1 Yesu aumwaki aiko mpe ayakaki o bola bonande*; mpe baekoli banande bamoiyelaki. 2 O boina bo sabala, alakaki o itumba i lobondela inka Bayuda. Boike bo bamokaki baemwaki. Baubolaki: «Liko imoimenena o be? Boiko bwanya bomopaemena bole ngamo mpe mpapo ilolenge lɔnɛ ikelama na makata manande? 3 Nde tambe sapate, ngana onka Malia*, mpe mohikɔlɔ onka Zake, Yɔsɛ, Yude mpe na Simona? Mpe ba nkana banande tabambe mputa na iho anɛ?» Mpe bataki mabaku noyala nko mwamba. 4 Boiko, Yesu abaebiaki ndɛmbɔ: «Nteti amingwelamake nko o bola bonande, o iyɔngɔ i bokundu bonande mpe na itumba inande*.» 5 Mpe taisia nokela mpapo enkina aiko, lendaka abikiaki ngano bakoni bankina nobahangiaka makata. 6 Yesu aemwaki na bohenga bo bwambi bo balɔkɔ.

Ombiha, Yesu akumbolaki o bihe binkuma biliki bɛlɛbɛlɛ nolakake Nsango Ndɔti. 7 Abeyaki baekoli banande liomu na bape. Mpe abandaki nobatinda bape bape. Abapaki bonkumu o liko inka melimo me bompunda 8 mpe abapaki lotomo: «Noyala nkopwa yomba o mokingi, umonya nko itengu; na impa pɔ, mango pɔ, mɔhɔlɔ mpe o monsenge pɔ. 9 Bikoto bilɔtɔ inyo nko ba sandale mpe tabopwake makakia mape.»

10 Mpe Yesu aisiaki nobaebia: «O manda enkina kaki bɔtwa o itumba imɔ, bokihaka aiko kii o elaka engoumwe inyo o manda ɛlɔkɔ. 11 Kaki manda be epa balɔkɔ tababwamba mpe tababokanya, ongoumwe inyo, bopupolaka motuku mo makaka manyainyo*: aiko engoyala motato onka balɔkɔ.» 12 Bahaki mpe balalolaki mbɔ ɛbɔtɔ bato baenze meloko. 13 Babɛliaki melimo mebe meike mpe babikiaki boike bo bakoni o mbiha e balɔkɔ nobahinga mauta*.

14 Nkumu Elode aoyoka batepela na boili Yesu, na itina lina inande iumaki. Bahangaki: «Yoane Moini aokundwa o iyɔngɔ inka bawi! ɛlɔkɔ eiko bonkumu bonkeli limpapo bole na nde.» 15 Bankina bahangaka mbɔ: «Ele Elia» Bamɔ ndɛmbɔ: «Ale ɔmɔ o ba nteti bakala.» 16 Okaka mbo liko, Elode ndɛmbɔ: «Yoane eiko etindaki mi bamotenake motu, ele nde okundwa!»

17 Na itina, Elode atindaki babute Yoane mpe nomotomba o itumba i ikamba, na boili Elodiade, mwali onka mohikɔlɔ o nande Pilipo oiko obalaki Elode*. 18 Na itina Yoane aebiaki Elode mbɔ: «Lɔpɔbɔte onka wɛ nopwa mwali onka mohikɔlɔ ɔwɛ*!» 19 Boiko, Elodiade amoinaki mpe aondaki mbɔ Yoane abomame, ya taɔhɔ nolokela. 20 Ya Elode aokaka Yoane bɔɔmɔ, na itina aebaki mbɔ ale hembo mpe mwɛlɛmi, mpe amobatelaki. Ombomokake nde akakatanaki; nsa nde ambondake nomokanyaka. 21 Lendaka epohe ɛndɔti ɛnɛnɛki onka Elodiade o boina bo maepwelo ma mabotameno manka Elode. Nde akelaki ntɛkɔ ebeyaki nde bambɔti banande, bakɛndii ba bamani mpe na bingambi bi Galilaya. 22 Ngana o ngainto onka Elodiade aoyoye nobina mpe aobuloya moloko monka Elode na babeyaki nde. Nkumu aoywebia ngana oiko bɔnɛ: «Onzubole eiko eondi wɛ mpe nakokepa onka wɛ.» 23 Mpe amohumbelaki nsumbi mbɔ: «Enkuma enkonzubola wɛ, naɔhɔ nokapola na wɛ o iyɔngɔ nsa bonkumu bomi.» 24 Elɛngɛ e ngainto aɔbɛlɛ mpe aohangela nyango enande: «Ɛbɔtɔ naubole yomba be?» Nyango ndɛmbɔ: «Motu monka Yoane Moini.» 25 Nko na ihali, ɛlɛngɛ e ngainto aoyoisie onka nkumu mpe aomohangela: «Naondi ompae nkaiko yoko motu monka Yoane Moini o sani!» 26 Nkumu aokaki mahɛi penda; ya na boili nsumbi enande mpe na babeyaki nde, tapoisia noboya. 27 Na boiko, Nkumu atindaki mpe apaki lotomo na ihali onka momani mobatela nɔbɛkɛ motu monka Yoane. Momani aohaka o itumba i ikamba notenaka motu monande. 28 Amɔbɛkɛlɛki motu mɔlɔkɔ o sani mpe amopaki onka ɛlɛngɛ e ngainto, nde mpe amopaki onka nyango enande. 29 Oambaki baekoli banka Yoane nsango eiko, bahaki nopwa molio monande mpe bamokundaki o iyita.

30 Baekoli bakokanaki onka Yesu mpe bamɔhɛkwelaki inkuma ikelaki balɔkɔ mpe ilakaki balɔkɔ. 31 Lendaka, Yesu aobaebia bɔnɛ: «Inyo banɛ bankina, boyaka nobulame o bohobe mpe bɔlie lopwa.» Na itina eliki na bato boike bamboyakake mpe bamboisiake, mpe balɔkɔ tabayala nsa na epohe nɔlɛ. 32 Baotangwa na bwato noha o manda e bohobe. 33 Bato baoywɛnɛ Yesu na baekoli banande baotangwa mpe boike babaɔhɔlɔki; boiko, nyaima o mananga mankuma, bato bahaki mabango lo makolo o manda ɛlɔkɔ mpe baiyaki boho bo balɔkɔ.

34 Ohapwaki Yesu o bwato, aɛnɛki impinga i inɛnɛ; moloko monande moliki ntwatonda na mahɛi na itina baliki lo mbata lipa na mobateli* mpe abandaki nobalaka mbo boike. 35 Aiko opendaki elaka noleka, baekoli bayakaki bɛlɛbɛlɛ na nde nomwebia: «Manda ɛnɛ ele bohobe mpe elaka eoleka. 36 Isenya balɔkɔ o ngando na bihe bile bɛlɛbɛlɛ nohomba bindei.» 37 Ya Yesu aobaisenyele bɔnɛ: «Inyo bamɛnɛ bobapa bi ndei!» Ya, babekolaki bɔnɛ: «Ɛbɔtɔ na iho noha nohomba bingwɛlɛ na mpata* menkama mepe mpe tobapae bi ndei?» 38 Yesu abaubolaki: «Bole na bingwɛlɛ binga? Bɔnsɔ bolende.» O mbiha enendi, balɔkɔ ndɛmbɔ: «Matano mpe na nsi ipe.» 39 Mpe aobapa lotomo nobakihiya balɔkɔ bankuma, o maboko, o bibuhu. 40 Bakihaki o maboko ma menkama mpe ntuku i itano. 41 Yesu apwaki bingwɛlɛ biko bitano mpe na nsi liko ipe, aiyeyaki maiho o Liko, mpe aototia Nyambe. Atenakaki bingwɛlɛ mpe abipaki onka baekoli mbɔ babakapwele. Aisiaki mpe nokapola nsi liko ipe onka balɔkɔ bankuma. 42 Balɔkɔ bankuma balɛkɛki mpe bakindaki. 43 Mpe batɔngɔnɔki meuka liomu na mepe me biteni bi bingwɛlɛ na nsi lipalemaki*. 44 Baiko balɛkɛki bingwɛlɛ baliki mele nkoto itano.

45 Nkaiko, Yesu apaki baekoli lotomo nokondela o bwato mpe balɔnde nsɛmboka eni e ibeke i ebale o boho bonande, lokenge lo Betesaida, o elaka eisenyaki nde mɔmɛnɛ impinga. 46 Ombiha e nande noiyisenya impinga, aohaka o monkondo nobondela. 47 Oiyaki mpokwa, bwato boliki o iyɔngɔ i ebale mpe Yesu nde mɔmɛnɛ aliki o mokonda. 48 Ɔɛnɛki nde mbɔ baekoli baliki na liale noluka na itina ɛpɛli ebaimba, bɛlɛbɛlɛ na melonge aoyoye onka balɔkɔ nkɛkɛndɛ o liko i mai, mpe aondaki nobalekana. 49 Ɔmwɛnɛki baekoli mbɔ aokɛnde o liko i mai, baokanena mbɔ aliki elima mpe baototwa na nsimo. 50 Na itina bankuma bamwɛnɛki mpe babilimaki. Ya na ihali, aobahangela: «Bokahwa! Ele nko mi; tabokake bɔɔmɔ!» 51 Akondelaki o bwato boliki balɔkɔ mpe ɛpɛli ehilaki. Bakakatanaki penda, 52 na itina, tabaɔhɔlo na boili mpapo i bingwɛlɛ: meloko me balɔkɔ meliki boolo.

53 O mbiha empendi ibeke i ebale, baiyaki o mokonda mo Genesaleta mpe bahɛmɛki. 54 Ohapwaki balɔkɔ o bwato, bato baɔhɔlɔki Yesu. 55 Na boiko, bato bakumbolaki mokonda monkuma mpe babandaki nɔbɛkɛ bakɔni mbebeba o matɔkɔ mpiko o manda eambaki balɔkɔ mbɔ aliki. 56 Manda inkuma iɔtwaki Yesu, bihe, mananga mpe na mengando, batandaki bakɔni palapala o manda i makoka mpe bamɔbɔndɔki mbɔ abakambie bamokate nsa o lolemba lo etobo enande; mpe baiko bankuma bamokataki babikaki.