João 11

लाजरसं आसिन्या

1 लाजरसं मिनला तोलोअ रु आनाएबोरस्यु लेऊ। नका मरियम सनर नकाल आदिदी मार्था बेथानिया नङ्गरला लेऊने।✝11:1 लूका १०:३८-३९ 2 येशु प्रभुजन अत्तर ठिइस्यु आखङल आचेमले सिइस्यान्या मरियम ईकाइ ज्या। इकालै भाई लाजरसं आनाएबोरस्यु लेऊ।✝11:2 यहुन्ना १२:३ 3 आका नेंलोअ दिदीनेंले येशु ल्योङ ऐलेस्यु थाई नेंपरिङौ, "औ प्रभु, जोजन नङ मया नढोनु, नका आनाएबोरज्याया।"

4 तर आका थएस्यु येशुले ऐलेऊ, "ईका नाएबोरले सिइल मासतापौदी, तर ईका परमेस्वरलं ज़ाल महिमालं नाल्ट हो।" 5 येशुले मार्था, नकाल बैना मरियम सनर लाजरसजन मया ढोवरा, 6 ताहकन बै लाजरसं आनाएबोरज्याऔ ऐलेन्या थएस्यु येशु जोङ लिज्याऔ, ओङ अझ नेंयोअ समन चुङौ। 7 नकाल छिन्ट येशुले सिइयाङजन ऐआढोवाङ, "दे, आब गे फरि यहूदिया वलस्यु हिन्‌या।" 8 सिइयाङै ओलजन ऐराढोव, "औ प्रभु,*11:8 रब्बी=प्रभु भाबाअ यहूदीयाङै नङजन लुङले टुपौ रोअज्यावाङ, ओटन नैति फरि नङ नङै हिन्ना?"

9 येशुले जबाक आयोवाङ, "नैति लाअ बारं घन्टा माताहौ का? लाअक बारिन्याङ माढुइरदी, दानाङभन्या नकाङै ईका सङ्सारला ज्योति रङरा, 10 तर रिउल डुलिन्याङ धूइसिरा, दानाङभन्या नका रुयाङ ल्योङ रंनन्या माल्दी।" 11 ओलं छिन्ट येशुले नकाङजन ऐआढोवाङ, "गे न्हाए लाजरसं मिऊरुइल परीस्यु लेऊ, तर नकाजन मिऊरुइतन सचोटौ नाल्ट ङा नङ हिन्ङा।" 12 सिइयाङै ओलजन ऐराढोव, "अं प्रभु, नका मिऊरुइल परीस्यु लेकन नका ऐबेला।"

13 येशुले नकाल आसिन्या बारेल आपानज्याऔक, तर नकाङ मछ्यु मिऊरुइल बारेल पानज्याऔ ऐलेस्यु रायिङौ। 14 येशुले नकाङजन प्रस्टै आपानस्योवाङ, "लाजरसं सिस्यु लेया। 15 जे बिस्वास ढोच्या ऐलेस्यु जे नाल्ट ङा नङ ङामालेऊकाले खुशी लेङा। जोमनलेस्यु बै गे नका ल्योङ हिन्‌या।"

16 तब दिदुमस ऐढासिन्या थोमाले आन्हाए सिइयाङजन ऐआढोवाङ, "दे, गे बै हिन्‌या, ओटन येशुसजै सिया।"

येशु पुनरुत्थान सनर जिबन

17 येशु बेथानिया आतापराऔक, लाजरसजन ऊईल रानाएन्या चार दिन ताइस्यु लेऊ। 18 बेथानिया यरुशलेमतन छ्योअ तिन किलोमिटर लोए लेऊ। 19 तबर यहूदीयाङ मार्था सनर मरियमजन नेंभाईल बारेल नकानेजन सानत्वना यांन्या रा:स्यु लेवाङ।

20 येशु आरांज्यान्या थएस्यु मार्था ओङ हिनौ, ओटन ओसं डोएसिऊ। तर मरियम झिमलै चुङज्याऊ। 21 तब मार्थाले येशुजन ऐआढोव, "औ प्रभु, नङ इलै नलिज्यान्या ताहकन ङा भाई मासिदीहोला। 22 तर आब ङा बै सन्दुङा, नङ परमेस्वर सकाए जो नीन, नङजन ऐयान्वा।"

23 येशुले नकाजन ऐआढोव, "न भाई फरि जिङदा ताइन्यालेया।"

24 मार्थाले येशुजन ऐआढोव, "ङा ऐसन्ङा, कि ना आखिरी दिनल पुनरुत्थानल फरि जिङदा ताइस्यु सोया।"✝11:24 प्रेरित २४:१५

25 येशुले नकाजन ऐआढोव, "पुनरुत्थान सनर जिबन ङाई ज्या। जोले ङाजन बिस्वास ढोव ना सिकन बै बान्चिन्यालेया। 26 ओटन जिङदाङ सनर ङाजन बिस्वास ढान्या जोबै खकैज सिन्यामाल्दी। नैति नङ ईका बिस्वास माढोनच्यो?"

27 नकाले येशुजन ऐआढोव, "औ प्रभु, ङा बिस्वास ऐढोङा, नङ सङ्सारलं रांन्या ख्रीस्ट, परमेस्वरलं ज़ा हो।"

येशु व्‌रौ

28 आवाए छ्योङस्यु मार्था हिनौ, ओटन आबैना मरियमजन खुल्स्यु सटक्कै आपानस्योव, "गुरु आङ तापरादा, ओटन नङजन खुलज्याऔ।" 29 ईका थएस्यु मरियम ओचोएटै च्याङस्यु येशु ल्योङ हिनौ। 30 येशुजन मार्थाले जोङ आडोटौ ओलै लिज्याऔ, येशु नाबेला समन नङ्गरल ताप्‌रा:स्यु मालेऊ। 31 झिमल नकाजन सानत्वना यारान्या यहूदीयाङै मरियम ओचोएटै च्याङस्यु पाखाल आहिनन्या रङस्यु, ना ऊईल व्‌रनाऔ ऐलेन्या यिङस्यु, नकाल छिनछिन हिन्वाङ।

32 जब मरियम येशु आलिज्यान्या पोल रायापाइना येशुजन रङस्यु, ऐलेस्यु नाले ओलं खङत धोक आयोव, "औ प्रभु, नङ इल नलिज्यान्या ताहकन ङा भाई मासिदीहोला।" 33 जब येशुले नाजन आव्‌रज्यान्या सनर नास रांन्या यहूदीयाङ बै राव्‌रज्यान्या आरङवाङ, तब येशुल यिङ भ्याई निरास ताहौ ओटन भ्याई दुखीत ताहौ। 34 येशुले नकाङजन आगिन्वाङ, "जे नाजन काङ जेरीन्चिऊ?" नकाङै ओलजन ऐराढोव, "औ प्रभु रा:स्यु खिम्ते।" 35 येशु व्‌रौ। 36 नैताइस्यु यहूदीयाङै ऐलेवाङ, "खिम्चिते, येशुले नाजन ख्वाए मया आढोव।" 37 तर नकाङ मध्य काङ्काङै ऐलेवाङ, "नैति इकाले अन्ढलाल म्युउ ता आफएस्योव नका रुजन बै सिन्यातन बचाहौ माढुदुवा का?"

येशुले लाजरसजन जिङदा आजाएन्या

38 तब येशु फरि भ्याई निरास ताइस्यु ऊई ल्योङ हिनौ। नका ऊई तोलोअ पुउल लेऊ। नकाल याह् तोलोअ लुङले कप्सिज्याऔ। 39 येशुले ऐआढोवाङ, "लुङ हताइचिते।" सिन्या रुल दिदी मार्थाले येशुजन ऐआढोव, "प्रभु, आवाए बेला समन ता ना आस्युउनमङा लेदा होला, दानाङभन्या ना आसिन्या चार दिन ताइदा।" 40 येशुले नकाजन ऐआढोव, "नैति ङा नङजन ऐङामाढानु, ‘नङ बिस्वास ढोनकन परमेस्वरलं महिमा रङन्या लेना?’" 41 नकाङै लुङ रांहटाहौ। ओटन येशुले नमदेए खिमस्यु ऐलेऊ, "औ बौ, ङा नङजन धन्याबाद यांना, दानाङभन्या नङ ङा बिन्ति नठएनु। 42 ङाजन थाह ऐलेया, कि नङ ङा बिन्ति सदाई थएना। तर इल च्याङज्यान्या हुलल नाल्ट ङा ईका ङापान्ङु, ताकि नङ ङाजन नपरिङनु ऐलेस्यु नकाङै बिस्वास ग्याढोरत्या।" 43 ओटन ईका छेन पान्वापाइना येशु बअजोरसै कलिकौ, "लाजरसं, पाखाल पलिईस्यु रांन्ते।" 44 ना सिन्या रुल खङ-कुई पट्टीले पोअसिन्या सनर अनवार क्वाले मलिङसिन्याई बाहेर पलिईस्यु रांऔ। येशुले नकाङजन ऐआढोवाङ, "नकाल बन्दन पलाअस्योचिते, ओटन नकाजन हिनौयोचिते।"