1 Medeme pei Darius hegwang tei kelu mmi raitube kum, Ih akatei Michael de gumbeu nah pe lam pwabeu kera gwang.

2 Cu Ih n dage kesangbe ranglia zie. Persia ga hegwang hangcum cuh zie, nah pe mdaibe au kedamedung swade mahei kizie. Pa pe mahei gade kengkieng ngau lude, pa Greece gwangram de renia kera mileune de teu keri gaizie. 3 Iciu eh Hegwangram kendu kedi reu hegwang tei kerane hegwang ge cuh zie, nah pa pe bata pe lungningbe nzwa teizie. 4 Pa kedi teilu de, pe hegwangram pangpwa tinggim ga tingkaidung mdai gage mzigai dizie, dede pekatei pe leuhme dage lak, nah pe kengkieng le lak pa kedi tei kela dau. Kedanemene pe hegwangram de kedame ziemne pai mpetti zie pe dade lunggwang kemakme.

5 Tingbangle hegwangpei ngkieng dizie, dede pe kangga kebam reugwa muibe hangge pe swade ngkiengki zie nah kengkieng kedi teu eh hegwang teizie. 6 Mmi kie kemakge cai, peting petau lude, penui ngngwa ket tei dizie. Tingbangle gu hegwangpei napui tingtünle gu hegwangpei da gwang eh kesamkak ta teizie. Dede cipau pui de pe ba ga kengkieng de kainzeu lak, mede hegwangpei de sap gailak, mede pe ba kengkieng bam gailak. Mipui cide de gihdi zie, pa nah pecu ngngwa gwang kebeume de de, nah pepei de de, nah cipau tingdau pelam pwabeu kebamme de de.

7 Dede pe kibaume gade hangge cuh eh pebam leu zie. Pa reugwamedung de gwa ketang zie nah tingtünle gu hegwangpei kengkiengbam ga lüt zie. Pa penuide regi zie, nah penuide ngam lu zie. 8 Pa penui rabe miedung nah kecak pemi kehung lidung Egypt gage punggai dizie. Mmi kie kemak ge pa tingtünle gwangpei dade mdei ladi zie. 9 Pecai tingtünle gwangpei tingbangle gwangpei bam de gwa zie, dede pa pekatei pedeu ga cailigwang dizie.

10 Pe napeimedung mteilwe reugwa maa kedi ge hekwalu zie. Cide gwang jüja bam eh maleune hampwa dizie; cide lampui leune kah gwang rietegwa kelu gwangbam cang zie. 11 Pecai tingbangle gwangpei pe rata süt dizie; pa mie delwe tingtünle gwangpei de regi zie. Tingtünle gwangpei reugwa maa kedi ncu luzie, dede reugwame tuilu zie. 12 Reugwame de ngngwa tet dizie, nah tingbangle gwangpei ngang dizie, nah pa cangcang cu kereei de tei ngkau gaizie, dede pa ngkieng gailak. 13 Pecai tingtünle gwangpei reugwame keda ge ncuh luzie, keraibe swade diki kecuge. Mmi kiee kemak ge cai, tingtünle gwangpei reugwame kedi ge reugwa nia keyi teu eh gwang dai zie. 14 Cipau tingdau mina kekieege tingbangle gwangpei de renia eh cuhzie. N mina kakgade kesiabe napeimedung marengei de teicang kera tei zie, dede penui kau dizie. 15 Tingtünle gwangpei kideube de nah rietegwa kenzeu namdi gede tuih lu kerane lwa gwang zie. Tingbangle gu kengkieng cui saplu gailak dizie, penui gu reugwa yitumedung liede sap gailak. Penui saplu kera kengkieng kette bam lak. 16 Meliene, gwang kelabe penuide renia pwa pekatei pe lungsuibe tei teudi zie; migede pe lampui ga sap lak. Pa hezu keyi deu ga sap zie, nah tei ngkaplu kera pe ba ga bam dizie. 17 Tingtünle gwangpei pe hegwangram kengkieng pelane teu eh gwang kera mtei luzie, nah pa tingbangle hegwangpei de ngngwa samkak kera ge la zie. Pa pecu pe napuime gede kelak tei kera peu zie iciu eh tingbangle hegwangram de tei ngkaulu kerane. Dede mariem cide teidau gailak mede pecu ngha lak. 18 Aipau cai, tingtünle gwangpei duidikungdung gage pelung kai zie nah cipaumedung kekieege de tuih luzie. Dede reugwa muibe ne pe zai kesia de tei ngkap dizie nah pe zaisiet lepwa pe reu gage nreu caili kera tei zie. 19 Pecai pa pekatei pe deu ga riekelu namdung gage pelung kai zie, dede pecu teingkap dizie; pecu ngaulu ta dizie.

20 Pecai pe keleu gade mige cuh zie, cipaude heraha ha kelame de peu kahgwang lu kera peu zie pe hegwangram hezu keyi de ziemne. Dede matie mene pa pangpop dizie, dede cide rata gade, mede hereu gade de ma. 21 Pe keleu gade mi ngaukerau mege cuh zie minadung pecu hegwangme herüt kengkieng de peu lak; pa cet mezing kebam dau gwang zie nah hegwangram cide heciem tei eh keuteu dizie. 22 Pe dwa gade duinai kegwang nzwa reugwame de biakteu dizie. Reugwame de de nah samkakkelu cingkupei kedibe de de ngkap dizie. 23 Pecu ngngwa keyi teikelu tingdau gade, pa hecwa bata tei dizie; mina hemaa keceuna ge rünne ngngwa eh pa ngkieng dizie. 24 Pa mrairang mene deuceu heitube sau ga lüt zie, nah pa pe pei nah pe paume de teila kemakpe tadung tei zie. Pa süt kelube, tei msia kelube, maheidung pe caisuime dage teizang gai zie. Pa riekelu nam ngam kera tariem telei zie, dede cide tingkak ge gwale lak. 25 Pa pe kengkieng gade nah pa pelung gade reugwame kengkieng teu eh tingbangle ga gwangpei de regi kera cuh zie. Iciu eh tingbangle gwangpei reugwame ngkieng süt kecu teu regi zie, dede pa saplu lak kedanemene mina kedame pecu renia kera heta tei zie. 26 Pegu taktyei keyi tyei kelame de pecu ngkap kera teizie. Pe reugwame de au duinai kecu nzwa biakteu dizie, nah penui mina kekiee gede teitset dizie. 27 Hegwang aipau kena de, hangge dage kesia teigai kerane penai lungcet telei lu, kempaubam ge ga penai bam delwe hangge dade kenret zie, dede cide kemmi bam lak. Kedanemene penlibe riet kelu tingdau gwangdi zie.

28 Pecai tingtünle gwangpei pe deuga pe lung gade kemci samkak de renia kera lungcet teu nah mahei kedi pung eh cailigwang dizie. Pa bata teizie nah pe deuga cailigwang dizie. 29 Riet kelu tingsiak dau pa caili tingbangle gwangpei de renia kera gwang dai zie. Dede henaipia au pedwa swa tsam zie. 30 Kedanemene Kittimme liemdung pecu renia kera gwang zie, nah pa ngngi dizie nah caili dizie. Pa kemci samkak de renia eh pe rata süt dizie, nah pa kemci samkak de püt kedime de pe suiyi keulia zie. 31 Pe reugwamedung riekelu kemci ni de teihera dizie. Penui tei jüja kela keru ratak reca de keutet dizie, nah penui ngkap kedi ngau kenghet ge tei dizie. 32 Samkak kelude de renia eh bata kesia keteime ziemne au, pa ne penuide cwadi nah tei msia dizie. Dede minadung pe Tinggwang de ci kebam medung au ngkieng eh penui bata tei zie. 33 Mina kakga kemteume au mina kekieege dage kecikecet peu zie. Dede kingtie nah mi gade penui kau dizie; penuide nim teudi zie nah tingbazie kekieege penui dade rega zie. 34 Penui kau kela gade, kengha keceuna ge penui de ngha zie. Mina kekiee ge hezai tei eh penui maa ga ncüt zie. 35 Kemteume kangge kaudi zie, iciu eh tei keheci penui da peu tei lu kerane, nah tei kemci, nah tei keheci de peting kamtube cang kemaktane tei zie. Kedanemene riet kelu tingbe gwang lai zeureu kecune.

36 Tingtünle Syria gwangpei pe lungning nzwa batadung tei dizie. Pa pekatei pecu teu ncuh pwa rabe leune reu kaizie. Pa rabedung reu Tinggwang dage mimakecang samdung rang eh pecu renia zie, kedanemene pa cide teicang lubui lunghop cide cangdi kemaktane. Kedanemene tei zielie rangteu kela teicang zie. 37 Pa pe paume rabedung de masipei lak mede mipuidung penui suiyi kela rabe de de. Pa rabe keda keheibe de de mapeei lak. Kedanemene pa pelane reu pekatei pecu lepwa kedibe teizie. 38 Aidung de swade pa riekelu namdi rabe de rüt zie. Rabe cide pe paume ci kemak rabe ge, cide de pa rangkanggeu nah kecak, pemi kehung tangtsu nah mapeudung lepwa herüt peu zie. 39 Pa sangme rabe de ngngwa riekelu namdi ngkiengtube de gwa ketang zie. Mi keheibe de pecu penui gwangpei lie kelame de pa herüt peu zie. Pa penuide mina kekieege reu hegwang tei kera teibeu zie, nah pa kideu mzi pwa penui ziehi teibeu zie.

40 Peting kamtube ga tingbangle gwangpei gwa ketang zie. Tingtünle Syria gwangpei de hekwen bagi nah hekwen keteumedung, nah heliemdung kekiee teu eh pecu gwaketang zie. Pa kideumedung de renia zie, penuide kah gwang ngam luzie. 41 Pa hezukeyi deu* ga gwang zie, nah Israelme pecang cang kau dizie. Dede aidungde pe ba gade pak luzie: Edom, Moab, nah Ammonme bang kelume. 42 Pa pe ba hwapwa kideudung gage kaizie; Egyptme deu de keli gailak. 43 Pa kecak nah rangkanggeu reu kezeu luzie, nah Egypt reu mahei pelane de; Libyame nah Cushme de pa pe pidau teizie. 44 Dede naimiak kepetle nah tingtünle de samci ne pecu keheu dizie, nah pa liagai kelak rata teu tetpet zie tei ngkapti kera nah sau kekieege tei msia di kera. 45 Pa hezukeyi Mediterranean jaaidi nah Zion kemci hangdeutu kakgage pe kedi paiki ncuh luzie. Pa penlibe ga gwang zie, nah cika pecu kengha kera mi gede bamlak.