1 Belshazzar hegwang tei kebam ting dau, pa taktyei ngyi kedi ge pe kangga kebam kedime cang ge de ngngwa tyei, nah pa penui mina cang ge dwa gade zau sak. 2 Belshazzar zau nsi kegai dau, pa kecak mede rangkanggeu piakdung nah hekwakdung pe pei Nebuchadnezzar ne Jerusalem kerecaki gade keumpet keludung pwa gwanglo eh aja kaigai, iciu eh pa, pe kangga kedimedung, nah pe naudung nah pe nauseupuidung depeu cide pwalwe saklu kerane. 3 Jerusalem ga Tinggwang ki, kerecaki gade keuteu mpet kelu kecak kwakpiakdung kilamedung pwa gwangbeu. Hegwangpei, pe kangga kedimedung, nah pe naumedung nah pe nauseupuidung cidungde gade pwa sak. 4 Penui zau sak eh kecak, rangkanggeu, hetageu, hegeu, tsing, nah tangtsudung le tei kelu penui rabedung de hetwa peu bamdi.*

5 Cipau tingsiak dau mina ba zurangdung ge mitaubung bam dwaga mimiakngau tei eh ngau nah hegwang ki tangdeu ga marau di. Heba cide marau kezeu hegwangpei ngau. 6 Iciu eh hegwangpei pezu tsamdi nah pe kecet pecu keheudi; pepi peba pecu ngha beu tadi, nah pe ngkok mbeudi. 7 Hegwangpei sahbak eh ketsaime de kempau lu kela rang kelame de, makecime de, hekei hegi ha kecime de, ngngwa gwang lo aja kaigai. Babylon ga makecime lie keladung dage hegwangpei rangdi, "Kaurau aide nah pekie aide dai bi kecu ranglia kelume de peu gieremang paini teuzie nah kecak teiria peu pecu mtei zie. Cipaube de peu hegwangram ga kengkieng keteu ditube pekecumbe tei zie." 8 Cidau hegwangpei kangga kebam makecime lie kela leunedung gwang, dede penui migede cide pei de luma nah pekie rangpwa hegwangpei dage de lia lu tadi. 9 Ge Hegwangpei Belshazzar pe lung keherei sütdi nah pe zu tsamceu di. Pe kangga kebammedung de penui swagah di.

10 Cidau, hegwangpui taktyei ngyi kibung ga hegwangpei nah pe kangga kedime marang kebam siu kedine gwang. Hegwangpui rangdi, "Hegwangpei, kelungta lungh lalo! Peu n lungsuidung le ncu kebwak di so. N lung keherei eh sia di helo. 11 N hegwangram ga peda kemci tinggwang rabe kela kauge bam. N pei tingdau, kebaa nah macilu kela maci rabedung maci pe da kebam ngauda. Hegwangpei Nebuchadnezzar, n pei hegwangpei pecu le pwa kerekamedung, nah ketsaime de resiu lie rangkela medung, makecimedung, nah hekei hegi ha kecimedung reu ditube tei beuda. 12 Mlangsüt kecu rabe, maci, kecikecet, hemang kie rangswalu kela, samregwadung ranglialu kela, nah ma kehebwak tei mduilu kelabe, Daniel, hegwangpei ne pezi Belteshazzar msiakpwa kenzeu mina aipaude da aikenzwa luilung keyi bam. Cu Daniel de qugai nah pa dai rauzeu bi kecu pekie n dage ranglia beu luzie."

13 Iciu eh Daniel de hegwangpei dwa ga ngngwa gwanglu. Hegwangpei pe dage rangdi, "Nang Daniel, apei hegwangpei ne Judah gade ngngwa mpet kelu langgi kedi Judahme hangge de deni? 14 Ih n ha siu luda, iciu eh rabedung rabe n da lalie kecu, nah kebaa nah kecikecet nah maci n da kela cilu da. 15 Cu makecime lie kelame nah ketsaime de resiu lie rangkela medung de rau kenzeu aide pei kera nah a dage pekie ranglia beu kera ngngwa a dwa gwang da, dede penui cide pekie ranglia lu tadi. 16 Nang ma kiedung rangswa lia lu kela nah ma kenaangdung teimdui lu kela ha Ih siu da. Cu nang magade rau kenzeu de peilia beu nah pekie a dage ranglia beu liecai, peu ncu paini gieremang ge kaizie nah kecak teiria ngngwang gage mteizie, nah ncu peu hegwangram ga kengkieng hutube pekecumbe peu teizie."

17 Ge Daniel Hegwangpei dage sam keligai, "Peu n mapeudung n katei nziemne kelube tei lulo, nah n ziehi mi kedage da peu kelube tei lulo. Iciu liede, Ih rau kenzeu de n ziemne pei beuzie nah pekie cide ranglia beuzie. 18 Hegwangpei, n ziemne au, Hutube Tinggwang n pei Nebuchadnezzar de hegwangram, kedi, herüt nah kengkieng peu. 19 Pe kendu kedi Tinggwang peu kegaine, mina pelane, heleuhdung, hekwaheletdung mbeu eh pecu hingdi. Pa peu tsaidi keneume de teitsetdi la, nah pa peu ring eh bam keneume de peu ringlu la. Pa teucuh keneume de teucuh beula, nah tei hena keneume de tei hena beula. 20 Dede pa pelung hung nah ngang nah pe lung tak kedi dau, iciu eh pe bata teitwa teimau kedi dau, pecu pe hegwangbam gade keu nghungdi nah pe kengkieng de keu teudi. 21 Pecu mina kak gade gwa gidi, pe peusui makaune ge nzwadi, nah pa renaam ga gadadung de ngngwa lunghdi. Hetumseu nzwa pa cehei tyei. Tinggimdung gade hezin mie pepaau zim hwa, iciu eh pa Hutube Tinggwang ne hegwangram leune reu hegwang tei nah pa ne cide peu keneume leune reu ge kaibeu lie kecu cilu kemaktane. 22 Nang pe napei, Belshazzar, nang ma aidung pelane cibam dede nang n mlung henah luma. 23 Nang ngkatei ncu teu cuh pwa tinggim Tinggwang de renia la. Pe ki gade penui n da hekwakpiakdung pwagwang iciu eh nang, n kang ga kedimedung, n naudung nah n nauseupuidung cidung de pwa zau sak, nah nang rangkanggeu nah kecak, hetageu, hegeu, tsing, nah tangtsu le tei kelu mamiedung, mamie mangau la kemak, masiu la kemak, mede magede cila kemak miedung de twa bam dida. Nang Tinggwang peu ncu ring kebam nah n lampui pelane ci kelabe de rüt ma.* 24 Iciu eh Tinggwang heba ge pa kebam gade langgai eh kerau aide tei gwanglu.

25 Rau kenzeu de ainzwa da: ‘Mene, Mene, Tekel, Pharsin.’ 26 Pekie ainzwa da: ‘Mene,’ ‘Tinggwang n hegwangram tingbazie pei dida nah cide penli gage keugwang dida.’ 27 ‘Tekel,’ ‘n cu riangteukwak gage teu eh pie dida nah nang cangkemak ngau luda.’ 28 ‘Pharsin,’ ‘n hegwangram mzipwa Medeme nah Persiame de peu dida.’"

29 Ge Belshazzar aja kaigai, nah penui Daniel de gieremang paini kaibeu. Kecak teiria pe ngwang gage gwakbeu, nah hegwangpei pe hegwangram ga pecu lepwa ngkiengtu pe kecumbe teikelu rang mdugai. 30 Cipau ziu Babylonme gu hegwangpei Belshazzar de teitsetdi, 31 nah Medeme pei Darius pa mmi riakherokekena dige Babylon hegwangram cide luulu.