1 Sinamedung, a lungga keregui nah Tinggwang dade Ih penui ziemne kie kebamde au, penuide kelilu kerade delie. 2 Ih penui zierang tei gaila penui Tinggwang ziemne nribam liede, dede maci ria gade ma. 3 Kedanemene penui Tinggwang masang de ci kemakne, nah penui katei penui masang tei kera peei kelane. Penui Tinggwang masang gage penuide mpütgai luma. 4 Kedanemene Khrista au makesang de ziemne nlum kelume leune ziemne hezaibe teicang kebeube da. 5 Kedanemene Moses makesangbe ha hezaibe gade kegwangde raugai: "Mige aidungde teimzai kelabe cide gade ring luzie."✝ 6 Dede makesangbe kenlum gade kegwangbe aiciu rangla, "N mlung gade ainzwa rangso, ‘Caune tinggim ga nghang lai?’ (cide, Khrista de kideu ga ngngwa nghung kera); 7 nah ainzwa rangso, ‘Caune penli kegah kecok ga nghung lai?’" (cide cai, Khrista de ketsai gade teu cuhlu kera). 8 Cide dai rangla no?

"Sambe n taiga bam, n mui ga nah n mlung ga."✝

Cide au kenlum sam, anui pau kelade. 9 Kedanemene magade nang n mui gade Jisu Rampaube lie rang lucai, nah n mlung gade Tinggwang ne pecu ketsai gade teucuh kebeude nlum lucai, ncu kelilu zie.✝ 10 Kedanemene mige pe mlung gade nlum kelube de tei masang lula, nah mige pemui gade ranglu eh kelilu la. 11 Kedanemene kesanglaisiu rangla, "Pecu nlumkelu leune de hengam tei dilak."✝ 12 Kedanemene Jewme nah Greekme kakga kentsam magede gah. Rampaube pelane Rampaube kecune, nah pecu qukela leune de pa samlam kekiee peula. 13 Kedanemene mina keheibede Rampaube zi qu kelabe de kelilu zie.✝ 14 Cine dainzwa eh penui nlum kemakbe de penui qu lulai? Nah dainzwa eh penui siu kemakbe de penui nlum lulai? Nah dainzwa eh rang keliame gahcai penui siu lulai? 15 Nah dainzwa eh, penuide langgai meliecai penui ledeu lai?, Kesanglaisiu ga rauteukela nzwa, "Samliakeyi paulia kelame pi au daikenzwa gede hezuyi no!"✝

16 Dede Israelme pelane samliakeyi de mzai luma. Kedanemene Isaiah rangla, "Rampaubo, cau anui samde nlumlu dino?"✝ 17 Cine kenlum au siukelu gade gwangla, nah Khrista sam siu kelude gade. 18 Dede Ih rang gaila, "Penui siu meni?" Yeo, siulu kesang da. Kesanglaisiu rang kelanzwa,

"Penui kwa kideu pelane ga mpetla dida,

nah penui samdung au kideu penli ga la dida."✝

19 Cipau reude, Ih rangla, "Israelme cilu meni?." Moses mrai ranggai,

"Ih heleuh kemakge de teipwa nnuide peu nnui riak dizie.

Heleuh kemie leuh ge de teu eh, Ih nnui rata teigai zie."✝

20 Nah Isaiah pa kuusüt eh ranggai, Tinggwang ranggai,

"Acu peeila kemakme ne acu ngaulu.

Acu keteu kemakme dage Ih acu liagai."

21 Dede pa Israelme dage ranggai, "Tingbazie pelane samzai tei kemak nah pelung ketak leuh ge dage Ih a ba hwagai."✝