Marcos 9

17 Baha mundu mmonga mu lila lipinga lya wandu akamyanga, "Mvula, nimyegha mwana ghangu kwa wenga, akiva na lihoka amgholile akotoho kulonga. 18 Paamuhikila angumvamila, na kumguwisa pahi na kumghola ahumwi na mifulufulu mumlomu, akihyagha malino na kuwela kukangamala higha yogha. Niwaluwili wayitikila ghako wamhumisi hayu lihoka ila wawesa ngʼogha."

19 Yesu akawalongela, "Mwenga kiwelekwa kivile ng’ogha na ukwinila. Nitelikala na mwenga mbaka ligha? Niwapapa mbaka ligha? Mumyeghi kwa nenga." 20 Wakamyegha kwa Yesu.

Lipindi lilalila yula lihoka paamwonili Yesu, akamtaya mwana kihinduhindu, na mwana akaguwa pahi, akaghalahuka na kuhumisa lifulufulu mumlomu. 21 Yesu akamkonya tati wa yula mwana, "Akolilwi na mighalu hagha kuhuma ligha?"

Mweni akamyanga, "Kuhuma uwana ghaki." 22 "Na lipindi kwa lipindi lihoka hali lingumguwisa mulyoto na mmasi, ili limyalamise nesu. Hinu, ikiva unguwesa, utuwoneli luhungu na kututanga."

23 Yesu akamlongela, "Kwa niki ungulonga, ‘Yiwa unguwesa?’ Yogha yanguwesekana kwa yula avile na ukwinilo."

24 Pala yula tati akalila kwa lilowi, "Ningukwinila. Ila ukwinila wa nenga ukwila ng’ogha, undangi."

25 Yesu pa alilolile lipinga lya wandu linguyongeseka kwa kuloposela kuulongolo ghaki, akalikalipila lila lihoka, " Lihoka umgholayi hayu mwana akotoho kulonga na majogo ningukulongela umhuki mwana hayu na ukotoho kumyingila kangi."

26 Baha lila lihoka likatova lilowi, likamguwisa yula mwana pahi, hinu likamhuka. Mwana awonekanili handa Kahova, hata ghangi walongile, "Kahova"

27 Ila Yesu akamkola liwoku yula mwana mlumi, akamyinula, na mweni akagholoka.