1 *Ibando i Nsango Ndɔti enka Yesu Kilito, Ngana onka Nyambe. 2 Boiko lɔkɛtɛmɛ bɔnɛ o buku enka nteti Isaya:

«Nangotinda motwantomo momi o boho bɔwɛ,

nokolondela mboka.

3 Iyoi imɔ itotwa o bohobe:

Bolonda mboka enka Nkolo,

bomotandiele mianzo tɔi*!»

4 Yoane Moini aɛnɛnɛki o bohobe; alalolaki boinami bo mbutoli meloko na boili bwabinyi bɔ nsɔpi. 5 Ebumu enkuma e Yudeya mpe bakihi ba Yelusalema bahaka onka nde; bainamaka na nde o Yaladɛnɛ na nyimenyi nsɔpi i balɔkɔ. 6 Yoane alɔtɔkɔ mpoho i nyama lina kamela* na monsenge mo mpoho i nyama o ikɔngɔ*; alɛkɛkɛ biɛnzuka mpe na mpako i lia. 7 Alalolaki: «Oiko oye o mbiha e mi ampenda na nguya; mpe timbe mbɔbɔtɔ nokutama noutola mehinga me bikoto binande. 8 Mi naoboina na mai, ya nde, angoboina na Molimo mɔ Pɛtɔ.»

9 Lendaka, o maina malɔkɔ, Yesu aimaki o Nazaleta e Galilaya mpe ainamaki na Yoane o Yaladɛnɛ. 10 Ohapwaki nde o mai, aoywɛnɛ liko iolipwa mpe Molimo mɔ Pɛtɔ mosulwa onka nde lo emenga. 11 Mpe iyoi nyaima o Lobola: «Wɛ ole Ngana omi o lolango; nabulwa ba na wɛ*.»

12 Nko o elaka eiko, Molimo mokamanyaki Yesu noha o bohobe. 13 Maina ntuku inɛi na mokoka Yesu alengwamaki na Satana. Aliki mputa na nyama i malia mpe mentomwa menka Nyambe memotielaki.

14 O mbiha enka Yoane* nokapema, Yesu ahaki o Galilaya; alalolaki Nsango Ndɔti enka Nyambe mpe atepelaki bɔnɛ: 15 «Elaka eokoka, mpe Bonkumu bonka Nyambe boya bɛlɛbɛlɛ! Bwenza meloko mpe bwamba Nsango Ndɔti!»

16 Nga bɔkɛndɛkɛ Yesu o ntundu e ibeke i ebale e Galilaya, aɛnɛki Simona na Andele e mohikɔlɔ onande, baboka boluba o ebale, baliki balubi. 17 Yesu abaebiaki ndɛmbɔ: «Bonziele mpe nangoboyalia balubi ba bato.» 18 Nko o elaka ɛlɔkɔ, bakambiaki maluba ma balɔkɔ, bamoiyelaki. 19 Yesu akɛndɛki ngano lopwa, aɛnɛki Zake na mohikɔlɔ o nande Yoane, bana banka Zebedai, baliki o bwato nolonda maluba ma balɔkɔ. 20 Nko o elaka ɛlɔkɔ ababeyaki; mpe bakambiaki ihe e balɔkɔ Zebedai na basali o bwato, bamoiyelaki.

21 Yesu na baekoli banande bahaki o Kapalanauma. Mpe o boina bo sabala, aɔtwaki o itumba i lobondela inka Bayuda mpe alakaki. 22 Malako manande mabaɔtɛlɛki o meloko, na itina abalaka lo moto ole na bonkumu ya lo balaki ba mokeko pɔ. 23 Lendaka, mpiko o itumba i lobondela inka Bayuda, eliki na moto ɔmɔ otungiamaki na molimo mo bompunda. Atotwaki: 24 *«Ondi be na iho, Yesu e mohi Nazaleta? Oya nɔtɔhɛkɛyɛ? Naeba bole wɛ: Mɔpɛtwami monka Nyambe!» 25 Yesu amwamaki mpe aomohangela: «Kiha nyɛ bɛlɛ onka moto ɔnɛ.» 26 Molimo mo bompunda mo mopukuhaki na nguya mpe mɔbɛlɛki onka nde ntotwa na nguya ependa. 27 Balɔkɔ bankuma baemwaki noyaubola balɔkɔ na balɔkɔ: «Lɔnɛ lwebia be? Lenda ilako i itɛmu ntondiama na bonkumu! Apa lotomo nsa onka melimo me bompunda mpe memona!» 28 Mpe loumu lonka Yesu lwanzwaki o elaka ɛlɔkɔ o ebumu enkuma e Galilaya.

29 Nko o elaka eiko ɛbɛlɛki balɔkɔ o itumba i mondela inka Bayuda, Yesu ahaki nde na Zake na Yoane o itumba inka Simona na Andele 30 Lendaka, nyango e bokilo enka Simona abetamaki nkukama o ntange na itina aliki na bieta; baebiaki Yesu na ihali na boili nde. 31 Abɛlɛmɛki na nde, amokataki o lɔbɔkɔ mpe amɔtɛliaki. Bieta bihilaki mpe abandaki nobapa bindei.

32 Oiyaki mpokwa, ombiha enka mwane nosulwa, babɛkɛlɛki Yesu bakoni bankuma mpe na batungiamaki na melimo me mebe. 33 Boiko, inanga inkuma bakokanaki o boho bo moiho. 34 Yesu abikiaki boike bo bakɔni batungiamaki na male ma lolenge lonkuma mpe abɛliaki boike bo melimo me mebe. Tamepa epohe notepela, na itina memwebaki.

(Lenda mpe Luk 4, 42-44)

35 Na mpendu e melonge, Yesu atɛlɛmɛki, abɛlɛki mpe ahaki o bohobe mpiko, abondelaki. 36 Simona na bakɛndɛki nande bahaki nomokomba; 37 omotanaki balɔkɔ, baomwebia bɔnɛ: «Bato bankuma bakokomba.» 38 Ya Yesu aobaebia: «Totu mbiha enkina, o bihe bile bɛlɛbɛlɛ olongi naisie nolalola Nsango Ndɔti, naitina oiko ele lobo lomboye mi.» 39 Na boiko, akumbolaki o Galilaya enkuma; alalolaki o matumba ma balɔkɔ ma mondela mpe abɛliaki melimo me mebe.

40 Moto ɔmɔ ɔ mɛliɔ amɔbɛlɛmɛnɛki, aɔmɔbɔndɔ mpe aokuki makulubɔngɔ ntepela bɔnɛ: «Kaki olondi, ɔhɔ nɔmpɛtɔlɔ.» 41 Yesu amokelaki molika; ahembolaki lɔbɔkɔ, amokataki ntepela bɔnɛ: «Nalondi, pɛtwamema!» 42 Nko o elaka ɛlɔkɔ, mɛliɔ memohilaki mpe apɛtwamaki. 43 Boiko, Yesu amokokomiaki mpe na ihali amoisenyaki. 44 Mpe aomwebia ndɛmbɔ: «Oyabakaka noyala nkwebia nsa moto ɔmɔ. Ya nsɔ noyaɛnia onka nkanga enka Nyambe mpe paa ikapo na boili mpɛtwami ɛwɛ nga bohangaki Mɔsɛ, mpiko bangobata motato*.» 45 Ya ohaki nde, aobanda nolalola nsango. Ekelaki mbɔ Yesu ayale nkɔtwa polele o inanga; ya aliki nko o nanda e inanga o manda ipa bato. Mpe bato baimaki mbiha na mbiha noya onka nde.