1 Yesu aumwaki aiko mpe ahaki o mokokolo mo Yudea, nsemboka e Yaladɛnɛ. Impinga i bato isiaki nokokana onka nde mpe aisiaki nobalaka, nga lo mwekehelo monande 2 Bapalusi bamɔkɛndɛlɛki nɔmɔlɛbɛlɛ ilonga. Bamoubolaki kaki lopaema epohe onka boome noboya mwali onande. 3 Yesu abaisenyelaki bɔnɛ: «Mokeko be mobopaki Mɔsɛ?» 4 Balɔkɔ baomobekwela bɔnɛ: «Mɔsɛ apaki epohe onka bome nɔkɛtɛ monkanda mo momi ibala mpe mo mpanzi mwali*.» 5 Boiko, Yesu abaebiaki bɔnɛ: «Mɔsɛ abokɛtɛlɛki mokeko moiko na boili meloko meolo me nyainyo. 6 Ya o ibando i molongo, "Nyambe abakelaki ngainto na mwele*". 7 "Na itina ilɔkɔ, mwele angokambia nyango na ihe enande mpe angobahema na mwali onande, 8 mpe balɔkɔ ba bape bangoyala moto ɔmɔ." Na boiko, bainda bape ya baya moto ɔmɔ.* 9 Boiko tika moto ayale nko lamonya eiko eolamia Nyambe.» 10 O itumba, baekoli baisiaki noubola Yesu na boili lɔlɔkɔ. 11 Abaisenyelaki bɔnɛ: «Kaki boome aoboya mwali onande mpe aobala onkina, aokela mobako onga na o boho; 12 mpe kaki mwali aoboya boome onande mpe aobala onkina, aokela mobako.»

13 Batɔ bamɔbɛkɛlɛki bana ba bakɛ olongi abahangie makata, ya baekoli babapɛlɛki. 14 Ɔɛnɛki Yesu boiko, aokaki bobe mpe abaebiaki ndɛmbɔ: «Bokambia bana baye onka mi! Tabobanyangelake, na itina Bonkumu bonka Nyambe bole bonka baiko bale lo balɔkɔ. 15 Nko na hɔlɔ, nabwebia bɔnɛ: oiko opwambe Bonkumu bonka Nyambe nga lo ngana ɔ mɔkɛ tangɔbɔtwa.» 16 boiko, ababwatelaki mpe abahangiaki makata nobatwakwela.

17 Nga boliki nde o mboka, moto ɔmɔ ayakaki lobango, akukamaki makulubɔngɔ o boho bonka Yesu mpe amoubola bɔnɛ: «Molaki mɔlɔti, nakele be mbɔ natuke bɔmɔi bɔ bɔbɛlɛ?» 18 Yesu amobekwelaki bɔnɛ: «Ombeya mɔlɔti itina be? Tembe na ole mɔlɔti, nko Nyambe mɔmɛnɛ. 19 Oeba mekeko: "Tobomake; tokelake mobako, toibake; totatolake motato mo mbolo; topwake na bwengeha; onaka ihe mpe na nyango ɛwɛ*." » 20 Amoisenyelaki bɔnɛ: «Molaki, nabaka linko inkuma ima nko ɔ bɔlɛngɛ bomi.» 21 Yesu amolendaki na lolango mpe amwebiaki bɔnɛ: «Ohenga lobo lɔmɔ: nsɔ ɔtɛke binkuma bile na wɛ mpe opae mɔhɔlɔ onka bambɔlɔ, boiko ongoyala na bikatelo o Lobola; o mbiha yaka mpe onziyele.» 22 Ya okaki nde boiko, aɔyɔngɔngɔli mpe aohaka na mahɛi na itina aliki mobati. 23 Yesu alendaki mbiha na mbiha, aoywebia baekoli banande bɔnɛ: «Ele liale onka babati nɔtɛlɛ o Bonkumu bonka Nyambe!» 24 Baekoli bakakatanaki na litepelaki nde. Ya Yesu aisiaki nko nobaebia: «Bana bami, ele nko liale nɔtɛlɛ o Bonkumu bonka Nyambe! 25 Lole liale onka nyama ebeyama kamela nɔtwa o iyuhu i lɔnɔngɔ, ele mpe liale penda onka mobati nɔtɛlɛ o Bonkumu bonka Nyambe.» 26 Baekoli bapendaki nko nwemwa mpe bayaubolaki o iyɔngɔ i balɔkɔ: «Na boiko ɔhɔ nobikiama nɔni?» 27 Yesu aobaihimia mpe aobaisenyele ndɛmbɔ: «Lipɔhɛme na bato, na Nyambe ile nsɔhɛmɛ.» 28 Na boiko, Petelo aomwebia bɔnɛ : «Lendaka, iho tokambia binkuma nokoiyela.» 29 Yesu amobekwelaki ndɛmbɔ : «Nko na hɔlɔ, nabwebia bɔnɛ: moto na ɔmɔ apɔhe nopalia itumba inande, bahikɔlɔ banande ba mele mpe na ba bainto, nyango enande, ihe enande, bana banande na mpe itia inande na boili mi mpe Nsango Ndɔti, 30 aoyali nkobata penda monkama o elaka ɛnɛ: matumba, bahikɔlɔ ba mele na ba bainto, ba nyango, bana mpe matia, mputa na mɛnyɔkɔ; mpe o elaka eoye, bɔmɔi bɔ bɔbɛlɛ. 31 Boike bo meboho bangoyala membiha mpe boike bo membiha bangoyala meboho.»

32 Baliki o mboka noiyela o Yelusalema. Yesu ahaki nɔkɛndɛke o boho bo balɔkɔ; baliki na bɔpɔlu mpe ekambi ebaiyelaki baokaki bɔɔmɔ. Yesu aisiaki nopwa baekoli banande liomu na bape mputa nande mpe abandaki nobaebia liliki bɛlɛbɛlɛ nomokelamena. 33 Aobaebia bɔnɛ: «Aiko oiyela iho o Yelusalema mpe Ngana onka bobato angohembwama onka bankanga ba banɛnɛ banka Nyambe na balaki ba mokeko. Bangomopa ikamba i iwa mpe bangomohembola onka bakɛndii ba bihe bi babutu. 34 Bangomɔkɛngɔlɔ, bangomotwa nsɔi, bangomokula mepiokwa, bangomoboma. Mpe, o boina bo mahato, angokundwa.»

35 Na boiko, Zake na Yoane, bana banka Zebedai, babɛlɛmɛnɛki Yesu mpe baomoubola ndɛmbɔ: «Molaki, tolanga otokelele loiko lokokoubola iho.» 36 Abaebiaki bɔnɛ: «Bondi nabokelele be?» 37 Baomoisenyele ndɛmbɔ: «Otopae epohe tokihe o mankɛmbɔ mawe, ɔmɔ ɔ lɔbɔkɔ lɔwɛ lo lome ɔmɔ o lolwali.» 38 Yesu aobaisenyele ndɛmbɔ: «Bopwebe lobo lobondela inyo. Bɔhɔ nomina nkɛni e mɛnyɔkɔ engomine mi, na mpe noinama na einameno e liale engoiname mi?» 39 Baomoisenyele ndɛmbɔ: «Tɔlɔhɔ.» Yesu aobaebia ndɛmbɔ: «Nkɛni eiko engomine mi bongokemina mpe einameno engoiname mi bongoinama*. 40 Ya, nokiha ɔ lɔbɔkɔ lomi lo lome na mpe o lo lwali, tembe mi olopa; lole onka baiko balondamema na Nyambe.»

41 Okaki baekoli bankina liomu boiko, baokaki bobe onga na Zake na Yoane. 42 Yesu aobabeya mpe aobaebia bɔnɛ: «Bweba mbɔ, baiko baobekiama lo bankumu ba bihe babakamanyake na ekoheli, mpe bato ba nguya bainiama inɛɛ na nguya e bonkumu bo balɔkɔ. 43 Ya talombe boiko o iyɔngɔ i nyainyo. Nsande oiko ondi noyala bonɛnɛ o iyɔngɔ i nyainyo, tika ayale mosali mo nyainyo. 44 Mpe oiko ondi no yala moboho o iyɔngɔ i nyainyo, tika ayale mosali monka bankuma. 45 Na itina Ngana onka bobato taya mbɔ bamosalele, ya nosalela mpe nopa bɔmɔi bonande lo nzako nwakola boike bo bato*.»

46 Baiyaki o Yeliko. Nga bɔbɛlɛki Yesu o Yeliko mputa na baekoli banande mpe ngano impinga i inɛnɛ i bato, ebolia maiho ɛmɔ ebeyama lina Balatimayo, ngana onka Timayo, akihaki o ntundu e mboka nobondelaka biomba. 47 Ambaka mbɔ ele Yesu e mohi Nazaleta, abandaki nototwa: «Yesu, Ngana onka Dawidi, onzokele molika!» 48 Baike bamwamaki mbɔ akihe nyɛ, ya nde aisiaki nototwa penda: «Ngana onka Dawidi, onzokele molika!» 49 Yesu atɛlɛmɛki mpe aotepela ndɛmbɔ: «Bomobeya.» Boiko, baomobeya mpe baomwebia ndɛmbɔ: «Kahwa, tɛlɛmɛ, akobeya.» 50 Na boiko, abokaki monkoto monande, atɛlɛmɛki nyumbwa mpe aoyoye onka Yesu. 51 Yesu aomoubola ndɛmbɔ: «Ondi nakokelele be?» Ebolia maiho aomoisenyele bɔnɛ: «Molaki, naisie nwɛnɛ.» 52 Yesu aomobekwala bɔnɛ: «Nsɔ, bwambi bɔwɛ bokobikia.» Nko o elaka eiko, aisiaki nwɛnɛ, mpe aiyelaki Yesu o mboka.