1 Hegwangpei Nebuchadnezzar kecak le mamie teilu pehu cubit riakherok nah pedi cubit herok kecu ge. Pa cide Babylon deuceu lungga Dura Langkie gage pwacuh lu. 2 Iciu eh Nebuchadnezzar samdung langpwa deuceu ga deuceudi medung, cuikui ga deuceudi medung, deuketna deuceudi medung, nah cika ge si eh hezai kecimedung, mabam keteumedung, tutiakmedung, hetu-hera tei kelamedung, nah deuceu ga kedime leune de gwang ncüt kera qugai mamie tei kenzeu de ga gwang kerane. 3 Cine deuceu ga deuceudi medung, cuikui ga deuceudi medung, deuketna deuceudi medung, nah cika ge si eh hezai kecimedung, mabam keteumedung, tutiakmedung, hetu-hera tei kelamedung, nah deuceu ga kedime leune gwang eh Nebuchadnezzar mamie pwacuh kelude tei kemci ga gwang ngkwalu. Penui cipau dwaga saplu. 4 Sam sah kelame ge sahbak eh sahgai, "Nnui dage aja aide kaila, minadung, heleuhdung, hekwahelet leunedung, 5 nnui makii, terwaine, zither, lyre, harp, nah telui, nah leinet leune kwa kegai kwa siu keludau, nnui keumie delwe hegwangpei Nebuchadnezzar ne pwacuh kenzeu kecak mie de de reca lu maisia.✝ 6 Keheibe de cide keumie delwe reca kemakme, cipau tingsiak dau penuide kelien pwa miheu mimang gage kaigai dizie." 7 Cine mina pelane de makii, terwaine, zither, lyre, harp, nah telui, nah leinet leune kwa kegai kwa siu keludau, minadung, heleuhdung, nah hekwahelet leune de hegwangpei Nebuchadnezzar ne pwacuh kegai kecak mamie cide de reca di.

8 Cipau ting dau, Chaldeame Jewme de kemmau sam keulwe gwang. 9 Penui hegwangpei Nebuchadnezzar dage rang eh cu, "Hegwangpei, kelungta ringlo! 10 Nang, hegwangpei ne hezai tei luda, iciu eh mileune de makii, terwaine, zither, lyre, harp, nah telui, nah leinet leune kwa kegai kwa siu keludau keumie delwe kecak mamie cide reca lulo beu da. 11 Keheibe de cide keumie reca kemakme, de miheu mimang gage kelien gai di maisia. 12 Cu Jewme mikangge nang ne penuide Babylon deuceu reu ga kedi teigai kebeu medung bam; penui zi Shadrach, Meshach, nah Abednego. Mina aidungde, hegwangpei, nang rang kebeu de mzai ma. Penui n rabedung de reca nah pegwa tei meidi, mede penui nang ne pwa cuh kegai kecak mamie dwa ga keumie reca meidi."

13 Ge Nebuchadnezzar pe rata nah lunghop pui eh Shadrach, Meshach, nah Abednego penuide pe dwa ga ngngwa gwang lo aja kaigai. Cine penui aipau medung de ngngwa hegwangpei dwa ga gwang lu. 14 Nebuchadnezzar penui dage rangdi, "Shadrach, Meshach, nah Abednego, nnui a rabedung de raca lak lie mede Ih pwacuh kenzeu kecak mamie dwaga keumie cide nnui reca lak lie kecu nnui cet lu deni? 15 Cu magade nnui mtei lu decai, nnui makii, terwaine, zither, lyre, harp, nah telui, nah leinet leune kwa kegai kwa siu kelu dau, keumie delwe Ih pwacuh kenzeu kecak mamie cide reca lu cai, maleune de petau luzie. Dede magade nnui cide reca lu meidi cai, nnui de kelwa delwe miheu mimang heu kebam gage kelien gai dizie. A ba gade nnui de kelilu kera rabe cau ge bam no?"✝ 16 Shadrach, Meshach, nah Abednego hegwangpei sam keligai, "Nebuchadnezzar, aipau ha de ga anui n sam keli kera gede bam meda. 17 Magade sam keli lu kera ge bam liecai, anui nlum kela anui Tinggwang anuide mi heu kebam gade gumkwak beu zie, nah n ba gade anuide keli beuzie, hegwangpei. 18 Dede magade cinzwa lu meliede, peu ncu ci gai la, hegwangpei, anui n rabedung de reca lak, nah anui nang pwacuh kenzeu kecak mie cide de keumie reca lak."

19 Ge Nebuchadnezzar perata sütdi; pezu pie eh ngau kegai Shadrach, Meshach, nah Abednego dwade lidi. Pa mimang cide lum kebam reu de tei lumpwa pia hena kieege tei lum si gai lo aja kaigai. 20 Iciu eh pa pe reugwame ngkieng süt kecume kangge de Shadrach, Meshach, nah Abednego de kang lwe miheu mimang cide gage kelien gai kera aja kaigai. 21 Cine penuide kanglu, penui pai, penui ncwa, penui peurwa, nah penui paini kedadung teu kela lui penuide mi heu kebam mimang gage kelien gaidi. 22 Hegwangpei aja de mzai siakte kelane nah miheu cide lum süt kezeu ne, miheu ne Shadrach, Meshach, nah Abednego de pwa lüt kelame de rutsetdi. 23 Mina hangcum Shadrach, Meshach, nah Abednego aide penuide kangpwa kebam dau miheu mimang ga cakmie di.

24 Ge hegwangpei Nebuchadnezzar peswagah eh zette saplu. Pa pekang ga makeci kedime dade keteu, "Anui mina hangcum de mi gage kelien gai meni?" Penui hegwangpei sam keligai, "Cinzwa da, hegwangpei."✝ 25 Pa rangdi, "Dede Ih au mina hang mdai penuide de kang mene mi ga tet tegwa kebam ngauzeu, nah penuide rejam de dima. Iciu eh pemdaibe de au perehi tinggimgwame ge nzwa di." 26 Cine Nebuchadnezzar miheu mimang kikam taiga pet nna lwe qugai, "Shadrach, Meshach, nah Abednego, Hutube Tinggwang kilamedung, mpet lulo! Aika mpet lu!" Ge Shadrach, Meshach, nah Abednego mi gade mpet lu. 27 Ge cika gwang ngkwa kebam deuceu ga deuceudi medung, cuikui deuceudi medung, nah keda deuceudi medung, nah hegwangpei kangga makecimedng mina aidungde de ngau. Miheu ne penui pum rejam di ma; penui ba ga penui mai gede gap dima; penui paini kette teimsia di ma; nah penui dade mi rim gede nnam ma.

28 Nebuchadnezzar rangdi, "Anui Shadrach, Meshach, nah Abednego gu Tinggwang pe samgwame de langgai eh pe kilamedung dage sam kai kebeube de hetwa peu go. Penui Tinggwang de nlum pwa aja mzai meidi, nah penui penui Tinggwang rünne de gwale hera kedadung dwa keumie reca laklie penui pum kaigai. 29 Ciziemne Ih hezai aide peula, migede, heleuh keheibe de, mede hekwahelet keheibe de Shadrach, Meshach, nah Abednego Tinggwang de rang msia cai cipaume de teurakcak di maisia, nah penui kidung de ralie tumge teidi maisia kedanemene ci kenzwa kelilu kera hera keda kette gah kecune." 30 Iciu eh hegwangpei Shadrach, Meshach, nah Abednego de Babylon deuceu reu ga penui bam huki kecu gage keucuh beu.