1 माआं पाव्हीइला, आंय कायदाहा जांअनाराहा कोहो के जाअहूं जाआं माहुंउं जिवतो रोहे, ताअहूं जाआं तियापोअ कायदाआ आधिकार सालेहे ओं ते तुमुहूं मुंदूज होये. 2 काहाके वेहवाल ओवली बोयोंअ तियीइ माटी जिवतु होय ताअहूं जाआं कायदाआ पुरमाणे तियाअरी बांदाअली होय. पोन जर तो माटी मोइत गोयू, ताहां ते माट्योअ बंधनोम रोत सुटीत गोयी. 3 तियाहा काजे जर माट्योअ जिवताइज ते एखा बिहीरा माट्योअरी जिवे, ताहां सिनालीइं गोणाय, पोन जर माटी मोइत गोयू, ताहां ते तियाआ कायदाम रोत सुटीत गोयी, आन तिहीं रोत तियी बिहीरु माटी होदीत बी लेदू, तेबी सिनालीइं ने गोणाय. 4 तेहेंज कोइत माआं पाव्हीइला, ख्रिस्त शरीरो वाअहीं मोयु ताहां तुमू बी कायदाआ काजे मोल्ये समजा, काहाके जो मोल्‍याम रोत जिवीत उठ्यू तिया ख्रिस्ताआ ओत सेको: मोन्ज्ये आपू देवोहो फल आपित सेको. 5 काहाके जेहेलाम आपू शरीर सोभावोम ओते, तेहेलाम पापोअ लालसाय आपाआ शरीरोमेहें ओती, जे कायदाअ वोजेसे मोतोअ फल उत्पन्न कोइलाआ काजे काम कोअतीते. 6 पोन जियाअ बंधनोम आपू ओते, तियाआ काजे मोइत कोइत ओमे कायदाआ बंधनोम रोत सुटीत गोये, काहाके लेख्याआ जुनी पद्धती पोअ नाहां, पोन आत्माआं नोवी पद्धती पोअ ओमे देवोअ सेवा कोअतेहे.

7 ताहां आंय कि कोंव? केहें कायदु पाप होय के? जलम नाहां! पोन कायदु ने रोतू ताहां आंय पाप कि होय तो माहूं ने समजाअतो. कायदु जर ने कोतू, "लालस मा कोअही," ताहां माहूं लालस कि होय तो ने समजाअतो. 8 पोन पापे गालो पालीत आदेशोअ वापर कोइत मामेहें आखी बातीइ लालस उत्पन्न कोअयू, काहाके कायदा सिवाय पाप मोल्यू होय. 9 आंय ताम पेल विण कायदाआ जिवतु ओतू, पोन जेहेलाम आदेश आयू, तेहेलाम पाप जिवतु ओत गोयू, आन आंय मोइत गोयू. 10 आन तोज आदेश जो माहूं जिवन आपनारु ओतू तो माआं काजे मोत बोण्यू. 11 काहाके पापे वेल पालित आदेशो वाअहीं माहूं ठग्यू, आन तियाज वाअहीं माहूं माइत बी टाक्यु.

12 तिहीं वाईं कायदु सोकू होय, आन आदेश बी सोकू, बोराबर आन हाजू होय. 13 ताहां जो हाजू ओतू तो माआं काजे मोत बोण्यू के? जलम नाहां! पोन तियी हाजी वस्तू वाअहीं पाप माआं काजे मोतोअ लेतावनारु बोण्यू, ताहां आपू देखीत सेकतेहे के खोरीज पाप केतोहो खाराब होय जो देवोअ आदेशो वाअहीं पाप हाद्दीइ बाहर पापी ठरे.

14 आपुहूं मुंदू होय के कायदु ते आत्मिक होय, पोन आंय दुन्‍यादारीइ आन पापोअ आथे वेसाअलु एहेलुहू होय. 15 जों आंय कोअहो तों माहूं नाहां मुंदू जातू; काहाके जो कोअहूं जोगोहो होय तो आंय नाहां कोअतू, पोन जियाअ माहूं सीस आवेहे तोंज आंय कोअया कोअहो. 16 जों ने कोअहूं जोवे तोंज आंय कोअतुय, ताहां आंय मानोहो के कायदु हाजू होय. 17 ताहां एहेलिही दशाम तियाआ कोअनारु आंय नाहां, पोन पाप होय जो मामेहें रोहे. 18 माहूं मुंदू होय के मामेहें मोन्ज्ये माआं डिलोमेहें कोड्लीज हाजी वस्तू नाहां रोती. हाजो कोइलोअ इश्शा ते मामेहें होय, पोन हाजे कामे मावाईं नाहां ओवते. 19 काहाके जिया हाजा कामोअ इश्शा आंय कोअहो, तों ते मावाईं ओवतो, पोन जिया खाराब कामोअ इश्शा नाहां कोअतू, तोंज कोई देहो. 20 ताहां जियाअ इश्शा आंय नाहां कोअतू तोंज कोअहो, ताहां तियाआ कोअनारु आंय नाहां, पोन मामेहें रोनारु पाप माहूं तों कोआड़ेहे.

21 एहें कोइत माहूं ओ नियम जोड़ेहे के, जाहां आंय हाजो काम कोइलोअ इश्शा कोअहो, ताहां बाक्तोज मावाईं ओत जाहे. 22 काहाके आंय माआं जिवोमेहें ते देवोअ कायदा वाअहीं खुब खुस रोहो. 23 पोन माआं डिलोमेहें माहूं बिहीरीज बातीइ कायदु देखाअहे, जो माआं बुद्दीइ कायदाअरी सुलाअहे आन माहूं पापोअ कायदाअ बंधनोम टाकेहे, जो माआं डिलोमेहें होय. 24 आंय केतोहो खाराब नसीबवालो माहुंउं होये! माहूं या मोल्या शरीरोम रोत कोडो वासाड़े?

25 प्रभु ईसु ख्रिस्ता वाअहीं आंय देवोअ आभार मानोहो जो माहूं सुटका आपेहे! तिहीं वाईं आंय माआं बुद्दी वाअहीं ते देवोअ कायदाआ सेवा, पोन डिलोवाअहीं पापोअ कायदाआ सेवा कोअहो.