Amatayo 3

Majigano ga Ayohana Ambatichaji

1 Pagakapeta machobha gajingi Ayohana ambatichaji bhakapitila, bhakajemeka kutangacha lilobhe lya Annoongo mu likonja lya kuchilambo cha Yudea bhakatangacha bhabhi kulobhola, 2 "Mutendebhukange na kugalekanga mabohu ginunji, kwa kubhee Umwenye gwa Annoongo gutekubhandikila." 3 Habha nga Ayohana nga bhenibhala yakubhee Alondohi Aisaya bhakalobhola nnani jabhe pabhakalobhola,

"Mundu atenda kema kubhoka kulikonja,

‘Nhalakihange ndela ligongo lya Hangwana,

nchibhekange maha kwaapokela Hangwana.’"

4 Ayohana akawala ngobho jijikatotwa kwa manjoja ga chinyama jwakemitwa ngamia, na akachitabha nkanda gwa limbendela mu chibhuno chabhe. Chakulya chabhe chikabhee mapalale na bhuchi. 5 Bahi, bhandu kubhoka mu chilambo cha Yelusalemu, na kubhoka kuchilambo cha Yudea, na hilambo yoha kubhandikila na loochi lwa Yoludani, bhakaajabhulila, 6 na jonojwe bhakagalekanga mabohu gabhenji na kwabhujila Annoongo, na jonojwe Ayohana akabhabatichanga mu loochi lwa Yoludani.