1 देवोअ आरामोअ जागामेहें जाअलोअ जोड़्योहो तों आथवसन ओमे जाआं सालुज होय, ताहां, तुमामेर्‍योअ एखू तिया आरामोंअ जागामेहें जाअलोअ ने रोत जाअहूं जोवे कोत बिअहूं जोवे. 2 काहाके आपुहूं बी इस्राएलवालाआं होस हाजी बातमी जोड़्यीही, पोन जे खबर तें उनाअये तियीइ तियांहां किज फायदू ने ओवू; काहाके उनाअनारा ते खबर मोनोमेहें विश्वासो वाअहीं ने स्विकाऱ्यी. 3 पोन आपू जियां विश्वास कोअयुहू, तिया आरामोअ जागामेहें जातेहे; जेहेंकोइत तिये कोयोहो,

"आंय खोतात कोइत शप्पत खादी के,

तें माआं आरामोअ जागामेहें आवित नाहां सेकानारे."

4 काहाके हाँतवा दिहोअ बाप्तिमेहें तिये वसनोम एहें कोयोहो के, "देवे हांत दिहोम आखे कामें नेवरीत कोइत आराम कोअयू." 5 आन फाशुउ तो कोहे, "तें माआं आरामोअ जागामेहें आवित ने सेकनारे" 6 ताहां, ए गोठी बाकी होय के, केतेहे तेबी जोएं आरामोंअ जागाम जाअलोअ रोयेहे, आन जियांहां पेल देवोअ हाजी बातमी होंबलाड़्यीही, तें आदेश ने मान्ये तिहीं वाअहीं तें आरामोअ जागाम पोतीत ने सेक्ये. 7 तिहीं वाअहीं तिये एक खास दिही ठरवीत कोइत एता दिहोअ फासाड़ी दाविदोअ पुस्तकोमेहें तो

"आज्युउ दिही" कोहे.

जेहें कोइत पेल कोयोतो, "जर आज तुमू तियाआ शब्द उनाअहा ताहां, तुमाआं मोन कठीण मा कोअहा."

8 काहाके, जर यहोशवा तियांहां आरामोअ दिहोम पोताड़ी देतू, ताहां देव बिहीरा दिहोअ गोठुन्ने काटतू. 9 तियाहा कोत ओं जाइंत ल्या के देवोअ माअहोंअ काजे आरामोअ दिही*4:9 आरामोअ दिही आरामोअ हांतवु दिही जो पवित्र दिही होय. बाकी होय; 10 काहाके जों बी आरामोअ जागामेहें पोतोहो, तों तियाआ कामे पुरे कोइत देवोअ होस आराम कोअयुहू. 11 ताहरेए, आपू बी तिया आरामोअ जागामेहें जाअलोज कोशित कोअहूं जोवे, जेहलोहो इस्राएलवालां देवोअ आदेश तोड़्यू तिहीं वाअहीं तियांहां आरामोअ जागाम ने जाअहूं जोड़्यो तेहेलोहो आपू ने कोइलो.

12 काहाके देवोअ वसन जिवतो, काम कोअनारो, कोड्ली बी बेन तार्‍यी तारवाआ रोत जास्ती वाडालो होय, आन जिव आन आत्माहां पेरो-पेरोम आन आडो-आडोम रोत आरपार सोरकीत जाहे आन मोनोअ भावना आन विसारोहो फारकीत लेहे. 13 कोलीइ कोड्लीज वस्तु देवोअ नजरे रोत निकाअली कायनाहां, आन तियाहा आखी गोठीइ इसाब आपुहूं पोड़नारु होय, तियाआ डोआअ हुंबर आखी वस्तु खुल्ली आन सापड़े होय.

14 तियाहा कोत जाहां आपाआ एहेलुहू डायु पुंजारु*4:14 डायु पुंजारु देवोअ आन माअहोंअ विसमेर्‍युउ वोग्यु होय, जो होरगाम गोयुहू, मोन्ज्ये देवोअ बेटुह्हू ईसु, ताहां आवा, आपू जो विश्वास कोअतेहे तियाहा पाक्कू वातड़ू तोइत रोहूं. 15 काहाके, आपाआ एहेलुहू डायु पुंजारु कायनाहां जो आपाआ कमजोरी मेहें आपाअरी दुखी ने ओत सेके; पोन तो आपाअ होसर्‍युउ परिक्शाम ते पोड़्यू, तेबी तो निर्दुस निहींयू. 16 तियाहा काजे आवा, आपापोअ दया ओवे तेहें कोत दयाआ राजगादीइ*4:16 दयाआ राजगादीइ देवोअ बोहीइलोअ कुर्सी. सामने हिम्मत कोइत जाहूं आन आपाआ गरज पोड़े तेहेली वेले आपुहूं मदत जोड़ीत सेकुहूं जोवे कोत तियी मेरवानीइं स्विकार कोअहूं.