Mateus 13

Ayesu bhatendakuatambula nnani ja kulandanikia kwa nakaponga

36 Ngapena Ayesu akaatabhuka bhenibhala bhandu, bhakajingila mu nyuumba. Bhabhaajigana bhabhe bhakaajendelela, bhakaalobholela, "Ntuatambulile kono kulandanikia kwa nakaponga kumigonda."

37 Ayesu bhakaalobholela, "Amundu bhabhapandite mbeju jammbone mu nng’onda nga Mwana bha Amundu. 38 Nng’onda gola nga chilambo, mbeju jammbone nga bhenibhala bhandu yakubhee Umwenye nga gwabhenji. Nambo yeniyela nakaponga nga bhenibhala bhandu bha bhenibhala Abohu. 39 Akaapwati bhabhapandite genigala maheya nga Abohu. Mahuno nga kupela kwa chilambo na bhabhaunanga nga akaatumichi bha Annoongo bha kunani kwa Annoongo. 40 Handa chiibhile yeniyela nakaponga pagalondanikwa pamo na kujochwa mooto, nga chiipakubhee lichobha lya kupela chilambo, 41 Mwana bha Amundu bhapakwaatuma akaatumichi bha kunani kwa Annoongo bhabhalondanike kubhoka mu Umwenye gwabhe bhenibhala bhoa bhabhajambukia bhandu bhatendange mabohu, na bhoa bhabhatendite hilebhe hibohu, 42 na kwa kwaajeanga mu mooto gwa kalipa gwangahimaka machobha goha na konokwe bhapakugutanga na kuyaga mino. 43 Ngapena, bhenibhala bhandu bhammbone bhapakung’anyima handa lyobha mu Umwenye gwa Atati bhabhe. Henela bhabhakweti na machikilo ga kujahonikia na bhajohanikie!"