1 Boiko Yesu abandaki notepela na balɔkɔ o bikolongo: «Moto ɔmɔ ahikaki itia i mete me vinyo; aikombelaki na mete, atimaki ipoku i nyami mambo, mpe aotonga eliko enka babateli. O mbiha aikatiaki onka bauteli ba itia i mete me vinyo mpe ahaki*. 2 Oiyaki elaka, atindaki mosali mɔmɔ onka bauteli ba itia nomopwela inande ibondo i mambo. 3 Bauteli ba itia bamobutaki, bamokulaki mpe bamoisenyaki nko na makata. 4 Na boiko, mɔmɛnɛ itia aisiaki nobatindela mɔmɔ mosali; na oiko mpe, baomokula o motu mpe baomonyaka. 5 Aisie notinda monkina, oiko mpe, baomoboma; mpe bamɔ boike bakulamaki nkutu mpe bankina babomamaki. 6 Mɔmɛnɛ itia apalemaki nko na ngana o nande o mwele ɔmɔ o lolango. Amotindaki o mbiha e balɔkɔ bankuma ntepela mbɔ: "Bangona ngana omi o mwele." 7 Ya bauteli ba itia batepelaki o iyɔngɔ i balɔkɔ mbɔ: "Ɔnɛ motuki o ibula! Boyaka, tomobome, mpe ibula ingoyala iyaiho!" 8 Baomobuta, baomoboma mpe baomouha o nanda e itia i mete me vinyo. 9 Longokele mɔmɛnɛ itia i mete me vinyo be? Angoya, angoboma bauteli ba itia mpe angoipa onka bauteli bankina. 10 Inyo tabotangeli nkɛti inɛ:

"Ibɔkɔ iuhaki batongi ba itumba,

iya ibɔkɔ iotikama o ikono itumba.

11 Loiko loima onka Nkolo,

o maiho mayaiho, lole mpapo!"»

12 Bakɛndii banka Bayuda bakombaki nomobuta, ya baoyoka impinga i bato bɔɔmɔ na itina baɔhɔlɔki mbɔ ahɛkɔlɔki ekolongo eiko na boili balɔkɔ. Bamokambiaki mpe bahaki.

13 Batindelaki Yesu ngano Bapalusi mpe ngano bato ba etuluku enka Elode mbɔ bamɔlɛbɛle ilonga nomotepeya. 14 Baoyoye noubola Yesu bɔnɛ: «Molaki, tweba mbɔ wɛ otepelake li hɔlɔ; mpe opokake bɔɔmɔ na boili bikaneno binka bato mpe opolendake bilongi binka bato, ya olakake mboka inka Nyambe o lolenge lo hɔlɔ. Lopaema epohe, oho na mpe mpamba nouta mputi onka Kaisala? Tɔbɔtɔ nouta na mpe toyale nkouta?» 15 Ya Yesu ebaka lwalia lo balɔkɔ aobahangela bɔnɛ: «Inyo bɔndɛbɛlɛ ilonga itina be? Bɔmbɛkɛle mpata ɛmɔ, naondi nakɛne.» 16 Baomɔbɛkɛle ɛmɔ, Yesu aobaubola ndɛmbɔ: «Elongi mpe nkɛti inɛ ile inka nɔni?» Baomoisenyele bɔnɛ: «Inka Kaisala.» 17 Na boiko, Yesu aobahangela bɔnɛ: «Bopa onka Kaisala bile binka Kaisala, mpe onka Nyambe bile binande.» Baemwaki penda na boili mbeko enande.

18 Basadukai baoyoye onka Yesu. Balɔkɔ batepelake mbɔ makundwelo manka bawi tamambe. Bamoubolaki bɔnɛ*: 19 «Molaki, Mɔsɛ atɔkɛtɛlɛki bɔnɛ: "Kaki moto ɔmɔ ale na mohikɔlɔ, aowa mpe aopalia mwali ya takambia bana, abɔti nobala etuka mpe nopa bokundu onka mohikɔlɔ oiko owa*." 20 Baliki bahikɔlɔ nsambo. O boho aobala mwali mpe aowa tabota bana. 21 O bape aobala ngainto oiko, aowa ya tabota bana. O bahato nko boiko, 22 mpe onka balɔkɔ ba nsambo tababota nsa ngana ɔmɔ. O mbiha e balɔkɔ bankuma, na mwali mpe aowa. 23 O makundwelo manka bawi, ongokundwe balɔkɔ, o iyɔngɔ i balɔkɔ, mwali angoyala onka nɔni? Na itina balɔkɔ ba nsambo bamobalaki!» 24 Yesu ababekwelaki bɔnɛ: «Tabombe na ibunga aiko opwebe inyo eyale Nkɛti, eyale nguya enka Nyambe? 25 Na itina, o makundwelo manka bawi, bali na baome tabangoisia noyabala, ya bangoyala lo mentomwa menka Nyambe o Lobola. 26 Na boili bawi babɔtɔ nokundwa, tabotangeli o buku enka Mɔsɛ eteni etepela na boili ibunza ipɛtɛki twɛ? Lolenge lomwebiaki Nyambe mbɔ: "Mi nale Nyambe enka Abalayama, Nyambe enka Isaka mpe Nyambe enka Yakobo*." 27 Tambe Nyambe enka bawi, ya enka bale na bɔmɔi. Na boiko, bole o ibunga ipenda.»

28 Molaki mo mokeko mɔmɔ ahinzaki okaki nde mbɔ bahia lɔmpɛnyɛ mpe aɛnɛki mbɔ Yesu aisenya bɔlɔti. Amoubolaki: «Mokeko be mole o boho bonka menkuma?» 29 Yesu abekolaki ndɛmbɔ: «Mo boho mole: "Langola, Isalaele! Nkolo Nyambe e yaiho ale nko nde kaika. 30 Ondaka Nkolo Nyambe ɛwɛ na moloko mɔwɛ monkuma, na molimo mɔwɛ monkuma, na bwanya bɔwɛ bonkuma mpe na nguya ɛwɛ enkuma*." 31 Lenda mo mepe: "Ondaka moninga moto lowɛ mɔmɛnɛ." Tembe na mokeko monkina mopenda bɔnɛnɛ lo meiko*.» 32 Molaki mo mokeko aomohangelaki ndɛmbɔ: «Bɔlɔti ba, Molaki! Otepela hɔlɔ: Nkolo ale nko nde kaika mpe tembe na Nyambe enkina nko nde*. 33 Mpe nomonda na moloko mɔwɛ monkuma, na nzebi ɛwɛ enkuma, na nguya ɛwɛ enkuma, mpe noonda moninga moto lowɛ mɔmɛnɛ. Loiko lole bɔlɔti penda mputu inkuma mpe ntumbi meboma*.» 34 Ɔɛnɛki Yesu mbɔ aobekola na nzebi, aomohangela ndɛmbɔ: «Tombe iteta na Bonkumu bonka Nyambe.» Na boiko, moto nsa ɔmɔ taisia no moubola lobo.

35 Nga bolakaki Yesu o itumba i Nyambe aubolaki nɛmbɔ: «Balaki ba mokeko baɔhɔ notepela mbɔ Kilito ale o inkana inka Dawidi lolenge be? 36 Dawidi nde mɔmɛnɛ, ntondiama na Molimo mɔ Pɛtɔ, ndɛmbɔ:

"Nkolo Nyambe atepela onka Nkolo emi:

kiha ɔ lɔbɔkɔ lomi lo loome,

kii o elaka elobe etika mi malanga mawɛ o nse e makaka mawɛ*."

37 Dawidi nde mɔmɛnɛ amobeya "Nkolo": boiko o lolenge be lole nde o inkana inande?»

Impinga iyike i mokaki na ibulwako. 38 O ilako inande atepelaki bɔnɛ: «Boyabatela na balaki ba mokeko baiko balialeka na menkoto me metale mpe baondake ba babeke na boni o manda i makoka; 39 nokihaka o bikili bi boho o matumba ma mondela manka Bayuda mpe o manda i boho o bilambo. 40 Balɔkɔ bapunza biomba binka bituka bi bainto mpe bakela mondela i ntale ntale. Bangobata ikamba ipenda.»

41 Yesu akihaki nongama na lobulu lontiki makapo, alendaki lolenge lotika impinga i bato mɔhɔlɔ o lobulu lontiki makapo. Babati baike batikaki penda. 42 Mɔmbɔlɔ mɔmɔ mo etuka e ngainto ayakaki mpe atikaki mpata i nkɛ ipe, iɛlɛmɛki na ngano makota. 43 Yesu abeyaki baekoli banande mpe abaebiaki bɔnɛ: «Nko na hɔlɔ, nabwebia bɔnɛ: mɔmbɔlɔ mɔnɛ mo etuka e ngainto aotika penda baiko bankuma bambotike o lobulu lontiki makapo. 44 Na itina balɔkɔ bankuma bambopae mɔhɔlɔ mopa tamoyala na intomba onka balɔkɔ; ya nde, na boili bɔmbɔlɔ bonande, aopa monkuma moliki na nde, monkuma moliki na nde nobikiama.»