1 Ɔbɛlɛki Yesu o itumba i Nyambe, ɔmɔ o baekoli banande aomwebia: «Molaki, lendaka! Lolenge lo mabɔkɔ, lolenge lo matumba!» 2 Yesu aomobekwela ndɛmbɔ: «Ɔɛnɛ matumba manɛ ma manɛnɛ? Na ibɔkɔ imɔ taingopalema o liko inka inkina; inkuma ingopitama.»

3 Okihaki Yesu o monkondo mo Bilaya, ntakatolo na itumba i Nyambe, Petelo, Zake, Yoane mpe na Andele, babulamaki manda ɛmɔ balɔkɔ nande, bamoubolaki bɔnɛ: 4 «Otwebie elaka engokelame ilɔkɔ mpe elembetelo lina be engwebie mbɔ mbo ilɔkɔ ingokelama.»

5 Yesu ababekwelaki ndɛmbɔ: «Boyabakaka mbɔ moto nɔmɔ tabopengoyake. 6 Baike bangoya o lina imi, bangohanga: "Ele mi Kilito!" Mpe bangopengoya bato baike. 7 Ongoke inyo lotepwama na boili bitumba mpe mɛnkɛnkɛ me bitumba, tabokiɛtɛnɛke; yɛngɔ nko ikelame, ya tengoyala nani bouku bonka molongo. 8 Na boiko makundu mangoyatakamena, mpe mankumu na mankumu; o manda na manda, lɔbɔmbi longonyonga, engoyala na melaka me nzala. Engoyala lo ibando i lolamato lo ibota. 9 Boyabakaka. Bangobohembola o meloi mpe o matumba ma mondela manka Bayuda. Bongokulama nkutu, bongotɛndɛmɛ o boho bonka bakɛndii ba bituka mpe na bankumu na boili mi, nopa motato monyainyo onka balɔkɔ. 10 Na itina, yɛngɔ nko Nsango Ndɔti elalwame nani o makundu mankuma. 11 Elaka engobotombe balɔkɔ nobohembola, tabokiɛtɛnɛke boho na lingotepele inyo; ya lingobopaemene o elaka eiko, bobaebiaka, na itina tembe inyo bangoitepele, ya Molimo mo Pɛtɔ. 12 Mohikɔlɔ angohembola mohikɔlɔ onande kii o iwa, mpe ihe lolenge lɔmɔ na ngana onande; bana bangotakamena baboti mpe bangokela mbɔ baboti ba balɔkɔ babomame*. 13 Bongoinama na bato bankuma na boili lina imi. Ya oiko ongoike mpimba kii o bouku angobikiama.

14 «O elaka ɛngwɛne inyo "Mopiti mopenda nsoho" nzayala o manda epa nɔbɔte*, tika motangi aɔhɔle! Boiko, baiko bangoyale o Yudea balotaka o menkondo; 15 oiko ongoyale o mbalasani e liko i itumba inande ayale nkosulwa, taɔtwake o itumba inande nopwa yomba;* 16 oiko ongoyale o itia taisiake o itumba nopwa monkoto monande. 17 Mahɛi onka bainto bangoyale na maemi mpe bangɔlɔumie o maina maiko! 18 Bobondelaka mbɔ iyale nkokelama o motia mo ehio. 19 Na itina, maina maiko mangoyala maina ma mahɛi o lolenge lopa ta lwɛnɛni ima o mabandelo ma yaliaki Nyambe molongo kii aikoyoko, nga bopa lɔlɔkɔ talongoisia noyala*. 20 Mpe kaki Nkolo takɔkɔle maina maiko pɔ, nsa moto ɔmɔ tapobika. Ya na boili baiko bahɔlɔki nde, atenolaki maina. 21 Boiko, kaki moto aobwebia: "Lenda, Kilito ale anɛ!" Na mpe: "Lenda, ale mpini!" Tabomoimenyake. 22 Bakilito ba mbolo mpe ba nteti ba mbolo bangɔɛnɛnɛ mpe bangɔɛnia bilembetelo na mpapo nopengoya nsa na bahɔlɛmɛ, kaki longɔhɛmɛ. 23 Boiko inyo, boyabatelaka! Naobokokopia na inkuma.

24 «Ya o mbiha enka liale liko, mwane mongolima, nsonge tɛngɔmɛngiama, 25 miɔtɔ mengokita nyaima o liko mpe nguya i maliko ingokikihana*. 26 Na boiko, bangɔɛnɛ Ngana onka Moto noya, ningama na biombi, ntondiama na nguya mpe na mankɛmbɔ*. 27 Boiko angotinda mentomwa menka Nyambe mpe angokokanya bahɔlɛmi banande nyaima o nkenge inkuma inɛi, ima o bouku bo nse kii o bouku bo liko*.»

28 «Bɔhɔlɔkɔ lwɛlia na boili mote mo monkake: bikɔkɔ bi mɔlɔkɔ noyala bɔɔlu mpe nobɛlia nkaha, bɔngɔhɔlɔ mbɔ motia mo nzɔbɔlɔ mɔbɛlɛmɛ. 29 Nko boiko, inyo mpe, ongwɛne inyo mbo liko nokelama, bwebaka mbɔ Ngana onka bobato aya bɛlɛbɛlɛ, aya nko o bikuke bi nyainyo. 30 Nko na hɔlɔ nabwebia bɔnɛ: elele ɛnɛ tengoumwa bopa mbo liko inkuma taikokiami. 31 Liko na nse ingɔlɛmwa, ya mbo imi taingoleka.»

32 «Ya boina mpe ola, nsa moto ɔmɔ apobwebe, eyale mentomwa menka Nyambe, eyale Ngana; na ɔmɔ mpamba nko Ihe. 33 Boyabakaka! Bwɛtɛtiaka maiho, na itina bopwebe ongoye elaka. 34 Ele nga lo moto oiko ohaka mokingi: aokambia itumba inande, aohembola bonkumu onka basali banande moto na moto na lotomo lonande mpe apaki lotomo onka mobateli o ekuke nolambaka. 35 Boiko bolambaka, na itina bopwebe elaka engoye monkolo itumba: na mpokwa, na mpe na iyɔngɔ i botio, na melonge mpe na mpendu. 36 Kaki nde noyala nko bɔbɛlɛlɛ pwala mpe nobotana nko o ilɔ. 37 Loiko lobwebia mi, nalwebia onka bankuma: Bolambaka!»