1 Nao long taem ya we King Jehu i stap rul long Isrel,* long namba seven yia blong hem, Joas i kam king blong Juda.* Hem i rul foti yia long kantri ya, mo hedkwota blong hem i stap long taon ya Jerusalem.* Mama blong hem Jibia, we i woman Bereseba. 2 Mo oltaem long laef blong king ya, gogo hem i ded, hem i stap mekem ol samting we Hae God i glad long hem, from we Hae Pris* ya Jehoeada i stap tijim hem. 3 Be ol ples blong mekem wosip long ol narafala god, hem tu i no spolem olgeta, i livim olgeta oli stap nomo, mo ol man oli stap gohed blong mekem sakrefaes mo blong bonem insens* long ol ples ya.

4 ✝Nao wan taem, hem i singaot ol pris* oli kam luk hem, mo i talem long olgeta se, "Ol mane ya we ol man oli stap tekem i kam long haos blong Hae God blong givim i go long hem, yufala i mas putumgud blong wokem haos ya i gud bakegen. Hemia ol mane* we olgeta man evriwan oli mas givim, wetem ol mane we ol man oli mas givim blong finisim ol promes blong olgeta, mo ol mane we ol man oli stap givim i go nomo long Hae God long gladhat blong olgeta. 5 Taem yufala i stap mekem ol wok blong yufala, yufala i mas lukaot gud long ol mane olsem. Nao sipos i gat sam samting i kam nogud long haos blong Hae God, bambae yufala i mas yusum ol mane ya blong fiksimap."

6 Be kam kasem namba twanti tri yia blong king ya, olgeta oli no mekem wan samting nating blong fiksimap haos ya. 7 Nao king i singaot hae pris ya wetem ol narafala pris oli kam stanap long fes blong hem, mo i tok long olgeta, i talem se, "?From wanem yufala i no fiksimap haos ya blong Hae God? I stat naoia, bambae yufala i no moa save holem ol mane ya we yufala i stap kasem, yufala i mas tekem i kam, blong wok blong fiksimap haos ya i save gohed." 8 Nao ol pris ya oli agri long tok ya, mo oli agri tu se wok blong fiksimap haos ya bambae i no stap long han blong olgeta, i stap long han blong ol man blong wok nomo.

9 Nao hae pris i tekem wan bokis, i mekem hol long lid blong hem, nao i putum long yad blong haos* blong Hae God, long saed blong Olta, long raetsaed blong hem. Nao ol pris we oli stap wok long doa blong haos ya oli stap tekem olgeta mane we ol man blong mekem wosip oli stap givim, oli putum insaed long bokis ya. 10 Nao oltaem, taem we i gat plante mane long bokis ya, sekretari blong king wetem hae pris, tufala i stap kam kaontem* ol mane ya, nao tufala i putumgud i stap. 11 Biaen, tufala i stap raetemdaon namba blong mane ya, nao tufala i stap go givim long ol man we oli stap lukaot long wok blong fiksimap haos ya. Nao ol man ya oli stap yusum mane ya blong pem ol man blong katem ol wud, mo ol kapenta, 12 mo ol man blong katem ston blong haos, mo ol man blong wokem haos long ston. Mo oli stap yusum tu blong pem ol timba mo ol ston mo ol narafala samting we ol man oli stap yusum blong fiksimap haos ya. 13 Mane ya, oli no yusum blong pem ol samting we oli wokem long silva, mo oli no yusum blong pem ol samting blong mekem wosip, olsem ol kap, mo ol besin, mo ol trampet, mo ol tul blong klinim wik blong laet, mo ol narafala samting tu we oli wokem long silva no long gol. 14 Oli stap yusum nomo blong pem ol man blong wok, mo blong pem ol samting blong fiksimap haos blong Hae God. 15 ✝Mo oli no stap trabol blong jekemap wok blong ol man ya we oli stap lukaot long mane ya, from we fasin blong olgeta i stret gud. 16 ✝Be i gat ol narafala mane tu i stap, we ol pris oli no putum long bokis ya, from we ol mane ya i blong givhan long olgeta. Hemia ol mane we man i givim i go long Hae God, from we i ravem hem no i ravem narafala man, nao pris i mekem sakrefaes blong tekemaot sin blong hem, wetem mane we man i givim long Hae God from we i mekem narafala sin, nao pris i mekem sakrefaes blong tekemaot sin ya blong hem.

17 Nao long taem ya, King Hasael blong Siria i go long taon ya Gat, i mekem faet long ol man blong hem, i winim olgeta, mo i holem taon ya i blong hem. Nao hem i mekem plan blong kam mekem faet long taon ya Jerusalem. 18 Be taem King Joas i harem nius ya, hem i go long haos blong Hae God, i tekemaot olgeta samting we King Jehosafat mo King Jehoram mo King Ahasia, trifala i bin givim long Hae God. Trifala king ya i bin rul long Juda fastaem long hem. Mo hem i karemaot olgeta samting we hem i givim finis long Hae God, i putum i go wetem ol samting ya, mo i tekemaot tu ol gol we ol man oli putumgud i stap long haos ya, wetem ol gol we i stap long haos blong hem, nao i sanem olgeta samting ya i go long king ya blong Siria. Nao king ya wetem ol soldia blong hem oli tanemraon, oli no moa kam long Jerusalem.

19 Ol narafala samting we King Joas i mekem, ol man oli raetemdaon long buk ya we nem blong hem Ol Stori blong Laef blong ol King blong Juda.

20,21 Nao i gat tu haeman blong hem, we nem blong tufala, Josakara, we papa blong hem Simeat, mo Jehosabad, we papa blong hem Somere, we tufala i mekem plan blong kilim hem. King ya i gat wan haos blong hem long Jerusalem, we oli wokem long pis graon ya we ol man bifo oli bin berem blong mekem i level. Ples ya i stap long saed long is, klosap long rod ya blong go long Sila. Nao wan taem, taem we hem i stap long haos ya, tufala ya i kam kilim hem i ded. Nao ol man blong hem oli putum bodi blong hem long hol long ston long beregraon blong ol king, long haf ya blong Jerusalem we nem blong hem "Taon* blong King Deved", mo pikinini blong hem Amajia i tekem ples blong hem, i kam king.