Romanos 9

देव आन तियाआ माअहें

1 आंय ख्रिस्तामेहें खोरीज कोहो, आंय खोटो नाहां गोगतू आन माआं दिमाक बी पवित्र आत्मामेहें साक्शी आपेहे. 2 के माहूं जास्ती रोड़वाआ आवेहे, आन माआं मोन सादाज दुख्या कोअहे. 3 काहाके माआं पाव्हीइलाआं काजे जे नातामेहें माआं कुटूंबाआ होय, तियांआं वाखरी माआं एहेलिही बी इश्शा ओवत्ली के माहूं देवोअ हाराप लागीत जातू आन आंय ख्रिस्ता रोत सेटे ओत जातू. 4 तें ताम इस्राएलवाले होय, आन पोहल्या पोर्‍याअ आधिकार आन महिमा आन आथवसन आन कायदु , देवोअ खोरी भक्तीपद्दत आन शप्पत तियांआंज होय. 5 डायहां बी तियांआंज होय, आन ख्रिस्त बी डिलोअ इसाबे तियांआंज मेर्‍युउ ओवू, जो आखापोअ राज कोअहे तो देव हादाफल धन्यवादीत होय! आमेन.

6 पोन तेबी देवोअ वसन फुकट ने गोयो, काहाके जें इस्राएलवाले होय, तें आखेज खोरे इस्राएलवाले नाहां; 7 आन नाहां अब्राहामोअ पारवाडीइ कोत आखेज तियाआ पोर्‍ये नाहां ठरते, पोन लेख्योहो के "इसहाकोपोअ रोतुज ताआ पारवाड़ गोणाय." 8 ताहां याआ अर्थ एहेलोहो ओवो के दुन्याआ रितीइ परमाणे उब्जीइल्ये पोर्‍ये देवोअ पोर्‍ये नाहां, पोन आथवसनोअ पोर्‍येज पारवाड़ीम गोणाअतेहे. 9 काहाके आथवसनोअ शब्द ओं ओतो के, "आंय यी फेरे आयुहू एहेंज कोइत आविहीं आन साराहा एक सोऊ ओवे."

10 आन तेतोज नाहां, पोन रिबेकाआ बी इसहाकोपोअ रोत जुड़वा पोर्‍या ओवा. 11 ओमे जाआं पोऱ्ये नेजी ओवेते, आन तियांआं हाजो नेत बाक्तो कोइलोअ पेलुज देवे तियीही कोत देदो के, "डायु पोर्‍यू हानीइलाआ सेवा कोए." 12 काहाके ओं आखो याआ काजे ओवो के देवोअ निवड़ीइल्यू उद्देश कायम टिकीत रोअहूं जोवे, जो मोनव्योअ कर्माआ परमाणे नाहां पोन देवोअ मोर्जीइ परमाणे होय. 13 जेहलोहो वसन कोहे के, "आंय याकोबोपोअ मेर कोअयी, पोन एसावोहो नाकारी देदू."

14 ताहां का आपू एहें कोत सेकतेहे के देव अन्याय कोअहे? जोलोम नाहां. 15 काहाके तो मोशेहे कोहे, "माहूं जिया कोडापोअ दया कोओ लागे तियापोअ दया कोअहीं, आन जिया कोडापोअ माया कोओ लागे तियाज पोअ माया कोअहीं." 16 ताहां ओं आखो मोनवीइ इश्शा के कामोवाईं नाहां पोन दया कोअनारा देवोप रोत होय. 17 तिहींज वाईं ताम वसन फारो राजाहा कोहे के, "आंय ताहूं याआज काजे उबू कोअयुहू के तामेहें आंय माआं सेक्ती देखाड़ीत सेको, आन माआं नावोअ परसार आखी धरतीपोअ ओत सेके.*9:17 निर्ग 9:16" 18 तियाहा काजे देव जियापोअ दया कोओ लागे तियापोअ दया कोअहे, आन जियाहा डांबऱ्यू कोओ लागे तियाहा डांबऱ्यू कोइ देहे.

देवोअ खोत आन तियाआ दया

19 ताहां यी गोठीपोअ तू माहूं कोही, "एहेलोहो ओय ताहां देव फाशुउ माहूंपोअ काहा दोश लागाड़ेहे? देवोअ इश्शाहा कोडो विरोध कोइत सेकेहे?" 20 ए दोस, तू कोडू होय जो देवोअरी सुलाअहे? केहें बोणावल्यी वस्तु बोणावनाराहा कोत सेकेहे के, "तुमे माहूं एहेलुहू काहा बोणायू?" 21 केहें एकाज कादवोअ उंडाम रोत एक बासन खास कामोअ काजे आन बिहीरो बासन किरकोड़ कामोअ काजे बोणावीइलोअ कुंबारोअ आधिकार कायनाहां के?

22 तेहेंज कोइत देव तियाआ खोत देखाड़ीइलोअ आन तियाआ ताकत देखाड़ीइलोअ इश्शा ओती तेबी तिया आरवीइलोअ काजे बोणावल्या खोतेए बासनोअरी तो जास्ती धिर खेट्यू. 23 तिये ओं याआ काजे कोअयो, काहाके जियांहां तिये महिमाअ काजे पेलूज रोत तियार कोअयेते तियां दयाआ बासनोपोअ तो तियाआ महिमाअ धनोहो प्रगट कोइत सेके. 24 आन तें दयाआ बासने आपू होय जियांहां तिये फक्त यहुदीमेहें रोत एतोज नाहां पोन बिगर यहुदीमेहें रोत बी हाद्ये. 25 जेहेंकोइत तो होशेए पुस्तकोमेहें बी कोहे:

"जे माहें माआं ने ओते,

तियांहां आंय माआं माहें कोहीं;

आन जियांपोअ माआं मेर ने ओती,

तियांपोअ आंय मेर कोअहीं.

26 आन एहेलोह ओवे के जिया जागामेहें तियांहां, ‘तुमू माआं माहें कायनाहां’ एहें कोयोतो,

तियीज जागेहे तें ‘जिवता देवोअ पोर्‍ये’ कोवाय."

27 आन यशया इस्राएलोअ बाप्तिमेहें आअड़ी आअड़ीइ कोहे, "इस्राएलवाला माअहोंअ गणती दोर्‍याआ रेटाआ बोराबर ओय, तेबी तियांमेहें रोत थोड़ेज माहें वासाय. 28 काहाके प्रभु तियाआ वसन धरतीपोअ वेगो पुरो कोए." 29 तों यशये पेल बी कोयोतो, "सेनाधीश प्रभु जर आपाआ काजे थोड़ीक पारवाड़ी ने सोड़तू, ताहां आपू सदोमोअ होस ओत जाते, आन गोमोराअ सारके ओत जाते."

इस्राएलवाले आन हाजी बातमी

30 ताहां ओमे आपू ओं कोहूं के, जें बिगर यहुदी माहें सतीपणोहो ने होदतेते, तियांहां सतीपण जोड़ीत गोयोहो, आन तों सतीपण विश्वासोवाअहीं जोड़ेहे; 31 पोन इस्राएलवाले माहें, जें सतीपणोअ काजे कायदाआ पालन कोअतेते, तें तिहीं जाआं ने पोते. 32 तें कि ओवले? काहाके तें विश्वासोवाअहीं नाहां, पोन कामों वाअहीं सतीपण होदतेते. तें ठोकाइलोअ डोणोपोअ ठोकात जात पोड़्ये. 33 जेहलोहो वसन कोहे,

"पाला,आंय सियोनोमेहें एक ठोकाइलोअ डोण,

आन होरकीत पोड़ीइलोअ खड़को मिकोहो,

आन जों कोडो तियापोअ विश्वास कोए तों ने होरमाय."