1 Nao biaen long taem ya we King Ehab blong Isrel* i ded finis, ol man Moab oli wantem aot long han blong ol man Isrel, mo oli girap, oli no moa obei long olgeta.

2 Nao long taem ya, King Ahasia blong Isrel i stap long wan vranda antap long haos blong hem long Sameria,* nao i foldaon, i karekil. Nao hem i sanem sam man blong hem oli go blong faenemaot long Balsebub, we i god blong ol man blong taon ya Ekron long Filistia, se bambae hem i save kam oraet no nogat. 3 Be wan enjel blong Hae God i talem long Profet Elaeja, we i man Tisbe, blong i go mitim ol man ya blong king long rod, i talem long olgeta se, "?!Olgeta! !Balsebub i god blong ol man Ekron! ?From wanem yufala i wantem go faenemaot sam samting long hem? ?Yufala i ting se i no gat God long Isrel? 4 Yufala i go talemaot long king ya we Hae God i talem se, ‘From we yu yu mekem olsem, bambae yu no save kam oraet bakegen. Bambae yu ded.’ "

Nao profet i aot, i go mekem olsem we Hae God i talem long hem, 5 mo ol man ya oli tanemraon, oli gobak long king. Nao hem i askem long olgeta se, "!Ei! ?From wanem yufala i kambak bakegen?"

6 Mo oli talem long hem se, "No, mifala i mitim wan man long rod, mo hem i talem long mifala, se mifala i mas kambak blong talemaot long yu wan tok we Hae God i talem. Hae God i talem se, ‘Balsebub ya, hem i god blong ol man Ekron. ?From wanem yu sanem ol man ya blong yu oli go blong faenemaot sam samting long hem? ?Yu ting se i no gat God long Isrel? From we yu yu mekem olsem, bambae yu no save kam oraet bakegen. Bambae yu ded.’ "

7 Nao king i askem se, "?Man ya i olsem wanem?"

8 ✝Mo oli talem se, "Hem i werem wan kot we oli wokem long hea blong kamel, mo i fasem hem long wan strap we oli wokem long skin blong buluk."

Nao king i talem se, "!A! !Elaeja ya, man Tisbe!"

9 Nao hem i sanem wan kapten wetem fifti soldia blong hem, blong oli go tekem profet ya i kam. Mo taem oli go, oli faenem hem antap long wan hil, i stap sidaon. Nao kapten ya i jikim hem, i talem se, "!Ei, yu man blong God! !Yu kam! King i talem se yu mas kamdaon blong go luk hem."

10 ✝Be profet i talem se, "!Yu yu jikim mi, be mi mi man blong God tru! Naoia, faea bambae i aot long heven, i kamdaon, i bonem yu wetem ol man ya blong yu, yufala evriwan i ded." Nao wantaem nomo, faea i kamdaon, i bonem kapten ya wetem ol man blong hem oli ded evriwan.

11 Nao king i sanem wan narafala kapten wetem fifti soldia blong hem oli go luk hem, mo kapten ya tu i jikim hem, i talem se, "!Ei, man blong God! !Yu hareap! King i talem se yu mas kamdaon naoia blong go luk hem."

12 Be hem i talem bakegen se, "Yu yu jikim mi, be mi mi man blong God tru! Naoia, faea bambae i aot long heven i kamdaon, i bonem yu wetem ol man blong yu, yufala evriwan i ded!" Nao wantaem nomo, God i sanem faea i aot long heven, i kamdaon, i bonem kapten ya wetem ol man blong hem oli ded evriwan.

13 Be king i sanem wan narafala kapten bakegen wetem fifti soldia blong hem oli go blong tekem profet ya i kam. Nao kapten ya i go antap long hil, i nildaon long fes blong profet ya, i krae long hem se, "Man blong God. Plis yu sore long mi wetem ol man ya blong mi. !Yu no spolem mifala! 14 Tufala kapten ya wetem ol man blong tufala we oli kam fastaem oli ded long faea ya we i aot long heven i kamdaon, be mi, plis yu sore long mi."

15 Nao enjel ya blong Hae God i kam talem long profet se, "Yu no fraet. Yu godaon wetem hem."

Nao hem i girap, i godaon wetem hem, i go luk king. 16 Nao hem i talem long king se, "Tok we Hae God i talem i olsem. Hem i talem se, ‘Balsebub i god blong ol man Ekron, be yu yu sanem ol man blong yu oli go blong faenemaot long hem, se bambae yu oraet, no olsem wanem. Yu yu mekem olsem we i no gat God long Isrel. From samting ya, bambae yu no save kam oraet bakegen. Bambae yu ded.’ "

17 Nao king ya i ded olsem we Hae God i talem long profet ya blong i talemaot. King Ahasia ya, hem i no gat pikinini, nao brata blong hem Joram i tekem ples blong hem i kam king. Long taem ya we King Jehoram, we papa blong hem King Jehosafat i rul long Juda,* long namba tu yia blong hem, Joram ya i kam king blong Isrel.

18 Ol narafala samting we King Ahasia i mekem ol man oli raetemdaon long buk ya we nem blong hem Ol Stori blong Laef blong ol King blong Isrel.