Mariko 6

Yesu etavao viaghu vahe erufu koi

30 Hu vazasughawe vekakirii vekabunguru vakabuna he Yesu, vekambaiya makhabuna veaboiye na kuhinya. 31 Yesu ekavaba, "Tusoni hodi hesilo mheturefufu." Yesu eeyoe to kwaite heelo vahe vakumure veekulita na kuso, chikaboi Yesu na vahina kuu vekabeni madamo ya kua viaghu. 32 Niho vekakutu mashua vekahaka salaghini, vekaso hodi hesilo vahe.

33 Mira vahe vakumure vareavaakho vekuso vekavaile ite nivo, kwato vekagugulu kuli he miang’a mikabuna, vekavakaeiya kuhe, Yesu na Vahina kuu. 34 Yesu areadimi he mashua, ekaakho ifyo la vahe, ekavaahoya mbalamija, kwaite veekhwae sa maalu yesilo mzemo. Kwato ekalholhoshi kuvahinya mburi kumure. 35 Hareahe chamagheri, vahina kuu vekamliaha Yesu, vekamba, "Hodi ii ni roro, na wajiji ni chamagheri." 36 Vaba vahe vaso he vijiji na miang’a iaha sina, varewe viaghu kini. 37 Mira Yesu ekavaba, "Vaoni kune viaghu." Vahina kuu vekamlhasu, "Ho utudumu turevaweiya mikate ididiwe kwa vikhao vya madini ya mihaku mia nu kalo tuvao vaa?" Ka mihaku migirusha ya kuvaweiya viaghu ya vahe vakhabuna.

38 Yesu ekavalhasu, "Mulo mikate mime? Soni murewesia."

Vareafiriti kuwesia, vekakirii vekamba, "Helo mikate mikoi na samaki nu." 39 Niho Yesu ekavaba vahina kuu vavaba vahe vakukhakhaanye mafyo vazokodi di he mahako mailhe. 40 Navo vekazokhodi maifyo ifyo ya vahe mia na vahali vahe hamsini. 41 Niho, Yesu ekadori hu mikate mikoi na hu samaki nu, ekawesia ana he Kiumbi, ekaviaresia, ekaipu hu mikate, ekavao vahina kuu vavakhakhiye vahe. Wato oto ekavakhakhaya vahe vakhabuna hu samaki nu. 42 Kira muwe ekaa, ekakhu. 43 Naho vahina kuu vekadodoli vikhao vya mikate nahu samaki jimerisiye, vekahuti viteju ikhado na vinu. 44 Ka vahe veae ka mikate na samaki veaha vaagiru erufu koi.