1 Yesu aisiaki nobaebia: «Nko na hɔlɔ, nabwebia bɔnɛ: bamɔ o iyɔngɔ inyainyo tabangowa nkwɛnɛ Bonkumu bonka Nyambe nzaya na nguya.»

2 O mbiha e maina motoba, Yesu aopwa mputa nande Petelo, Zake mpe Yoane, mpe aobatombi o liko i monkondo mo motale mpiko oliki nko balɔkɔ kaika. Aenzaki lɔɔbɔ o maiho ma balɔkɔ; 3 bitobo binande biliki langi langi nko bwe bwe o lolenge lɔpɔhe nsa na moto ɔmɔ anɛ o nse nobiyia*. 4 Elia na Mɔsɛ bababɛlɛlɛki mpe bakɛtɛki miamba balɔkɔ na Yesu. 5 Na boiko, Petelo aohangala Yesu ndɛmbɔ: «Molaki, ele bɔlɔti iho noyala anɛ. Tɔtɛlie biɛmbɛ bihato, ɛmɔ itina iwɛ, ɛmɔ itina inka Mɔsɛ mpe enkina itina inka Elia.» 6 Na iliɔlɔ, taɔhɔlɔ lotepela nde na itina baliki na bɔpɔlu. 7 Eombi eyakaki nobalipa mpe iyoi nyaima o eombi mbɔ: «Ɔnɛ ale Ngana omi o lolango, bomoke*!» 8 Nko o elaka eiko, baekoli balendaki mbiha na mbiha tabaɛnɛ moto nko Yesu mputa na balɔkɔ. 9 Osulwaki balɔkɔ nyaima o monkondo, abapaki lotomo noyala nkɔhɛkɔlɔ nsa onka moto ɔmɔ liɛnɛki balɔkɔ, kii o elaka engokudwe Ngana onka bobato nyaima o bawa. 10 Babatelaki lobo lɔlɔkɔ, ya bayaubolaki o iyɔngɔ i balɔkɔ nimbo enka: «"Nokundwa nyaima o bawa"?» 11 O mbiha, baekoli baubolaki Yesu: «Itina be balaki ba mokeko batepelake mbɔ yɛngɔ nko Elia aye boho*?» 12 Abaisenyelaki bɔnɛ: «Ele nko hɔlɔ Elia aoye boho mpe abɔtie inkuma. Ya itina be lɔkɛtɛmɛ mbɔ yɛngɔ Ngana onka bobato anyɔkwe penda mpe amingwelame*? 13 Ya mi, na bwebia mbɔ: Elia aya, mpe bamokelelaki inkuma liondaki balɔkɔ nokela, nga bɔkɛtɛmɛki na boili nde. Bakelaki na nde nga bondaki balɔkɔ, nga botepela nkɛti na boili nde.»

14 Oiyaki balɔkɔ bɛlɛbɛlɛ na baekoli banɛ bankina, baɛnɛki impinga i inɛnɛ i bato iyobalingola mpe balaki ba mokeko bahia lɔmpɛnyɛ na balɔkɔ. 15 Ɔɛnɛki bato Yesu, impinga inkuma iemwaki mpe ipuhwaki noha nomobeka. 16 Yesu aoyoubola baekoli banande bɔnɛ: «Lobo lohia inyo na balɔkɔ lɔmpɛnyɛ be?» 17 Ɔmɔ oliki o impinga amobekwelaki mbɔ: «Molaki, nambokɔbɛkɛle ngana o mi o mwele, atungiama na molimo mo mobe momotika ebubu. 18 Molimo momokatoyake manda inkuma, momokitiake o lɔbɔmbi, ngana aobɛlia nzulu o munya, aokela makiɛti mpe aɔlɛkwa bionge. Naubolaki baekoli bawɛ nɔmɔbɛlia, ya tabaɔhɔ.» 19 Yesu abahangelaki ndɛmbɔ: «Elele epa na bwambi! Nangoyala na inyo kii elaka be? Nango boikela mpimba kii elaka be? Bɔmbɛkɛle ngana oiko.» 20 Bamɔbɛkɛlɛki nde. Ɔɛnɛki nde Yesu, molimo mobanda nomokatoya; akitaki o nse, abingitwaki mpe nzulu ibɛlɛki o munya. 21 Yesu aubolaki ihe enka ngana: «Aoyalela nokela boiko metia menga?» Ihe ndɛmbɔ: «Ima nko oliki nde iyaha i ɛlɛngɛ. 22 Bilaka bike molimo mo mobe momobokake o twɛ na mpe o mai nokomba nomoboma. Ya kaki ɔhɔ nokela lobo yaka notohunge, otokele mahɛi!» 23 Yesu atepelaki onka nde mbɔ: «Otepela mbɔ: "Kaki ɔhɔ!" Ya inkuma iyɔhɛmɛ onka olobe oamba.» 24 Nko o elaka eiko, ihe enka ngana aototwa: «Naamba, onsunge na boili bohenga bomi bo bwambi!»

25 Yesu ɛnɛkɛ impinga nkokana, amaki molimo mo bompunda: «Molimo mo motika ebubu, nakopa lotomo: bɛlɛ mpe toisiake nɔmɔtwela!» 26 Na nsimo na nkato i nguya, molimo mo bompunda mɔbɛlɛki. Ngana aliki lo mowi; o lolenge loiko, bato bankuma baotepela mbɔ: «Aowa.» 27 Ya Yesu amokataki o ikata, amokumaki mpe ngana atɛlɛmɛki. 28 Oisiaki Yesu o itumba, baekoli banande bamoubolaki o nkuku bɔnɛ: «Itina be iho tatɔhɔ nɔbɛlia molimo moiko?» 29 Yesu aobaisenyele bɔnɛ: «Molimo mo lolenge loiko, yomba nɛmɔ ɛpɔhe nɔmɔbɛlia yɛngɔ nko lobondela.»

30 Baumwaki aiko mpe bapendiaki o Galilaya. Yesu tayala na mpoha bamwebe. 31 Na itina alakaki baekoli banande mpe aobaebia: «Ngana onka bobato angohembwama o makata manka bato, bangomoboma; mpe o boina bo mahato, angokundwa.» 32 Ya tabaɔhɔlɔ itina i lobo loiko mpe baokaki bɔɔmɔ nomoubola.

33 Baiyaki o Kapalanauma. O elaka eliki balɔkɔ o itumba, Yesu abaubolaki bɔnɛ: «Loiko lombohianye inyo lompɛnyɛ o mboka be?» 34 Ya bakihaki nko nye, na itina, o mboka, bahiaki lɔmpɛnyɛ nweba nɔni opendaki bɔbɛnɛ o iyɔngɔ i balɔkɔ. 35 Yesu akihaki, mpe abeyaki baekoli liomu na bape mpe aobahangela bɔnɛ: «Kaki moto aondi noyala moboo, abɔti noyale mombiha mpe mosali monka bankuma.» 36 Boiko, apwaki ngana ɔmɔ, amɔtɛliaki o iyɔngɔ i balɔkɔ mpe o mbiha enande nomobwatela, aobaebia ndɛmbɔ: 37 «Oiko oamba o lina imi ngana nga bole oni, anyamba mi kaika; mpe oiko onyamba aponyambe nko mi kaika, ya aamba na Oiko ontindaki.»

38 Yoane aoywebia Yesu ndɛmbɔ: «Molaki, twɛnɛki moto ɔmɔ aɔbɛlie melimo me mebe o lina iwɛ, mpe tokombaki nomonyangela, na itina nde tatoiyela.» 39 Ya Yesu aomobekwela ndɛmbɔ: «Tabomonyangelake, na itina tembe na moto okela mpapo o lina imi mpe nko o elaka eiko, aotepela bobe onka mi. 40 Na itina oiko opototakamene ale mputa na iho. 41 Oiko olobe ongobopae mai ma mini o nkeni o lina imi na itina bole banka Kilito, nko na hɔlɔ, nabwebia mbɔ: tangobungia iyuta inande.»

42 «Oiko olobe okola ɔ nsɔpi ɔmɔ o banɛ babakɛ banyambela, ku bɔlɔti onka nde batungie o nkingo ibɔkɔ i inɛnɛ linyungola mambo mpe bamouhe o ebale ɛnɛnɛ. 43 Kaki ikata iwe ikokola o bobe, tenaka ilɔkɔ; ele bɔlɔti onka wɛ nɔtwa o bɔmɔi bɔ bɔbɛlɛ na ikata imɔ na nobatela ma mape mpe noha o lupɛlu, ɔ twɛ lopolimake. [44 "Ɔkɔ, bilandialandi bitɔkɔlɔ bionge bipowakake mpe twɛ lopolimake hiɔ*".] 45 Kaki ikaka iwɛ ikokola o bobe, tenaka ilɔkɔ; ele bɔlɔti onka wɛ nɔtwa o bɔmɔi bɔ bɔbɛlɛ ikaka imɔ na nouhama na mamape o lupɛlu. [46 "Ɔkɔ, bilandialandi bitɔkɔlɔ bionge bipowakake mpe twɛ lopolimake hiɔ*".] 47 Mpe kaki liho iwɛ ikokola o bobe, bɛlia ilɔkɔ; ele bɔlɔti onka wɛ nɔtwa o Bonkumu bonka Nyambe liho mɔmpwɛ na nouhama na mamape o lupɛlu. 48 "Ɔkɔ, opowakake bilandialandi mpe opolimake twɛ hiɔ*". 49 Na itina moto onkuma angoleka o twɛ lɔ mɔnyɔkɔ mpe angobata mokwa olongi ayale pɛtɔ.

50 «Mokwa mole yomba ndɔti; ya kaki mohenga ngɔmbɔ enka mɔlɔkɔ, ongoisia nokepa lolenge be? Boyala na mokwa onka inyo bamɛnɛ mpe boyala na nyɛ bamɔ mputa na bankina.»