Apocalipse 15

आखरीइ हांत पिड़ा आन वाटी

1 फाशुउ आंय जुगोमेहें एक वोडी निशाणी देख्यी, मोन्ज्ये हांत देवदुत जियापोअ हांत आखरीइ पिड़ा ओती, काहाके देवोअ खोत तिहीं रोत सेलाइत जानारी ओती.

2 आंय जेहेलाम पाल्यो, ताहां एक आग पेलीत मिकल्यू दोर्‍या देख्यू; आन जें माअहें तिया जनवारोपोअ, आन मुर्तीपोअ तियाआ नावोअ आकड़ाहा जिकीत गोयेते, तें तिया खासोअ होसऱ्याआ दोर्‍याअ जागे, देवोअ आपल्यो तंबिवरो लेत कोइत उबे रोत रोयेते. 3 तें देवोअ सेवक मोशेए गित, आन मेडाआ गित गावीत कोइत कोतेते:

"आखाम रोत वोडी ताकतवाला प्रभुदेवा,

ताआ कामे वोडे आन बोगलाइत जाय एहलेहे होय!

आखा देसोअ राजा,

ताआ वाट हाजी आन खोरी होय.✝15:3 निर्ग 15:1

4 प्रभु, कोडो ताहूं ने बिनारो?

कोडो ताआ नावोअ महिमा ने कोअनारो?

काहाके तुज पवित्र होय.

आन ताआ सती कामे प्रगट ओवेहे,

तियाहा कोत आखे राश्टे ताआ सामने आवीत,

ताआ भक्ती कोए."

5 तिहीं फासाड़ी आंय पाल्यो, ताहां साक्शीइ मंडपोअ होरगामेर्‍योअ मंदिर उगड़्यो; 6 आन तिया मंदिरोमेहें रोत हांत देवदुत बाअथे निहींया; तियांपोअ हांत पिड़ा ओती. सोत्राले आन सोमक्ये आंगड़े पोवीत आन सातीपोअ होनाआ पोट्टा बांदीत ओता. 7 ताहां तियां शारु जनवारोमेहें रोत एके जोएं हादाजलम जिवता रोनारा देवोअ खोतेए वाअहीं पोअल्या हांत होनाअ वाटका तियां हांत देवदुतोहो आप्या; 8 देवोअ महिमा, आन ताकत वाअहीं मंदिर तुमाणा वाअहीं पोआत गोयू; आन तियां हांत देवदुतोंअ हांत पिड़ा ने सेलाअयी ताअहूं जाआं कोडो बी मंदिरोमेहें ने जात सेको✝15:8 यश 6:4.