1 Darius Ahasuerus napei, Medes leuhme ge. Ahasuerus ne pecu peu Babylonia reu hegwang teilu. 2 Darius hegwang teikelu mmi keraibe kum Ih, Daniel, RAMPAUBE sam laisiukwakdung pei bam, Jeremiah caihakecibe da kegwangbe sam de. Ih mcet kegai Jerusalem de gikedi cangdi kera mmi riakhena bamreu kecu cilu.

3 Ih kekie tei mmwang, rosopai ba nah mimüt ga bam eh Rampaube Tinggwang de peei kera nreu gwang. 4 Ih RAMPAUBE a Tinggwang dade kie, nah Ih anui maudung pet. Ih ranggai, "Kehereide, Rampaubo, nang au di nah yitube Tinggwang, nang samkak kelu de kainzeu la nah ncu hung kelame nah n zaidung kainzeu kelame dade nang masang la. 5 Anui mau dida nah petau kemakpe tei dida. Anui kesiabe bata tei dida nah anui n zaidung gade nreu tet eh renia la dida. 6 Anui n kilame caihakecime n zi teu anui hegwangpeidung, anui muiteume, anui paume nah kideube ga mina leune dage ma kerangme sam kingnei lu meda.✝ 7 Rampaubo, n da kemzuibe bam. Dede henai anui zudung ga hengam keteibe bam Judahme nah Jerusalem ga kelunghmedung nah Israelme leune da. Nang ne teizang kedi kideube kenna ga kelame nah kemdei ga kelame de si eh. Aide kedanemene anui ziuyi peei eh ncu renia kedine. 8 RAMPAUBO, anui nah anui gwangpeidung, anui muiteumedung nah anui paumedung, hengam tei dida, kedanemene anui ncu renia eh mau dida. 9 Rampaube anui Tinggwang da au ngaungia nah mimau gibeu kela bam, anui pecu renia di liede. 10 Anui RAMPAUBE anui Tinggwang pa pe kilamedung caihakecime dage pwa kepeu hezaidung de mzai lu meda.✝ 11 Israelme leune n zai de gileu dida nah nreu dida, n kwa kingnei rau dida. Anui ncu renia eh kemau tei kedine Tinggwang kilabe Moses zai gage rau teukela reset nah samkak de anui reu gage kaigai da. 12 RAMPAUBE anui nah anui reu kedime dage kengkap teugwang gaizie lie eh rang beuda. Kedanemene Jerusalem da teigai kedibe Tinggim kebam leune dage teigai kedidung keda gailak. 13 Moses zai gage rau teu kela nzwa eh kengkap aidung pelane anui da gwang liede anui maudung gade nreu gwang eh RAMPAUBE anui Tinggwang dade ngaugia kie luma nah n kesamsang gage anui lung kailu ma. 14 Ciziemne RAMPAUBE kengkap mteilu nah cide anui reuga teugwang gai, kedanemene RAMPAUBE anui Tinggwang au pa ketei leune gade de masang, dede anui pe sam mzai ma. 15 Cu au Rampaube anui Tinggwang, n ba kengkieng de teu eh nang n minadung de Egypt gade ngngwa mpet beu, nah cudau tingga nzwa nang n katei n zi tei mdulu. Dede cude anui kemau tei; makesiadung tei dida. 16 Rampaubo, n bata masang leune ziemne, peu n rata nah n lunghop de n namdi Jerusalem gade nreu tetdi lulo, n kemci deutu gade. Anui maudung ziemne nah anui paume maudung ziemne anuide twagwapung kebam leune de Jerusalem nah n minadung de mania kesia ge tei dida. 17 Cu, anui Tinggwang, n kilabe kekie nah ngaugia kie eh mra kegai kwa de kingnei gailo; n zi gade, Rampaubo, n kemcibam gikedi ga tau baa gailo. 18 A Tinggwang, n kwen ngkeilwe kingnei gailo, n miak mrak lwe pie gailo. N zi gade qu kela namdi de pielo; anui kau dida. Anui petaube teikela ziemne n kengha kie ma, dede n ngaugia kedi ziemne. 19 Rampaubo, anui kenggia kie kegai kingnei gailo! Rampaubo, kemaugi beulo! Rampaubo, pie mting nah heta tei gailo! N katei n ziemne ridi helo, a Tinggwang, kedanemene Jerusalem n namdi nah n minadung de n zi gade qulu delu."

20 Ih marang kebam dau, kekie tei nah a mau nah a mina Israelme mau pet kebam dau, nah RAMPAUBE a Tinggwang dwa gage a kekiedung liagai Tinggwang gu kemci deutu* keleu gade, 21 Ih kekie tei kebam dau, minabe Gabriel, Ih amang gade pecu ngau keraibe de, zette eh a da lim gwang, tinghegi reca ketei ting dau.✝ 22 Pa acu macilu kebui maci peu iciu eh a dage ranggai, "Daniel, Ih ncu peu kecikecet nah miakngau pwapeu kera cu gwangla da. 23 Nang ngaugia kiecu kecu dau, aja kaibeu iciu eh Ih samlibe ncu rangbeu kera gwangla, kedanemene ncu hung süt kecune. Ciziemne sam aide cetlu nah keulia kegaide ci lulo.

24 Ntakkak riakhena* au n minadung ziemne hezai nah n kemci namdi depeu kemau teisi tadi kera, kemau gade ngngwa yi dailu kera, kelungta kemzuibe teugwang kera, mangau nah caihakeci de teulu kera, mcitube bam* de teimci kera. 25 Cet nah cilu lo Jerusalem retak nah tei ncuhdai kera aja kai kebeu gade gwang kedet kelube (pa ne muiteube zie) kegwang kecang dega mtakkak hena* nah mtakkak riakherok-kena* zie. Jerusalem de puididung nah kekwabam de si eh retak dailu zie, keherei eh bam liede. 26 Mtakkak riakherok-kena kedicai, keniak kelube de ngkap dizie nah magede bamsi lak. Gwangkela hegwang gu reugwame ne namdi nah kemci ni de ngkap dizie. Duinai eh penlibe dizie, nah reutak kamtube ga kecang teizie. Ngkapdi bi kerade riet luda. 27 Pa mi kekiee de ngngwa piage kecu hena samting samkak luzie. Pa mtakkak ge* sumbe gade pa ratak nah reca de teingah dizie. Gikedi ta keteime dade kengaurau kecu gwang zie. Gikedi ta keteibe dage kengkap nah penli cangsiak kecu gwang kera riet luda."