1 माआं विश्वासी पाव्हीइला, तुमू जें देवोअ माहें होय आन होरगाआ राजोअ काजे हादाअले होय, तुमू ईसुउ बाप्तिम विसार कोअहूं जोवे, जो देवोअ प्रेशित आन आपाआ विश्वासोअ मुख्य पुंजारु*3:1 पुंजारु देवोअ सेवक होय. 2 तो तियाआ काम होपनारा देवोअरी इमानदार ओतू, तेहलुज मोशे बी देवोअ पुरा कोअमेहें इमानदार ओतू. 3 जेहें कोइत कोअ बांदनाराहा कोओ रोत जाअखु मानपान रोहे, तेहेंज कोइत ईसुहू मोशे रोत जाअखु मानपान जोड़्यू. 4 काहाके, हारेक कोओअ कोडोन कोडो बोणावनारो रोहे, पोन‍ जिये आखो बोणायोहो तो देव होय. 5 मोशे ताम देवोअ पुरा कोअमेहें पावरोअ होसर्‍युउ इमानदार रोयू, काहाके तिये जे गोठी भविश्याम ओवनारी ओती तियींहीं पेलुज कोत आपी देदी. 6 पोन ख्रिस्त बेटाह्हाअ होसर्‍युउ देवोअ पुरा कोओअ इमानदार आधिकारी होय; आन जर आपू बी आपाआ धिर, आशा आन देवोपोऱ्याआ पाक्का विश्वासोअ वोडाय कोअतेय ताहां आपू देवोअ कोअ होय आन आपू आखरी जाआं टिकीत रोअहूं जोवे.

7 ताहरोअ, जेहेंकोइत पवित्र आत्मा कोहे के,

"जर आज तुमू तियाआ शब्द उनाअहा,

8 ताहां तुमाआं मोन कठीण मा कोअहा,

जेहेंकोइत तुमाआं डायहां देवोहो पारजाणीलोअ काजे रानोमेहें देवोअ विरुद्दाम दोंगा कोअया.

9 जिहीं तुमाआं डायहां माहूं पारजाणीत कोइत फारक्यु,

आन सालीही वोरह्ये जाआं माआं कामें देख्ये.

10 तिहीं वाअहीं आंय तियी पिढ़ीइ माअहोंअरी खोतात रोयू,

आन कोयो, ‘यांआं मोने कायम भटकीइते फिरतेहे आन माआं वाट यां नाहां ओलख्यी.’

11 तिहींइंरी आंय खोतेमेहें शप्पत खात कोयो,

‘एं माहें आरामोंअ जागाम नाहां आवित सेकनारे.’"✝3:11 गणती 14:21-23; कायदा 1:34,35

12 हेएजा पाव्हीइला, जिवता देवोहो सोड़ी देय एतो खाराब आन विणविश्वासी मोन तुमामेएं कोडाआज ने जोवे. 13 पोन जिया दिहोहो "आज्युउ दिही" कोतेहे, तेदिहीं जाआं दाड़ख्येए एकमेकाहा हिम्मत आपते रोवा, काहाके तुमामेएं कोडोज बी पापोम पोड़ीत डांबराय ने कोअहूं जोवे. 14 जर आपू सुरुवातीइ विश्वास आखरी जाआं मिकीत रोहूं, ताहांज आपू ख्रिस्ताअरी भागिदार होय.

15 जेहलोहो वसनोम लेख्योहो के,

"आज जर तुमू तियाआ आवाज उनाअहा ताहां,

तुमाआं मोने वातड़े मा कोअहा,

जेहलोहो तुमाआं डायहां देवोअ विरुद्दाम कोअयोतो."

16 देवोअ आवाज उनाइत बी देवोहो खोत लागाड़्यी तें कोड्ले माहें ओते? मोशे जियांहां मिसर देसोम रोत काडीत लेतायू तेंज माहें ओते ना? 17 आन देव सालीही वोरह्ये जाआं कोड्ला माअहोंअरी खोतात रोयू? जियां पाप कोअयू आन जियांआं तोड़े एहेंज रानोमेहें पोड़ीत रोये तें तेंज माहें ओते ना?✝3:17 गणती 14:29 18 आन कोड्ला माअहोंअ बाप्तिम देवे शप्पत खादी के, "जो आरामोअ जागू आंय आप्युहू तिहीं तुमू आवित ने सेकाहा?" जियां देवोअ आदेश टाली देदू तियांआं बाप्तिमेहेंज ना?✝3:18 भजन 106:24-26 19 ताहां इंहीं आपू पालित सेकतेहे के तियां विश्वास तोड़्यू तिहीं वाअहीं तें ने पोतीत सेके.