1 Hegwangpei Cyrus Persia ga hegwang teikelu mmi pe kecumbe kum, Daniel, Belteshazzar lie de qu kelabe da sam ge keulia. Sam aide kesang. Cide hereu reudi ketei ha ge. Daniel sam de cilu pa marengei kengau gade. 2 Cipau tingdau Ih, Daniel mtakkak kecum hei eh hap bamdi. 3 Ih taktyei keyi tyei ma, Ih hetei tyei ma. Ih zau sak ma, nah mtakkak kecum de cangdi kemaktane akatei acu maca le keniak ma. 4 Kei raitube kei, zie ngkaiemdai benai, Ih kereuki kedi (cide Tigris) kung ga kela dau, 5 Ih ngang cuh piegai nah mige langcimpai bah eh kebam ngau, nah Uphaz le teikelu kecak kemci kiakang pe kia gage kai teula.✝ 6 Pepum au topaz nzwa, nah pezu au tingkehepik nzwa. Pe miak kena au heukebam mitaubung nzwa, nah pe badung nah pe pidung au hetageu teu mdui kelube nzwa. Pa kerang kwadung au hemaa kedi kwa ge nzwa.✝ 7 Ih, Daniel, akatei rünne marengei ngau, kedanemene acu ngngwa kelamedung marengei ngau ma. Dede, kehing kedi ge penui da gwang, nah penui mbai kera pakdi. 8 Cine Ih akatei di nah marengei kedi aide ngau. Kengkieng a da bam tadi; a reba zu de lipwa ngkap kedi zu ge di, nah a da kengkieng ba bam sita di. 9 Ge Ih pesamdung siu, nah Ih cide kingnei kebamdau, Ih zip zing eh hangdeu ga kaumiedi.

10 Heba ge acu tunggai, nah cide ne a ngkokpui nah a badeu tei mbeudi. 11 Tinggimgwame a dage rangdi, "O Daniel, kemlang minabo, Ih n dage rang kebam samde ci lulo. Cuh saplu, kedanemene acu lang pwa n dage kai gaida." Pa sam cide a da rang kegai dau, Ih mbeu eh cuhlu. 12 Ge pa a dage rangdi, "Ngngi helo, Daniel. Raitu benai gade nang cilu kebui n sam pet kegai dau nah n Tinggwang dwa gage nkatei ncu tei hena kegai dau, n samdung kingnei luda, nah n sam petkegai ziemne Ih n da gwang lada.✝ 13 Persia hegwangram gu hegwangpei acu renia, nah acu Persia gwangpeime de ncüt delwe cikage zie ngkaieket acu kainzeu. Dede Michael, hegwang napei, a da gwang eh acu ngha beu. 14 Cu tingbazie kekamle n minadung dage daitei gwang ziebi kecu peu ncu cilu kerane Ih ngha kera gwangla. Kedanemene marengei cide au gwang kera tingbazie kekambe ziemne." 15 Pa sam aidungde teu acu mpau kebam dau, Ih made rang gailak di eh keumie hangdeu piedi. 16 Mige mina nabedung kenzwa ge a muileu tunggai, nah iciu eh Ih a mui ngkei eh a dwaga kesapbe dage ranggai, "A mpaubo, Ih marengei de ziemne Ih keherei dida; Ih a da kengkieng gede bamsi meda.✝ 17 Ih n kilabe. Ih daizwa delwe a mpaube de ngngwa mpau lulai? Kedanemene Ih kengkieng gede a da gah da, nah a cuingi gede a da bamsi meda."

18 Iciuge mige mina rehi kenzwabe ge acu tunggai nah acu tei ngkieng gai. 19 Pa rangdi, "Ngngi helo, mina pemi kehungbo. Kezuyibe peu n da bam kelube teilo! Ngkienglu cu au, ngkienglu!" Pa a dage marang kebam dau, Ih ngkieng dailu. Ih ranggai, "Peu a mpaube de marang lo, kedanemene nang acu tei ngkiengbeu delu."✝ 20 Pa rangdi, "Ih daitei eh n da gwang labi kecu nang ci mi? Ih zette eh Persia ga hegwang napei de regi kera caili dizie da. Ih tetdi de Greeceme hegwangpei gwang zie. 21 Dede Kesang Laisiukwak gage rauteu kelade Ih n dage ranglia zie. Tinggimgwame Michael rünne gwale, mi gede pekatei pe kengkieng keulia eh acu ngngwa penuide renia kera gah."