1 O maina maiko, nga boisiaki impinga i inɛnɛ i bato nopula mpe yomba endei teisia noyala, Yesu aobeya baekoli banande mpe aobaebia ndɛmbɔ: 2 «Nale na mahɛi na boili impinga inɛ, naitina iokela na lɛlɔ maina mahato male balɔkɔ mputa na mi mpe tabambe na biomba bindei. 3 Kaki no baisenya onka balɔkɔ nzala, bakotukwa o mboka, naitina bamɔɔ baimaki iteta.» 4 Baekoli banande baomoisenyele bɔnɛ: «Tobate bingwɛlɛ bibalehia iho anɛ o bohobe obe?» 5 Yesu aobaubola bonɛ: «Bole na bingwɛlɛ binga?» Baomoisenyele mbɔ: «Nsambo» 6 Mpe aopa lotomo onka impinga nokiha nsɛbɛnɛ o nse. O mbiha aopwa bingwɛlɛ biko nsambo mpe, o mbiha enande nototia Nyambe, aobiatola mpe aobipa onka baekoli banande olongi mbɔ babakapwele. Mpe baobikapola onka impinga. 7 Baliki mpe na ngano nsi inkɛ. Yesu aitwakwelaki mpe abahangelaki mbɔ baisie nobakapwela. 8 Baɔlɛ mpe baokinda. Baotongɔnɔ meuka nsambo me mpwa lipalemaki. 9 Lendaka, baliki bɛlɛbɛlɛ mele nkoto inɛi. O mbiha Yesu abaisenyaki, 10 mpe nko o elaka eiko akondelaki o bwato mputa na baekoli banande mpe bahaki o mokonda mo Dalamanuta.

11 Bapalusi baoyoye mpe baobanda nohia na Yesu lɔmpɛnyɛ nɔmɔlɛbɛlɛ ilonga. Baomoubola elembetelo ɛmɔ eima o Lobola. 12 Yesu aokiɛtɛnɛ o moloko penda mpe aohanga: «Itina be bato ba elaka ɛnɛ baubola elembetelo? Nko na hɔlɔ, nabwebia bɔnɛ: Elembetelo nsa ɛmɔ tengobapaemena!» 13 Na boiko, aobakambia, aisie nokondela o bwato mpe aopendia nsemboka eni enkina.

14 Baekoli babopelaki nopwa mampa, ya baliki nko na imɔ kaika o bwato. 15 Yesu abakokomiaki: «Boyabakaka! Boyabatele na levile enka Bapalusi mpe na enka Elode.» 16 Baekoli babandaki nohia lompɛnyɛ o iyɔngɔ i balɔkɔ na itina tabayala na mampa. 17 Yesu alɔhɔlɔki mpe aobaubola: «Bohia lompɛnyɛ na itina tabombe na mampa? Nani nzebi e nyainyo ele ndipama? Tabombe na nsɔhɔ? Bole na meloko meolo? 18 Bole na maiho, bɔpwɛne? Bole na matoi, bopoke? Bopwepwe*: 19 oatolaki mi bingwɛlɛ bitano onka bato nkoto itano, bɔtɔngɔnɔki mpwa ipalemaki ntondiama o meuka menga?» Baohanga: «Liomu na mepe*.» 20 Yesu abaubolaki: «Oatolaki mi mampa nsambo onka mele nkoto inɛi, bɔtɔngɔnɔki mpwa ntondiama o meuka menga?» Balɔkɔ baisenyaki ndɛmbɔ: «Nsambo*.» 21 Boiko Yesu ndɛmbɔ: «Nani tabombe na nsɔhɔ?»

22 Oiyaki Yesu na baekoli banande o Betesaida, baomɔbɛkɛle ebolia maiho ɛmɔ mpe baɔmɔbɔndɔ mbɔ amokate. 23 Yesu akataki ebolia maiho o ikata, amobɛliaki o nanda e ehe. Amotikaki nsɔi o maiho manande, amohangiaki makata mpe amoubolaki bɔnɛ: «Ɔɛnɛ yomba?» 24 Olipolaki nde maiho, aomoisenyele: «Naɛnɛ bato, nabaɛnɛ lo mete, ya bakɛndɛ.» 25 Boiko, Yesu aisiaki nomohangia makata o maiho; mpe moto aoywɛnɛ polele: aobika mpe aoywɛnɛ na nsɔhɔli yomba ɛmɔ na ɛmɔ. 26 Yesu amoisenyaki onka nde ntepela mbɔ: «Tɔtwake nsa na o ehe.»

27 O mbiha, Yesu ahaki nde na baekoli banande o bihe biliki bɛlɛbɛlɛ na inanga i Sezale e Pilipo. O mboka, aubolaki baekoli banande bɔnɛ: «Mi nale nɔni o ntepeli enka bato?» 28 Bamobekwelaki mbɔ: «Yoane Moini, bamɔ mbɔ Elia, mpe bankina mbɔ ɔmɔ o ba nteti.» 29 Mpe Yesu abaubolaki mbɔ: «Ya inyo, bohanga mi nale nɔni?» Petelo atepelaki nzisenya bɔnɛ: «Wɛ ole Kilito.» 30 Na boiko, Yesu abakokomiaki noyala nkotepela nsa onka moto ɔmɔ.

31 O mbiha, Yesu abandaki nobalaka mbɔ: «Ngana onka bobato yɛngɔ anyɔkwe penda; aboyame na bingambi bi Bayuda, bankanga ba banɛnɛ banka Nyambe mpe balaki ba mokeko; abomame, mpe akundwe o boina bo mahato.» 32 Yesu atepelaki lobo loiko nko polele. Na boiko, Petelo amokolaki o ntundu mpe amɔpɛlɛki. 33 Ya Yesu abutwaki, mpe alendaki baekoli banande, aoywangwela Petelo ntepela mbɔ: «Umwa, tangwa na mi, Satana, na itina bikaneno bi wɛ bipa binka Nyambe, ya binka bato.» 34 O mbiha Yesu akokanyaki impinga i bato mputa na baekoli banande mpe aobaebia bɔnɛ: «Kaki moto aondi nonziela, ayaboye nde mɔmɛnɛ, abebe ekulusu enande mpe anziele. 35 Na itina, oiko ondi nobikia bɔmɔi bonande angobobungia; ya oiko ondi nobungia bɔmɔi bonande na boili mi mpe Nsango Ndɔti angobobikia. 36 Kaki moto nobata molongo na ibondo, ya bɔmɔi bonande noha ibomi angobata intomba be? 37 Angopa be nobikia bɔmɔi bonande? 38 Na itina kaki moto anzoka mi nsɔni mpe mbo imi o iyɔngɔ inka bato ba elaka ɛnɛ, bapone Nyambe mpe bale ntondiama na nsɔpi, Ngana onka bobato mpe angomokela nsɔni, ongoye nde o mankɛmbɔ manka Ihe enande mputa na mentomwa menande mɛ pɛtɔ.»