1 ✝Long taem ya, i gat wan haeman i stap long Siria, we nem blong hem Neman. Hem i komanda blong ol soldia blong king blong Siria, mo king ya i stap tinghae long hem, from we Hae God i stap yusum hem blong mekem ol soldia blong Siria oli stap win long faet. Hem i wan strong soldia, be i gat wan rabis sik long skin blong hem we i stap spolem bodi blong hem. 2 Bifo, wan taem, taem we ol man Siria oli kam long Isrel* blong mekem faet, mo blong karemaot olting blong olgeta, oli bin tekemaot wan smol gel Isrel i go wetem olgeta, nao long taem ya, gel ya i stap wok blong woman blong Neman. 3 Nao wan dei, gel ya i talem long misis blong hem se, "Misis, mi mi wantem tumas sipos masta i save go luk profet ya we i stap long Sameria.* Man ya bambae i save tekemaot sik ya, i mekem hem i kam gud bakegen."

4 Nao taem Neman i harem samting ya, hem i go luk king, i talemaot long hem tok ya we gel ya i talem. 5 Mo king i talem se, "Ale, bambae mi raetem wan leta blong yu, blong yu go givim long king blong Isrel."

Nao Neman i tekem leta ya blong king, mo i tekem tri handred foti kilo silva we praes blong hem fiftin milian vatu* mo seventi kilo gol, we praes blong hem foti faef milian vatu, mo ten flas klos, nao i aot i go. 6 Leta ya we hem i tekem i go, i talem se, "Man ya we i karem leta ya i kam long yu, hemia Neman, wan haeman blong mi. Mi wantem yu yu tekemaot sik ya blong hem, blong mekem hem i kam gud bakegen."

7 Be taem king blong Isrel i ridim leta ya, hem i harem nogud tumas, nao i terem* klos blong hem from, mo i talem se, "!Wan trabol ya! King blong Siria i ting se mi mi save tekemaot sik blong man ya, be mi mi no God. Mi no gat paoa blong mekem man i laef, mo blong letem man i ded. Hemia i klia nomo we hem i wantem faenem wan poen long mi, blong hem i kam mekem faet long yumi bakegen."

8 Be taem Profet Elisa i harem nius blong samting ya, hem i sanem tok i go long king se, "?From wanem yu harem nogud tumas from samting ya? Yu sanem man ya i kam long mi. Bambae mi mi soemaot long hem we i gat wan profet i stap long Isrel."

9 Nao king i sanem Neman blong i go luk profet ya, mo hem i klaem long kat blong hem bakegen, i kam wetem ol hos mo kat blong hem, i kam stop long doa blong haos blong profet ya. 10 Nao profet i sanem wan man blong hem i kam afsaed, i talem long hem se, "Yu go swim seven taem long Jodan Reva, nao sik blong yu bambae i finis, bodi blong yu bambae i kam gud bakegen."

11 Be taem Neman i harem tok ya, hem i kros we i kros, nao i gowe. Hem i talem se, "?A, wanem samting ya? Mi mi ting se bambae hem i kam luk mi, i prea long Hae God ya we i God blong hem, mo i saksakem han blong hem antap long ol soa blong mi, blong bodi blong mi i kam gud bakegen. 12 ?Weswe? Abana Reva mo Fapara Reva long Damaskes, tufala i gud moa, i winim ol reva ya long Isrel. !I moa gud mi go swim long wan long tufala, blong sik blong mi i finis!"

13 Be ol man blong wok blong hem oli kam klosap long hem, oli talem se, "Masta, sipos profet ya i talem long yu blong yu mekem wan strong samting, bambae yu save mekem, be samting ya we hem i talem i isi nomo. ?From wanem yu no save go swim olsem we hem i talem, blong bodi blong yu i kam gud bakegen?" 14 Nao hem i godaon long Jodan Reva, i draonem hem seven taem long wota olsem we profet i talem, nao sik ya blong hem i finis olgeta, bodi blong hem i kam gud bakegen, mo ol skin blong hem i kam klin olsem skin blong smol bebi.

15 Nao hem wetem ol man blong hem oli gobak long profet ya, nao hem i go stanap long fes blong hem, i talem long hem se, "Profet. Naoia mi mi savegud we i no gat narafala god we i tru. God ya blong yufala ol laen* blong Isrel, hem nomo i God. Plis, mi wantem yu yu tekem smol presen ya blong mi."

16 Be profet i talem se, "Hae God i laef, i stap we i stap, mo mi mi man blong wok blong hem. Mo long fes blong hem, mi mi talem tru long yu, se yu no save pem samting ya long mi. Mi mi no save tekem wan presen nating long yu."

Nao Neman i strong long hem blong i tekem, be hem i no wantem. 17 Nao Neman i talem se, "Ale, sipos yu no save tekem presen ya blong mi, be plis yu letem mi mi fulumap sam graon blong ples ya long bag we i naf blong tu bigfala dongki ya blong mi i karem, blong mi tekem i gohom. I stat naoia, bambae mi mi no moa save mekem sakrefaes samtaem long ol narafala god, bambae mi stap mekem ol sakrefaes long Hae God nomo, stret olsem we hem i wantem. 18 Be i gat wan fasin we mi wantem blong Hae God bambae i stap fogivim mi from. King blong mifala i olfala, mo sipos hem i wantem go mekem wosip long god blong hem we nem blong hem Rimon, bambae mi mi mas givhan long hem blong i wokbaot. Nao sipos mi bodaon wetem king ya insaed long haos blong narafala god ya, mi wantem se Hae God bambae i fogivim mi, i tekemaot ol sin blong mi."

19 Nao profet i talem long hem se, "Yu no wari, yu go, we tingting blong yu i stap gud." Nao hem i aot i go.

Be taem hem i no go longwe yet, 20 Gehasi, man blong wok blong profet ya i stap tingting hem wan se, "Sipos profet i tekem ol samting ya we man ya i wantem givim long hem, bambae i moa gud. !Be hem i girap, i letem man ya i karem ol gudfala samting ya blong hem i gobak, we i no pem hem nating! Mi mas resis biaen long hem blong karem sam samting long hem.* mi mas resis biaen long man ya blong karem sam samting long hem." 21 Nao hem i resis biaen long hem.

Nao taem Neman i luk we wan man i stap resis biaen long hem, hem i jamdaon long kat blong hem, i kam mitim hem. Mo hem i askem long hem se, "?Olsem wanem?"

22 Mo Gehasi i talem se, "No, i oraet nomo, be masta blong mi i sanem mi blong talem long yu se naoia nomo, tu memba blong wan kampani blong ol profet i jes kamtru. Tufala i aot long haf blong distrik ya Efrem* we i ples blong hil, mo hem i wantem blong yu givim toti fo kilo silva, mo tu flas klos long tufala."

23 Be Neman i talem se, "No, yu tekem sikisti eit kilo silva." Nao hem i talem long ol man blong hem blong oli fulumap tu bag long ol silva ya we praes blong hem tri milian vatu, mo oli tekem tu flas klos wetem, nao i sanem tu man blong wok blong hem blong karem ol samting ya i go fastaem, Gehasi i kam biaen.

24 Nao taem oli kasem hil ya we haos blong profet i stap long hem, Gehasi i karemaot ol samting ya, mo i sanem tufala ya i gobak. Nao hem i karem ol samting ya i go antap, i putum insaed long rum blong hem, 25 mo i go insaed long rum blong profet bakegen. Nao profet i askem long hem se, "?Yu kam wea?"

Be hem i talem se, "No, mi mi no go sam ples."

26 Nao profet i talem se, "?Olsem wanem? ?Taem we man ya i jamdaon long kat blong hem blong kam mitim yu, yu ting se mi mi no save samting ya? Hemia i no taem blong kasem mane, mo klos, mo plantesen blong olif, mo plantesen blong grep,* mo sipsip, mo buluk, mo slef.* 27 Naoia bambae sik blong Neman i kasem yu wetem ol famle blong yu. Mo bambae sik ya i stap long yufala gogo i no save finis."

Nao taem hem i aot long profet, wantaem nomo sik ya i kasem hem, mo skin blong hem i kam waet we i waet.