1 Amɛ, aner anuŋ ne amkpama ne bla Yesɔ kiyiŋ ndi Bilatus ne duŋ aŋlɔk aner abɛ Galili anuŋ ndi azhizhi amen ne acɔk aglik ne azhizhi ane tsik baŋ. 2 Yesɔ adi ba, <<Izhin yik te di aner abɛ Galili abaŋa ne na zumimin anaŋ nki aner abɛ Galili me waŋai kiyiŋ ndi ne yik iyah amei? 3 Mbla zhin, ba yeme ba! Izhineba min yi, mba zhin te duŋ na zumimin ba, izhin tei ku dɔ. 4 kɔ izhin tei di aner awur ane tender ndi iki kɛ shu ne zhaku te ŋlɔk ba ne Silɔm, zhin yik te di aner abaŋa nena zumimin anaŋ nki aneshir abaŋ ndi ayi ne Urshelima yi? 5 Mbla zhin, ba yi amɛ ba! Izhin te kyak duŋ na zumimin, izhin tei ku dɔ.>>

6 Fe Yesɔ abla ba nkanlɛ te di: <<Ner nuŋ ane yi ne tiŋ nglǝnglǝ ne ahwaŋa amaa, ankyak ne gar wɔb dɔ maa bane yik kinuŋ ba. 7 Fe adi ner waŋ ndi ablɛ ahwaŋ ne tiŋ nglǝnglǝ me, <Ase me tar ndi mne nyɛ kye dɔ ŋgliŋgli me, bam yik kinuŋ ba tsɔm tiŋe tyak zhɔk! Aduŋ kɛ klɛ te na anii ne mimi me?>

8 <<<,Nɛrɛ adi, Ngɔŋ> <Duŋ kɛ bǝ na te ise zhin, M tei nka tiŋe te shur kɛ asu. 9 Te yi ndi te dɔ ire amɛ! Te yi ndi bate dɔ ba M tei ntsom kɛ ntyak zhɔk.>>>

10 Nǝ bɛr yi sɔŋ sik Yesɔ ne zen tsar ne Akabakɔŋ anuŋ, 11 iwa nuŋ ndi anerim ne nau azhɔk itsibgoŋ ase awur ane tender. Nǝ baŋ mkpaŋ bane ya lu kli ba. 12 Ndi Yesɔ ne yigu, azhɔu aŋyak ne ti te diu, <<Iwa, ne tunu ilɔ mi agli tibɛ.>> 13 Fe a sagu ŋɔk maa, ne amkpamkpaŋ ma iwama alɔ nab aklɛ te gbar Arik sak.

14 Ankyak fe ngɔŋ ne Akabakɔŋ akɔ te mfu ndi Yesɔ ne duŋ iwama are ne bɛr yi sɔŋ sik, ngɔŋ ne Akabaŋkɔŋ ŋɔ adi aneshire te di, <<Ber tani yime iyi na ndum. Amɛ izhin nyɛ te duŋ abɛ duŋ zhin rɛ, ba ne bɛr yi sɔŋ sik yiŋɛ ba.>>

15 Fe ngɔŋ adiu, <<Izhin abɛ kamgli! Ba zhin zuk alandɔŋ kɔ tatur amin ne amkpa ne kur amen ne bɛr yi sɔŋ sik te gli ba te gar nek ba amashir ata so kai? 16 Ne me iwa waŋa ndi ayi nga ŋli ikɛ Ibrai, shetan ne kpau nyak ase wur ane tender, ba tei rɛ ndi abɛ zu gu azhɔk ne bɛr yi sɔŋ sik kai?>>

17 Ndi ne di amɛ, abɛ kyagu yi ishisha ku vuŋ ba, ankyak aneshir ne nyɛr tetɛk ne ki yiŋ ndi Yesɔ ne nai.

18 Fe Yesɔ arib, <<Ikɔb Arik yi kikin? M tei tsar kɛ ne ni? 19 Iyi ndi bǝbǝ nklik, ndi neshir ne baŋǝ ayi ne ahwaŋ ama. Nǝ tɔ te tiŋ nkunkun, fe aŋliŋlɔ ne rɛ shu te shɔr anjer ne ngǝŋga ma.

20 Fe ana rib ba, M tei ntsar ikɔb Arik ne anii? 21 Iyi ndi mumuŋ atuntu yiŋ ndi uwa nuŋ ane shur ne mumuŋ alikama te duŋǝ ne saŋ shak agbǝgba.>>

22 Fe Yesɔ ne yir ntuntun ngɔngɔŋ ben mɔtsɔtsɔb, te zin tsar te bene vuŋ ankɔŋ ane gar Urshelima. 23 Ankyak ner nuŋ aribu te di, <<Ŋgɔŋ, atei ta aner watsɔb ankyak azhɔk yi?>>

Yesɔ adi ba, 24 <<Zhin bɛ nak tsǝ kli te zǝ zhin ankɔŋ avetsɔb, mbla zhin, aner tetɛk atɛi te tɛ aba abɛ zǝ ankɔŋ awaŋa ayir ate lak akɛne. 25 Ankyak ndi ner ne kɔbɔ te lu te ku ankɔŋɔ, izhin tei kli ne abɛm te kpyaŋu te ben te di, <Ngɔŋ, bu ta ankɔŋɔ.>

<<Akyak atei di, <Zhin rɛ me? Bam ne zhi zhin ba.>

26 Fe izhin tei di, <Ta ne li te so bene bɔu, une na tsar ne nkuŋkɔŋ mɔr.>

27 <<Ankyak atei di ba, <Bam ne zhi zhin ba, bam ne na zhi amkpa waŋ di zhin rɛ me ba. Kam deme zhin ne ti muŋ, bɔbɔk min abɛ na ki mimin!>

28 <<Zhin tei zhin te fa aŋin ndi izhin te yik Ibrai, Ishaku ben Yakubu ben bɔbɔk abɛ bla shar yi Arik ne kɔb Arik, ankyak atei yar zhin ashur ne bɛm. 29 Aneshir atei rǝ ti kǝ anzaŋ ben amgbalu, atushu ben ishin, atei zǝ asɔŋ ne mben men ne gyaŋ yi kɔb Arik. 30 Fena anuŋ abɛ ku goŋ atei zǝ ti, anuŋ abɛ ku ti atei zǝ goŋ.>>

31 Nǝ mkpaŋ yuŋɔ Ferisawa nuŋ ane nyɛ ben Yesɔ te diu, <<Lu duŋ ayaŋa te na kɔmɔ ne amkpa nuŋ. Hiridus azǝnǝ wɔb bu ne fǝr ŋun.>>

32 Yesɔ adi ba, <<Tsǝn gar bla zhin wuwuoma, <M tei nak gli anerim gli rumɔ te na nduŋ aneshir are aliŋ ben amblɛ, ne bɛr yi ntar me ntei aklɛ ndum muŋ. 33 ka abɛ di anii, M tei nak kɔmɔ ne ti aliŋ bǝn amblɛ bǝn bɛr ŋan ndi ner ine bla shar yi Arik bai nku ne abɛm Urshelima ba!

34 <<Uu Urshelima, Urshelima, zhineba ŋlɔk abɛ bla shar yi Arik te tyak abaŋ ndi ne shar ba bǝn abɛ zhin ne mkpaŋ, mǝne mbaŋ mkpaŋ ndi M tei biŋ amumun amin amkpa zhin, ndi kukɔ abiŋ mumuen ma te alab ba aku ne amgba maa, izhin ne nak kyak! 35 Nak tɔ zhin, izhin ne duŋ akabakɔŋ amin ne te janjak. Mbla zhin, ba zhin tei na yik me ba se mkpaŋ ndi izhin te di iwaŋ ndi anyɛ ne sak kɛ Arik ne negu anu adidik.>>>