheu diso." Belteshazzar pesam keligai, "A mpaubo, peu hemang cide ncu ngaurau kelame ziemne kelube teilo; nah pekie cide peu n ngauraume ziemne kelube teilo. 20 Tsingbang nang kengau de, lungcuh ngkieng kelude, nah petün tinggim hangcang kebam de, nah cide kideu penli de ngau kebam de, 21 penei hezu keyi de, nah petsi kepui tei kebam de, iciu eh cide ga mileune ziemne taktyei kebam, nah pekang ga luh ga makaunedung msiu kebam de, nah tinggimdung ga nruinedung lungh kebam de, 22 tsingbang aide nang delie, hegwangpei, nang lungcuh ngkieng süt kebambe de. N kendu mmi pwa tinggimdung hangcang dida, nah n kengkieng kideu penli ga miecang bam dida. 23 Nang ngauda, hegwangpei, kemci samgwame tinggim gade nghung lwe rang eh, ‘Tsingbang be bi ngkaudi nah cide ngkapti, dede pe mah reei kelu tsingmui be kideu gage pütdi lu, iciu eh cide hegeu nah hetageu le kang dilu, luh ga cehei kenciep sum gage. Peu cide tinggim gade hezin ne tei hwalu. Peu cide luh ga renaam kaunedung de ngngwa lungh bamdi tingkum hena kah gwang kemaktane.’ 24 Hegwangpei, pekie au aide da. Aide Hutube Tinggwang ne hezai tiak teikelu n dage gwangcang zeu da, hegwangpei, a mpaubo. 25 Mina kak gade ncu gwagi dizie, nah nang luhdung ga renaam kaunedung de ngngwa lungh dizie. Hetumseu nzwa nang cehei tyei dizie, nah tinggimdung gade hezin le nang hua dizie, nah tingkum hena kahgwang dizie, iciu eh nang Hutube Tinggwang de pa ne mina gu hegwangramdung reu hegwang tei lalie kecu, nah pa ne pesui kelame de cide pwapeu lalie kecu ci eh pecu hetwa peu lu kemaktane. 26 Tsingbang mah cide kaidiak kera aja kai kebeu nzwa, nang tinggimdung ne hegwang teila lie kecu cilu de n hegwangram n da cailigwang dizie. 27 Ciziemne, hegwangpei, nang a keledeu sam luulu lo. Kemau teisi talu nah dai be mzui labi kecube teilo. Ma petau kemakdung gade nang nreu caililu iciu eh kegahme de ngaungia lu, iciu de nang lungyi luzie.

28 Ma aidung pelane Hegwangpei Nebuchadnezzar dage teigwang di. 29 Aipau cai kei kereiekena dige Babylon hegwangki reu ga pa tet nlwet mpet bam, 30 nah pa rangdi, "Aide Babylon namdi kedi de meni, Ih ne tei kelu a hegwangki, a hegwangbam kendu de ziemne?" 31 Samdung pe muileu ne rangcang gailak kebam dau, tinggim gade sam ge gwang: "Hegwangpei Nebuchadnezzar, hegwangram aide n dade keuteu di delie rang mdu gaila. 32 Mina kak gade ncu gwagi dizie da, nah n ki au luhdung ga renaam kaunedung kebam ga zie. Ncu peu hetumseu nzwa cehei tyei kera tei dizie. Tingkum hena kahgwang dizie nang Hutube Tinggwang de pa ne mina hegwangramdung reu hegwang tei lalie kecu nah pa ne pesui kelame de cide pwapeu lalie kecu ci eh pecu hetwa peu lu kemaktane." 33 Tiak kelusam aide Nebuchadnezzar dage zette eh gwangcang di. Pecu mina kak gade gwagi di. Pa hetumseu nzwa cehei tyei di. Nah pepaau tinggimdung gade hezim le hwadi. Pe peutam tiepwa helie hesiumai tiege di, nah pe nceukwadung nruinedung nceukwa nzwadi.

34 Cipau mmi hena de cang gwang dige Ih, Nebuchadnezzar, tinggim lege a miak ngang cuhgai, nah a peusui acu peu cailigai.

"Ih Hutube Tinggwang de hetwa peugai,

nah Ih herüt nah kendu kelungta ring kelabe de peu.

Kedanemene pe hegwangbam au madaude siadi kelakpe gwangbam,

nah pe hegwangram ceheudung gade ceheudung pelane ga bammui la.

35 Pa au kideu ga lungh kebam leune de de magede kemak nzwa cetla;

pa tinggim ga reugwame kak gade nah kideu ga lungh kembamme kak gade

pesui kelube tei dila.

Migede pecu kam gailak mede pecu renia gailak. Migede pe dage, ‘Daitei nang ainzwa tei zeuno rang gailak?’"

36 A da a peusui cailigwang kelu dau, a kengkieng nah a kebaa a da gwang dailu a hegwangram kendu ziemne. A kangga makecime nah kedime acu peei eh ngngwa dailu. A hegwangbam ga acu ngngwa gwang dailu, nah kendu kedi kieegwa kecu acu peusi. 37 Cu Ih, Nebuchadnezzar, tinggim ga Hegwangpei de hetwa kehu, nah herüt peula, kedanemene pa tei kelade petau, nah pe zai mzui. Pa ngang eh tet kelame de tei henadi lubui.✝