1 Nao long taem ya we King Ahas i king long Juda,* long namba twelef yia blong hem, Hosea, we papa blong hem Elaha, hem i kam king blong Isrel.* Hem i rul naen yia long kantri ya, mo hedkwota blong hem i stap long taon ya Sameria.* 2 Hem tu i stap mekem sin agens long Hae God, be i no tumas, olsem we ol king blong Isrel we oli rul fastaem long hem oli stap mekem. 3 Nao long taem ya we hem i stap rul, King Salmanesa blong Asiria i kam mekem faet long hem, mo hem i letem hem i go nomo long han blong king ya, mo evri yia, i stap pem takis i go long hem. 4 Be wan taem, hem i sanem sam man oli go luk King So blong Ijip, blong singaot hem blong i kam givhan long hem, mo i no moa pem takis ya i go long king blong Asiria. Be taem king i save samting ya, hem i sanem ol man blong hem oli kam holem King Hosea, oli putum hem long kalabus.

5 Nao biaen long taem ya, King Salmanesa blong Asiria wetem ol soldia blong hem oli kam long Isrel,* mo oli kam hivap raon long taon ya Sameria,* oli blokem ol man oli stap insaed. Nao long namba tri yia we olgeta oli stap blokem taon ya, 6 we i namba naen yia blong King Hosea blong Isrel, king ya i winim taon ya, mo i karemaot ol man Isrel oli go wok slef* long kantri blong hem. Hem i putum sam long olgeta oli stap long taon ya Halaha, mo i putum sam oli stap long distrik ya Gosan, klosap long Haboro Reva, mo i putum sam oli stap long ol taon long Media.

7,8 Ol samting ya i kamtru olsem, from we ol man ya oli stap mekem sin agens long Hae God. Hem i God blong olgeta, we i sevem olgeta, be olgeta oli no tinghevi long hem. Hem i tekemaot ol bubu blong olgeta bifo long han blong king blong Ijip, mo i lidim olgeta oli aot long Ijip oli kam. Olgeta oli man blong hem, mo taem hem i tekem olgeta oli kam long ples ya, hem i ronemaot ol hiten man long ples ya, long fes blong olgeta. Be olgeta oli stap mekem wosip long ol narafala god, mo oli stap holem ol kastom blong ol hiten man ya, mo oli stap folem ol niufala fasin we ol king blong olgeta oli stap tijim olgeta long hem. 9 Oltaem oli stap mekem ol samting we Hae God i no glad nating long hem. Oli stap wokem ol ples blong mekem wosip long ol narafala god ya olbaot long ol ples blong olgeta, i stat long ol smosmol vilej, i go kasem ol bigbigfala taon. 10 ✝Mo antap long ol hil, mo aninit long ol bigbigfala tri, oli stanemap ol longlongfala ston, mo ol pija blong woman god ya Asera* blong mekem wosip long olgeta. 11 Mo olgeta oli stap bonem insens* long ol olta long ol ples ya blong mekem wosip long ol god ya, mo oli stap folem ol fasin blong ol hiten man ya we Hae God i bin ronemaot olgeta. Oltaem oli stap mekem ol rabis fasin we i mekem hem i kros tumas, 12 mo oli stap brekem tok ya blong hem we i talem se, "Bambae yufala i no mekem wosip long ol narafala god."

13 Hae God i stap sanem ol profet blong hem oli kam talemaot tok blong hem long ol man Isrel mo ol man Juda,* we hem i talem se, "Yufala i mas lego ol rabis fasin ya blong yufala. Yufala i mas obei long tok ya blong mi we i stap finis long buk ya blong Loa blong mi we mi givim long ol bubu blong yufala bifo, mo we mi stap talem bakegen long ol profet ya we oli man blong wok blong mi, blong oli kam talemaot long yufala." 14 Be olgeta oli no wantem obei long Hae God. Hem i God blong olgeta, be oli stronghed tumas olsem ol bubu blong olgeta bifo we oli no trastem hem. 15 Olgeta oli no wantem lesin long ol tok ya we hem i stap tijim olgeta long hem, mo oli no holem promes* ya we hem i bin mekem wetem ol bubu blong olgeta bifo. Oltaem oli stap tingting nating long ol tok blong hem we i blong wekemap olgeta, mo oli stap mekem wosip long ol god ya we oli rabis nomo, nao fasin ya i mekem olgeta tu oli kam rabis. Nating we Hae God i bin talem se oli no mas folem fasin blong ol narafala man ya we oli stap raonabaot long olgeta, be olgeta oli no wantem folem tok ya blong hem. 16 ✝Hae God i God blong olgeta, be oli girap oli brekem olgeta loa blong hem. Olgeta oli wokem tu bul long gol, mo oltaem oli stap mekem wosip long tufala. Mo bakegen, oli wokem wan aedol blong woman god ya Asera, mo oli stap mekem wosip long ol sta, mo oli stap biaen long god ya Bal.* 17 ✝Olgeta ya oli stap kilim ol pikinini blong olgeta, mo oli stap bonem olgeta blong mekem sakrefaes long ol hiten god. Mo oli stap go luk ol kleva mo ol man we oli stap toktok wetem ol devel blong faenemaot ol samting we bambae i kamtru. Oltaem oli stap putum tingting blong olgeta i stap long ol fasin we oli nogud olgeta long fes blong Hae God, nao oli mekem hem i kros we i kros. 18 Ol man Isrel ya long not oli mekem hem i kros tumas long olgeta, mo hem i ronemaot olgeta i gowe long fes blong hem, olgeta ya nomo long Juda oli stap. 19 Be olgeta ya tu long Juda oli no obei gud long ol loa blong hem. Hem i God blong olgeta, be oli no obei long hem, oli stap folem ol niufala fasin we ol man Isrel ya oli statem.

20 Nao from samting ya, Hae God i tanem baksaed long olgeta ya evriwan we oli laen* blong Isrel. Hem i stap panisim olgeta, we i stap letem olgeta oli go long han blong ol enemi blong olgeta, gogo i ronemaot olgeta i gowe long fes blong hem.

21 Bifo, long taem ya we Hae God i seraot ol man ya blong hem oli go long tu haf, ol man Isrel long not oli putumap Jeroboam, we papa blong hem Nebat i kam king blong olgeta. Mo king ya i lidim olgeta oli gowe long Hae God, mo oltaem, hem i stap lidim olgeta blong oli mekem ol samting we i nogud we i nogud. 22 Olgeta oli stap folem king ya, mo oltaem oli stap mekem olgeta samting nogud we hem i stap mekem, 23 gogo Hae God i ronemaot olgeta i gowe long fes blong hem, olsem we hem i bin talemaot bifo olgeta, se bambae i mekem. Oltaem, hem i stap tok blong wekemap olgeta long tok blong ol profet blong hem, be oli no harem hem, nao ol man Asiria oli kam karemaot olgeta oli go wok slef long kantri blong olgeta, mo oli stap long ples ya kam kasem tede.

24 Nao king blong Asiria i tekem ol man blong ol taon blong ol narafala kantri oli kam stap long Isrel,* blong tekem ples blong ol man Isrel ya we oli go wok slef* long Asiria. Long olgeta ya, i gat ol man Babilon, mo ol man Kut, mo ol man Iva, mo ol man Hamat, mo ol man Sefavaem. Olgeta ya oli kam tekem ol taon blong kantri ya Sameria* oli holem i blong olgeta, mo oli stap olwe long kantri ya. 25 Nao taem we oli jes kam long ples ya, oli no mekem wosip long Hae God, mo hem i sanem ol laeon oli kam kilim sam long olgeta oli ded. 26 Nao oli sanem tok i go long king blong Asiria se, "King. Yu yu putum mifala long ol taon ya blong Sameria,* be mifala i no save ol loa blong god blong ples ya, mo from samting ya, god ya i stap sanem ol laeon oli kam kilim mifala."

27 Nao king i talem long ol man blong hem se, "Yufala i tekem wan long ol pris* ya we yumi tekem olgeta i kam wok slef long ples ya, yufala i sanem hem i gobak blong stap wetem olgeta long Sameria, blong tijim olgeta long ol loa blong god blong kantri ya." 28 Nao wan long ol pris ya we oli bin karemaot long Sameria, hem i kambak bakegen, mo i go stap long Betel, i stap tijim olgeta ya long rod blong mekem wosip long Hae God.

29 Be ol man ya blong ol narafala kantri we oli stap olbaot long Sameria oli stap gohed yet blong wokem ol aedol blong ol god blong olgeta, mo oli stap stanemap olbaot long ol hil, long ol ples blong mekem wosip we ol man Isrel oli bin wokem. Ol naranarafala grup blong olgeta oli stap wokem ol aedol blong ol god blong olgeta, nao oli stap stanemap long ol taon we oli stap long hem. 30 Ol man Babilon oli stap wokem ol aedol blong god ya Sukotbenot, mo ol man Kut oli stap wokem ol aedol blong god ya Negal. Ol man Hamat oli stap wokem ol aedol blong god ya Asima, 31 mo ol man Iva oli stap wokem ol aedol blong tufala god ya Nibas mo Tatak. Ol man Sefavaem oli stap kilim ol pikinini blong olgeta, oli stap bonem olgeta blong mekem sakrefaes long tufala god blong olgeta, Adramelek mo Anamelek. 32 Olgeta man ya oli stap mekem wosip long Hae God, be oli jusumaot ol man olbaot nomo, we oli man ples blong olgeta, oli putumap olgeta oli kam pris. Nao ol pris ya oli stap long ol ples blong mekem wosip long ol narafala god, mo oli stap mekem sakrefaes long ol god ya. 33 Ol man ya oli stap mekem wosip long Hae God, be oli stap biaen long ol god blong olgeta tu, stret long kastom blong olgeta long ol ples we oli kamaot long hem fastaem.

34 ✝Olgeta ya oli stap gohed yet long ol olfala kastom ya blong olgeta, i kam kasem tede. Oli stap mekem wosip long Hae God, be oli no mekem long prapa fasin blong hem, mo oli no obei long ol loa mo ol tok blong hem, we hem i bin givim long ol laen* blong olfala Jekob* ya bifo, we hem i putum niufala nem blong hem se Isrel. 35 ✝Hae God i bin mekem promes* wetem ol laen blong Isrel, mo hem i bin talem long olgeta se, "Bambae yufala i no mekem wosip long ol narafala god. Bambae yufala i no bodaon long olgeta, yufala i no biaen long olgeta, mo yufala i no mekem sakrefaes long olgeta. 36 ✝Mi nomo mi Hae God. Mi nao mi tekem yufala i kamaot long Ijip long bigfala paoa blong mi. Bambae yufala i mas mekem wosip long mi nomo, yufala i mas bodaon long mi, mo yufala i mas mekem sakrefaes long mi. 37 Oltaem nomo, bambae yufala i mas obei long ol loa mo ol tok we mi mi raetemdaon blong yufala. Yufala i no mas mekem wosip long ol narafala god, 38 mo yufala i no mas fogetem promes ya we mi mi mekem wetem yufala. 39 Mi mi Hae God. Mi nomo mi God blong yufala. Yufala i mas obei long mi, mo sipos yufala i mekem olsem, mi bambae mi tekemaot yufala long han blong ol enemi blong yufala, mi sevem yufala." 40 Be ol man ya blong ol narafala kantri we oli jes kam stap long Sameria oli no wantem lesin long ol tok ya, oli stap gohed blong folem ol olfala kastom blong olgeta. 41 Nao oli stap mekem wosip long Hae God, mo oli stap biaen long ol narafala god blong olgeta tu, mo i kam kasem tede, olgeta we oli stap kamaot biaen long olgeta oli stap gohed yet blong mekem sem samting.