1 Na mbiha, Yesu aisiaki nɔtwa o itumba i lobondela inka Bayuda. Mpiko eliki na moto ɔmɔ okakatala lɔbɔkɔ. 2 Bamɔngɔmiaki nolenda na mpe aɔhɔ nomobikia o boina bo sabala, naitina bakombaki nɔmɔhɛngɛ. 3 Yesu aebiaki moto oiko okatatala lɔbɔkɔ bɔnɛ: «Tɛlɛmɛ, yaka anɛ o boho bonka bato bankuma.» 4 Mpe aobaubola: «Mokeko mohanga be na boili sabala? Nokela bobe na mpe nokela bɔlɔti? Nobikia moto na mpe nomoboma?» Ya balɔkɔ bakihaki nyɛ. 5 Yesu akɛndiaki maiho nobalenda na lɔbɛli, aliki na bobe na boili meloko bolo me balɔkɔ. Aohangela moto oiko: «Hembola lɔbɔkɔ.» Alohembolaki mpe lɔbɔkɔ lobɔtɔki. 6 Ɔbɛlɛki Bapalusi, baohaka nkuku mputa na bato banka Elode nokomba lolenge lɔhɔ nde nobomama.

7 Yesu ayahɔlɔlɔki mputa na baekoli banande noha o ntundu e ibeke i ebale. Impinga i bato i inɛnɛ nyaima o Galilaya imoiyelaki. Mpe na i Yudea, 8 i Yelusalema, o mokokolo mo i Idume, mokokolo mole o nsɛmboka e Yaladɛnɛ, o mokonda mo Tile mpe Sidona, impinga i bato inɛnɛ iyakaki ole Yesu na itina bambaki likelaki nde. 9 Na boiko, Yesu atindaki baekoli banande mbɔ balonde bwato bɔmɔ itina inande nolota impinga taiyomobaha. 10 Nga bobikiaki nde bato boike, ɛlɔkɔ eiko banɛ batungiamaki na makɔni babengelaki nomokata. 11 Ɔmwɛnɛki melimo me bompunda, bayabokaki o makaka manande mpe batotwaki: «Wɛ ole Ngana onka Nyambe!» 12 Mpe Yesu abapaki lotomo noyala nkwebia bole nde.

13 Yesu aoyoiyela o monkondo; mpe aobeya baiko baondaki nde mpe baomɔkɛndɛle. 14 O iyɔngɔ i balɔkɔ, ahɔlɔki liomu na bape babeyaki nde mentomwa menande noyala mputa nande mpe nolalolake Nsango Ndɔti, 15 na nguya ɛmbɛli melimo me mebe. 16 Lenda maina manka baekoli liomu na bape batɛliaki nde: Simona etikaki Yesu lina Petelo*, 17 Zake, ngana onka Zebedai na Yoane, e mɔhikɔlɔ onka Zake mpe Yesu abatikaki lina Bwanɛlɛgɛsɛ, nimbo mbɔ «bato baɛlɛmɛ na bilunza*», 18 Andele, Pilipo, Batelemi, Matayo, Toma, Zake ngana onka Alipaya, Tadeyo mpe Simona, mobuni mo bɔnsɔmi bonka ebumu, 19 mpe Yudasi Isikaliɔtɛ, oiko ohɛngɛki Yesu.

20 Yesu aisiaki o itumba. Mpe impinga isiaki nokokana o lolenge lole mbɔ tabasia nobata nsa epohe nɔlɛ. 21 Na boili nsango ɛlɔkɔ, bokundu bonande bayakaki nomopwa, na itina batepelaki mbɔ: «Motu monande moinda bɔlɔti!»

22 Mpe balaki ba mokeko basulwaki o Yelusalema batepelaki: «Ale na Bɛlɛzɛbule* o iyɔngɔ i nande!» Na mpe: «Ele na boili nkumu enka melimo me mebe omopa nguya nɔmɛbɛlia!» 23 Na boiko, Yesu ababeyaki mpe abahɛkwelaki o bikolongo: «Lolenge be Satana aɔhɔ nɔbɛlia Satana? 24 Kaki bonkumu bɔmɔ bokapwa, bonkumu bɔlɔkɔ tabongoisia nohilama; 25 Kaki bokundu bɔmɔ bokapwa o iyɔngɔ i bɔlɔkɔ, bɔpɔhe noisia nohilama. 26 Mpe kaki Satana ayatakamena nde mɔmɛnɛ, tangoisia nohilama mpe lonande lohila.

27 «Moto apohe nɔtɛlɛ o itumba inka moto o nguya mpe nopunza biomba binande, kaki nani tamondoli mehinga, tangɔhɔ nopunza itumba inande. 28 Na iliɔlɔ, nabwebia mbɔ, nsɔpi inkuma inka bato mpe na menyakatano me balɔkɔ onga na Nyambe bingohabinyama. 29 Ya kaki moto nonyaka Molimo mɔ Pɛtɔ apohe nohabinyama bɔbɛlɛ na bɔbɛlɛ, moto ɔlɔkɔ auliama na boili nsɔpi bɔbɛlɛ na bɔbɛlɛ.»

30 Yesu abaebiaki boiko na itina balɔkɔ batepelaki mbɔ: «Ale na molimo mo bompunda.»

31 Nyango enka Yesu na bahikɔlɔ banande baoyoye; baliki o nanda mpe bamobeyaki. 32 Impinga imolingolaki mpe baomwebia: «Lenda, nyango ɛwɛ na bahikɔlɔ bawɛ ba mele na bahikɔlɔ bawɛ ba bainto bale o nanda mpe bakokomba.» 33 Yesu aobaisenye: «Nyango emi na bahikɔlɔ bami banɔni?» 34 Mpe aokɛndia maiho nolenda baiko bamolingolaki ikumba mpe aobaebia: «Lenda nyango emi na bahikɔlɔ bami. 35 Oiko okela mwano monka Nyambe ale mohikɔlɔ omi, nkana emi mpe nyango emi.»