1 Nebuchadnezzar hegwang tei kelu mmi pekenabe kum, pa hemangdung ge mmi. Pa pelung hemau tadi, nah pa zip gailakdi. 2 Cine hegwangpei rekamedung nah ketsaime de mpau lalie rang kelamedung de qugai. Pa kehemeumedung nah makecimedung de de qugai. Pa penuide peu pe mang ha rang kera ranggai. Cine penui gwanglu delwe hegwangpei dwaga saplu. 3 Hegwangpei penui dage ranggai, "Ih hemang ge mmi, nah Ih a lung gade hemang cide pekie daipai bi kecu cineu süt bam." 4 Ge makecimedung Aramme let gade hegwangpei de mpau, "Hegwangpei, kelungta lunglo! Hemang cide n kilame dage ranglia lo, iciude anui pekie cide ranglia beu luzie." 5 Hegwangpei penui sam keligai, "Ih aide tiak mci luda. Nnui amang de a dage ranglia gai nah cide pekie ranglia beu melu di cai, nnui pum be teurak lwe cak mzi dizie nah nnui kidung ralie bau ge teidi zie. 6 Dede magade nnui a dage a mang nah pekie cide ranglia beu cai, nnui mapeudung, nah ziehi, nah herüt kedi ngaulu zie. Cine acu hemang cide nah pekie ranglia beu lo." 7 Penui sam keli eh rangdai, "Peu hegwangpei de anui pe kilamedung dage hemang cide ranglia lo, iciude anui pekie cide ncu ranglia beulu kerane." 8 Hegwangpei sam keligai, "Nnui peting teutielu neu kebam Ih ci mci bam dida, kedanemene nnui Ih aide tiak mcigi pwa kebam ci kelune. 9 Dede magade nnui hemang cide a dage rangbeu melu liecai, nnui ziemne cika samtiege gwale gah. Nnui kenret nah kecwa samdung Ih a lung keli dai kemaktane a dage cide rang kera kesuisam lwe mtei luda. Cine cu au, hemang cide a dage rangbeu lo, nah iciu eh nnui a ziemne pekie ranglia lukebui Ih cilu kerane." 10 Makecimedung hegwangpei dage pesam keligai, "Kideureu ga hegwangpei kie kebam de teicang lu kera migede gah da. Madaude hegwang kendu nah kengkieng gede kerekame, mede ketsaime de kempau lalie kecume, mede makecime dade ai kenzwa tei kera kie kecu tei ma. 11 Hegwangpei kie kebam cide au tei gailak, nah cide migede rang gailak heradung ne zielie maige, nah penui au mina kakga lungh bam ma." 12 Sam aide hegwangpei siupwa pe rata nah deiga sütdi, nah Babylon ga makecime kebam pelane de teitsetdi kera pa aja kaigai. 13 Cine makecime lie kela leune de teitsetdi kera aja kaidi. Aja aide ziemne Daniel nah pe zangmedung de peei gwang iciu eh penuide teitsetdi lu kerane.

14 Ge Daniel hegwangpei reketme reu muibe Arioch, Babylon ga makecime lie kela leune de teitsetdi zielie gwang kelabe dage pa cet sünne nah mriaksüt delwe pe sam keligai. 15 Daniel hegwangpei kangga kedibe dade keteu, "Daitei luge hegwangpei aja aide kelwa neu lano?" Cine Arioch Daniel dage daitei dibi kecu ranglia gai. 16 Ge Daniel zette lüt delwe pecu peu hegwangpei de redau lu kerane kiegai, iciu eh pa hemang rangswalu kebui hegwangpei dage lialu kerane.

17 Pecai Daniel kilung gwang delwe Hananiah, Mishael, nah Azariah dage daitei dibi kecu ranglia gai. 18 Daniel penui dage Tinggwang tinggim ga kebambe dade macet kecuk ha cide ziemne ngaugia kielu kera ranggai, iciu eh pa nah penuide de Babylon ga makecime lie kela leune de si delwe teitsetdi melu kerane. 19 Cipau ziu macet kecuk cide marengei gade Daniel dage liagai. Cidau Daniel tinggim Tinggwang de hetwa peu 20 cine Daniel Tinggwang de twadi,

"Tinggwang zi kelungta twalo;

kedanemene maci nah kengkieng au pe gu kecune.

21 Pa pe tingdung teikedi dila nah pe hidung de;

pa hegwangdung de keugi dila

nah hegwangdung de penui gwangbam gage kaibeu la.

Pa ningcing makecime de peu la

nah cilu kelame dage maci peula.

22 Pa makecok nah kebai kenzeu dung liabeu la

kedanemene pa kemui ga dai bambi kecu cila kecune,

nah kebaa ne pecu twagwa bam.

23 A paumedung Tinggwang, Ih ncu twa nah rütla

nang acu ningcing maci nah kengkieng kepeu ne.

Cu au n dade anui kie kebam de nang acu peu cigai da,

hegwangpei dage ranglu kebui nang anui dage liabeu da."

24 Pecai Daniel Arioch (Babylon ga makecime lie kela leune de teitset kera hegwangpei ne nlum kegaibe de) de redau kera tetgai. Pa mie pe dade rangdi, "Babylon ga makecimedung de teitsetdi helo. Acu ngngwa hegwangpei da gwang beulo nah Ih hegwangpei dage pe mang cide lia nah rangswa gaibeu kerane."

25 Ge Arioch kelwa delwe hegwangpei dwa gage Daniel de ngngwa gwanglu eh pa rangdi, "Langgi kedi Judahme kak gade mi hangge hegwangpei mang pekie ranglu kebui kauge de Ih ngau luda." 26 Hegwangpei Daniel (Belteshazzar qu kelabe) dage rangdi, "Nang Ih hemang mmi kegaide nah pekie cide a dage rangbeu lubui ni?" 27 Daniel hegwangpei sam keligai, "Hegwangpei keteu kebam macet kecuk aide makecime ne ranglia gailak, mede ketsaime de mpau kelamedung ne de, mede kerekamedung ne de, nah hekeihegi ha kecimedung ne de ranglia gailak. 28 Iciu liede, macet kecuk liabeu kela tinggim ga ring kebam Tinggwang ge bam, nah pa hegwangpei Nebuchadnezzar, n dage peu ci kegai teila, gwang kela tingbaziedung ga dai teigwang ziebi kecu. Hemang nang n zeu ga zeu kebam dau n peusui gade mmi kegai mang au aide da.✝ 29 Nah hegwangpei, nziemne au, nang n zeu gade mmi kecu de au heta tei gwang kerabe dung delie, nah macet kecuk keulia kelabe dai teigwang lai zeubi kecu peu ncu ci gaila.✝ 30 Nah a ziemne au, macet kecuk aide acu keulia kebeu au Ih mi keda ringkela medung leune swade maci kiee kecu ziemne ma. Macet kecuk ha aide acu keulia kebeu au, hegwangpei, ncu peu pekie aide cilu kerane, iciu eh n mlungsing ga nang cet kela de peu cilu kerane.

31 Hegwangpei, nang ngangcuh piegai, ge mamie kedi ge sap eh ngau. Mamie aide, ngkieng nah baa süt ge n dwaga sap. Pe keba cide pie kehing ge. 32 Cide pepeu kecak mcitube le teilu. Pe hekarak nah pe ba au rangkang geu le teilu. Pekia penai pekeling au hetageu le tei, 33 nah pepi au hegeu le tei. Nah pe pideu au hegeu nah lidei le teilu. 34 Nang ngangcuh piegai, nah tangtsu ge dang mpet gai, cide mina ba gene de ma, iciu eh cide mamie pideu hegeu nah lidei le tei kenzeu gage kedeugai, nah cide tei takcaidi. 35 Ge hegeu de, lidei, hetageu, rangkanggeu nah kecak, cidung pelane de piage gage pangpop kecaidi nah hepok dau hecaipung ga tsiurie nzwa bam di. Tingkai ne cidung de guipwa tetdi nah penui caimie magede bam si tadi. Dede mamie de kedeu kegaibe tangtsu cide lamlwatu kedi ge cu eh kideureu pelane gum puidi. 36 Aide n mang da. Cu anui hegwangpei de pekie ranglia zieda. 37 Nang, hegwangpei, au hegwangdung reu hegwangbe Tinggwang ne ncu hegwangram, kengkieng, ngking, nah kendu kepeube. 38 Mina lungh kela deu de pa ne n ba gage kaibeu da. Luh ga makaunedung nah tingkam ga nruinedung pa ne n ba gage kaibeu da, nah peu ncu penui reu hegwang tei kera pa ne ncu tei beu da. Mamie gu kecak peu de nang delie. 39 N cai ga, hegwangram kedage cuh dai zie, cide n swade ceu zie, nah pecai de hetageu le tei kelu hegwangram kedage cuh eh kideu pelane reu hegwang tei zie. 40 Hegwangram pe mdaibe cuh zie, cide hegeu nzwa ngkieng zie, kedanemene hegeu au ma kedadung nah ma pelane de kedeu takcai dila. Cide ma aidung pelane kedeu pop nah penuide tei takcai dizie. 41 Nang pe pideu lidei le nah hegeu le tei kenzeu kengau nzwa, hegwangram cide pang mzi kedi hegwangram ge zie; kangge da hegeu nzwa pe kengkieng bam zie. Cide hegeu nah kenciep lidei hai ncüt kebam nang kengau de nzwa da. 42 Pe pideu cide hegeu nah lidei le tei kelu nzwa, hegwangram cide kesa ngkieng nah kesa mnei zie. 43 Nang hegeu nah lidei hai ncüt kebam kengau nzwa, minadung de hai ncüt dizie; penui ncüt eh bamlak, hegeu lidei de ncüt gai kelak nzwa. 44 Cipau hegwangmedung tingdau, tinggim ga kebam Tinggwang madau de ngkap gai kelak hegwangram ge teucuh zie, cide mina kedage ne de ngam gailak. Cide hegwangram kedadung teipang teipop takcai dizie, nah penui pelane de tei nggah dizie, nah cide kelungta bam dizie.✝ 45 Lamlwatu ge gade tangtsu ge dang mpet kecu nzwa eh, dede cide mina ba ne kemak nang ngau kecu nzwa. Tangtsu cide hegeu, hetageu, lidei, rangkang geu, nah kecakdung de kedeu takcaidi. Kendu Tinggwang peu n dage ci gaila, hegwangpei, aipau cai dai teigwang zie bi kecu. Hemang aide kesang nah pekie rangswa kebeu aide nlumlu kebui ge.

46 Hegwangpei Nebuchadnezzar pezu keumie Daniel dwa ga nah pecu hetwa peugai; pa mapeu ratak nah marim kehengui pwa pecu peu kera aja kaigai. 47 Hegwangpei Daniel dage rangdi, "Kesangda, n Tinggwang au heradung reu Tinggwang da, hegwangmedung reu Rampaube, nah macet kecuk keulia kelabe, kedanemene nang macet kecuk aide keulia beu da."✝ 48 Hegwangpei iciu eh Daniel de herüt peu süt nah miswakegah mapeudung kekiee peu. Babylon deuceu reu hegwang pecu teibeu. Babylon ga macitume kakgade Daniel ne deuceudi ditube teidi. 49 Daniel hegwangpei dage kiegai, nah hegwangpei Shadrach, Meshach, nah Abednego de Babylon deuceu ga kedime teibeu. Dede Daniel au hegwangki ga bamdi.