1 याआ फासाड़ी आंय होरगामेहें एका जाअखीलाहा माअहुंउं गोवाराआ होस वोडु आवाज एहें कोत्लाहा उनाअयु, "हालेलुया! तारण, महिमा आन ताकत आमाआं देवोओज होय. 2 काहाके तियाआ न्याय खोरु आन हाजू होय. तिये तियी वोडी रांडीही डोंड आप्युहू, जे तियीइ सिनालावाअहीं धरतीही बिगाड़तीते, देवे तियाआ सेवकोंअ रक्ताआ वारी काड्यीही." 3 ते फाशेए बिहरीवारी कोयो, "हालेलूया! तियाआ पेटाअनारा होयरोअ तुमाणू पिढ़ीन पिढ़ी तुमाअतू रोय." 4 ताहराआ राजगादीपोअ बोठ्ला देवोअ सामने ते शोवीस डायहां आन तें शार जनवारे उब्डा पोड़ीत कोइत वोंदीत कोइत कोयो, "आमेन! हालेलुया!"

5 याआ फासाड़ी राजगादीइहें रोत एक आवाज आंय एहें कोत्लाहा उनाअयु, "ए आमाआं देवोहो बिनारा आखा सेवकों, हानान वोडा तुमू आखा देवोअ स्तुती कोआ." 6 ताहां आंय जाअखीलाहा माअहोंअ गोवाराआ आवाज जेहें, दोर्‍याआ उपाड़ाआ जेहें आन गाजनारा वाद्ला आवाजोअ होस जेहें आवाज उनाअयु, तो एहें कोइत, "हालेलुया! काहाके आमाआं प्रभुउ आखाम रोत वोडु सेक्तीमान देव राज्य कोअहे. 7 आपू सेकलाइत कोइत खुसी कोअहूं आन देवोअ महिमा गावुहूं, काहाके मेडाआ वेहेवालोअ दिही आवीत लागाहा, आन तियाआ वोड़ली सोताहा तियार ओत गोयीही. 8 आन तियीही हाज्जेहे पांडे मोवे साअके फांगे तेहें काजे आप्ये, काहाके यां मोवा साअकाआ अर्थ ओं होय, देवोअ माअहुंउं हाजे कामे."

9 आन तिये देवदुते माहूं कोयो, "ओं लेख, धन्य होय तें, जें मेडाआ वेहेवालोअ पांगातीमेहें हादाअयेहे," आन फाशोअ तिये माहूं ओं बी कोयो, "ओं देवोअ सत्य वसन होय."

10 ताहां आंय तियाआ भक्ती कोइलाअ काजे तियाआ गुडापोअ उठ्लीत पोड़्यू. पोन तिये माहूं कोयो, "एहें मा कोअही, आंय बी ताआ आन ताआ तियां पाव्हीइलाअ सेवक होय, जें ईसुउ आपल्यी साक्शी सांबालीत मिकतेहे. तु देवोहोज वोंदजी."

काहाके ईसुउ साक्शी भविश्यवाणीइ आत्मा होय.

11 ताहां आंय होरगो उगड़ीइल्यो पाल्यो, आन एक पांडू कोड़ु देखाअयू; तियापोअ जो बोठ्लू होय, तियाहा इमानदार आन खोरु कोतेहे; आन तो निती वाअहीं न्याय आन लड़ाय कोअहे.✝19:11 यहे 1:1; भजन 96:13; यश 11:4 12 तियाआ डोआ आगीइ हांगाड़ाआ होस आन तिया मुन्कापोअ जाअखीलाहा टोपा होय, आन तिये डिलोपोअ एक नाव लेख्योहो, जियाहा तियाहा सोड़ीत बिहीरा कोडाहाज नाहां मुंदू. 13 तो रक्तामेहें बुल्ल्ये आंगड़े पोवित होय, आन तियाआ नाव "देवोअ शब्द होय." 14 होरगा मेर्‍यीइ सेना पांडे सोके मोवे आंगड़े पोवित आन पांडा कोड़ापोअ बोहीत कोइत तियाआ फासाड़ी फासाड़ी सालेहे. 15 आखा देसोअ माअहुंहूं माइलाआ काजे तियाआ मुखोम रोत वाडाली तारवाआ निहेंहे. तो लोड़ाआ राजडेंगारा वाअहीं तियांपोअ राज कोए आन आखाम रोत वोडी ताकतवाला देवोअ खोतेए दाराक्शाआ रोहोअ कुंडे सुउवी देय. 16 तियाआ जांगेपोअ आन साअकापोअ ओं नाव लेख्योहो: "राजाआं राजा आन प्रभुउं प्रभु."

17 आंय एका देवदुतोहो दिहोपोअ उबा रोल्याहा देख्यू. तिये वोडा आवाजोमेहें जुगोम उड्नारा आखा सिड़ाहां कोयो, "आवा, देवोअ वोडी पांगातीइ काजे टोलु वोला, 18 तुमू राजाहांआं माहां, सेनापतीइं माहां, आन बाहादिरोओं माहां, कोड़ाआं माहां आन कोड़ापोअ बोहनाराआं माहां, मालिख, पावर आन हाना वोडाआ आक्खा माअहोंअ माहां खावा."

19 ताहां आंय जनवारोहो आन धरती पोर्‍याआ राजहांहां देख्या आन तियीं सेनाहां बी देख्यी, जे पांडा कोड़ापोअ बोहनारा माट्योअरी आन तियाआ सेनाअरी लड़ाय कोइलाआ कोअते टोलु वोल्यीते. 20 तिया जनवारोहो, आन तियाअरी तिया ठोग भविश्यवक्ताहा तोअया, जिये तियाआ सामने माअहुंहूं एहेलिही निशाणी देखाड़ीत कोइत भटकाड़्येते, जियांआं आथोमेहें तिया जनवारोअ निशाणी ओती, आन तें तियाआ मुर्तीइ पुंजन कोअतेते, यां बेनुहूं जिवताइज तिया गंधकोवाअहीं पेटाअनारा आगीइ तालावोमेहें टाकी देदा.✝19:20 प्रगटी 13:1-18 21 रोल्ये माअहें कोड़ापोअ बोहनाराआ सोबीम रोत निहींनारी तारवाइ वाअहीं मोये आन आक्खे सिड़े तियांआं माहां खात ताराइत गोये.