1 ताहराआ का आमू वोडाय कोओ के? नेत बिहीरा माअहुंउं होस तुमुहूं पसंती पत्र देखाड़ुहूं पोड़े के, के तुमापोअ रोत मागुहूं पोड़े? 2 आमाआं पत्र तोम तुमूज होय, जों आमाआं मोनोपोअ लेखाअयोहो तियाहा आखे माअहें ओलखीइतेहे आन वासतेहे. 3 सही वाअहीं नाहां, पोन जिवता देवोअ आत्मा वाअहीं कोरवीइल्या, डोणोअ पाटीपोअ नाहां, पोन मोनवीइ दिलोअ पाटीपोअ कोरवीइल्यो ख्रिस्ताआ पत्र तुमूज होय.

4 ख्रिस्तामेहें देवोपोअ आमाआं विश्वास एहेलुहूज होय. 5 आमू एताहा लायक कायनाहां के सोताआ सेक्ती वाअहीं कोड्ली बी गोठ ठरवीत सेको, पोन आमाआं लायकी देवोअ जागेहे रोत जोड़्यीही. 6 तिये आमुहूं नोवी शप्पतेए सेवक बोणिइलोअ लायक बोणावयाहा. कायदा वाअहीं नाहां, पोन पवित्र आत्मा वाअहीं होय; काहाके कायदु तोम माइत टाकेहे, पोन आत्मा जिवाड़ेहे.✝3:6 यिर्म 31:31; 32:40

7 जर डोणोपोअ कोरवीइल्यू मोत लेतावनारु कायदु जाआं एतुहू महिमावालू ओतू, के इस्राएलोअ माअहें मोशेए मुखोपोर्‍योअ उजालो ने पालीत सेकतेते. 8 ताहां आत्माआं महिमा तिया रोत जाअखी उजालावाली काहा ने रोय? 9 काहाके डोंड आपनारी महिमा जाआं एतीही उजालावाली ओती, ताहां धर्मी ठरवीइनारी महिमा केतीही उजालावाली रोत सेके! 10 तेतोज नाहां पोन, ए नोवी महिमा एतीही वादार उजालावाली होय के, तियीइ सामने पेल्लीइ महिमाआं उजालो फिको पोड़ीत गोयो. 11 काहाके सेलाअनारी महिमा जाआं एतिही उजालावाली ओती, ताहां हादाफल टिकनारी महिमा तिया रोत केतीही वादार उजालावाली रोय!

12 एहेलिही आशा होय तियाहा काजे आमू हिम्मतो वाअहीं गोगताहा. 13 आमू मोशेए होस कायनाहां कोअता; काहाके तों सेलाअनारो उजालो इस्राएल माअहें ने देखुहूं जोवे कोत तिये तोम सोब टापित लेदीते. 14 पोन तियांआं मोने बोयरे ओत गोयेते, काहाके आज बी तें जुनू नियम वासतेहे, ताहां तो पोड़दू तियांआं मोनोपोअ टापाइत रोहे; पोन ख्रिस्तामेहें तो पोड़दू निहींत जाहे. 15 आन आज बी जाहां तें मोशेए पुस्तक वासतेहे, ताहां तो पोड़दू तियांआं मोनोहों टापित रोहे आन तियांहां नाहां समजाअतो. 16 पोन तो पोड़दू निहींत सेकेहे, काहाके मोशेए बाप्तिम वसन कोहे: "जाहां तो प्रभुउ वोगेहे फिरेहे, ताहां तियाआ पोड़दू काडाइत जाहे."✝3:16 निर्ग 34:34; यश 25:7 17 प्रभु तोम आत्मा होय आन जिहीं का बी प्रभुउ आत्मा होय, तिहीं सुटका होय. 18 पोन आपाआ आखाआ सोबीपोअ पोड़दू कायनाहां, तेबी आरह्यामेहें पालतेहे तेहलोहो प्रभुउ उजालो देखाअहे, आपू तियाज उजला रुपोमेहें जारजारीही बोदलाअते जातेहे. ओं प्रभुउ तरफ से ओवेहे, जो आत्मा होय.