1 Darius hegwangram reu deuceudi 120 gede kedet kera pesui lu hegwangram pelane reu kedi tei kerame de. 2 Penui pelane reu ditume hangcum bam, nah Daniel de cipaume kakte hangge. Kedime hangcum de de peu deuceu reu kedimedung puisau teibeu kerane kedetlu, iciu eh hegwangpei kengkap gede dau melu kerane. 3 Deuceu reu kedimedung nah penui ditumedung hangcum kak gade Daniel de pwa penai reu ge kai, kedanemene pe da yi tsamceu kecu rabe kela ziemne. Hegwangpei Daniel de hegwangram pelane reu kedibe tei kera cetla.

4 Ge kedime keda kena nah deuceu reu kedimedung Daniel de mmau kerane pe bata ga ma teimau gaikera peei ladi, dede penui pecu mmau kera gede ngaulu ma mede pa peta tei kela gade teicang la kemak gede ngau luma kedanemene pa au samsang kecune. Teimau kegai mede teicang kemak gede pe dade ngau luma. 5 Ge mina aipaumedung rangdi, "Anui Daniel de mmaugai kera kie gede ngaulu meda pe Tinggwang zaidung gade mage mmau kera ngau lu zielie mai." 6 Ge kedimedung nah deuceudi dung hegwangpei dage penui mage rim teugwang. Penui pe dage rangdi, "Hegwangpei Darius, nang kelungta ring lalo! 7 Hegwangram ga ditumedung pelane, cuikui ga kedimedung, deuceu ga deuceudidung, muiteume nah deuceudi dung ncüt delwe mpau nah kesamdau lu nang, hegwangpei, hezai ge tei mpet beu nah cide mzai bi kera telei beulu, iciu eh caugame zie camrei ge, hegwangpei, ncu rünne mene, hera keda ge mede mina dade kekie tei cai, cipaube de kelien pwa hinghodung kebam hekwaki gage kaizie. 8 Cu, Hegwangpei, aja tei mpet gai nah cika ge n zi giak dilo, iciu eh Medeme nah Persiame zai mzui eh cide teili daidi me kera ziemne, iciu eh cide keu caili melu kerane." 9 Cine hegwangpei Darius laisiu cikage giakdi aja cide hezai teidi.

10 Laisiu cide giak pwa hezai teidi delie kecu Daniel ci kelu dau, pa pe ki ga gwanglu (cide Jerusalem lebie ncwa kebam kibung nreube hebaki ngkei nzeu), nah pa koktungmie, pa tingba ramsang piacum tei bam kela nzwa, nah kekie tei nah pe Tinggwang dwade hetwa peu, cide pa keda dau teibam kela ge. 11 Mina aidungde pa kekie tei kebam tuih zielie telei kebammedung Daniel pe Tinggwang dade ngaugia nah kengha kie kebam ngaulu. 12 Ge penui hegwangpei da gwang delwe pa aja kai kenzeu ha rang: "Zie camrei ge kakga keheibe de, nang hegwangpei, ncu rünne gwale hera kedage mede mige dade de kekie teicai cipaume de hingho kebam hekwaki gage kelien gai di kera nang aja kai melui ni?" Ge hegwangpei sam keligai, "Peha cide tei mci dida, cide Medeme penai Persiame zai rehi nzwa delwe; cide teili dai gailakta." 13 Ge penui hegwangpei sam keligai, "Daniel lie kela Judahme deu gade langgi kedibe de, hegwangpei, pa n sam kingnei meidi nah nang aja kaipwa n bagiak kai kenzeu de lepwa malie meda. Pa pe Tinggwang dade tingba ramsang ne piacum kekie teila." 14 Hegwangpei sam aide siu luge, pa pelung siadi, nah pa Daniel de pe ba gade kelilu kera ziemne pe lung gade cet lu. Pa Daniel de keli kerane tingnaimiak kenlüt kecang de laikai tei. 15 Ge hecim aide riem ncüt kelumedung hegwangpei da gwang ngkwalu delwe pe dage rangdi, "Ci lulo, hegwangpei, hezai ai Medeme nah Persiame zai da, aja gede mede hezai gede hegwangpei ne kai kedi be kette teili gailak."

16 Cine hegwangpei aja kaigai, nah penui Daniel de ngngwa gwang lu, nah penui Daniel de hingho kibung gage kelien gaidi. Hegwangpei Daniel dage rangdi, "Peu n Tinggwang, nang samsang eh pegwa tei jüja bam kelabe de ncu kelibeu lo." 17 Tangtsu ge pwagwang eh hingho de kai pwa kebam hekwaki kimui reu ge kaidi, nah hegwangpei pe hegwang kaudap kai kelu nah pe kangga kedime gu kaudap le tangtsu cide kaudap kaidi, iciu eh magene de Daniel de keli melu kerane. 18 Ge hegwangpei pe hegwangki ga cailigwang di nah pa cipau ziu mmwang. Pe dage kehemeu kerenga tadung kette tei ma, nah pa ziplu ma.

19 Ge tingba pet ge hegwangpei cuhlu nah zette hingho kwaki gage tetgai. 20 Pa hingho kwaki cide pet nna kezeu dau, pa pelung keceu kwa gade Daniel de qu eh ranggai, "Daniel, ringkela Tinggwang kilabo, n Tinggwang, nang pegwa tei jüja kelabe, ncu hinghodung dade kelilu deni?" 21 Ge Daniel hegwangpei dage rangdi, "Hegwangpei, kelungta ring kelube tei lo! 22 A Tinggwang pe samgwame ge de langgai eh hingho muidung keba luda, nah penui acu kette rejam di ma. Kedanemene pe dwa gade de nah, hegwangpei, n dwa gade de a mau gede bam eh acu ngaulu kemakne, nah Ih n dage ma kesia ge de teigai ma." 23 Ge hegwangpei pesuiyi sütdi. Daniel de hingho kwaki gade teu mpet kera aja kaigai. Cine Daniel de hekwaki cikade teu mpet lu. Pecu rejam kezeu gede ngaulu ma, kedanemene pa pe Tinggwang de nlum kelune.

24 Hegwangpei aja kaigai, nah Daniel de mmau kela leune de ngngwa gwang eh penuide hingho kwaki gage kelien gaidi, penui, penui name, nah penui naudung de de. Penui cakmie hangdeu de tung kemakne, hinghodung penui reu nsaucuh nah penui ra dung cak takcai ra dedi. 25 Ge hegwangpei Darius kideu ga lungh kebam minadung, heleuhdung, nah hekwahelet leune dage raugai:

"Peu lungciep n dade kieesi kelube teilo. 26 Ih aja aide kaila, a hegwangram lungga kebam pelane de Daniel Tinggwang mie hing lulo beu,

kedanemene pa au ringkela Tinggwang lu nah pa kelungta ringla,

nah pe hegwangram ngkapdi gailak;

pa penli kecang hegwang teizie.

27 Pa anuide gumkwak luda nah kelilu da,

nah marengeidung nah miswakega batadung

tinggim gade nah kideu gade teila;

pa Daniel de hinghodung kengkieng gade gumkwak beuda." 28 Cine Daniel Darius hegwang tei kebam tingdau nah Persiame pei Cyrus tingdau lunghyi sütlu.