1 Nao long taem ya we Manase i kam king blong Juda,* hem i gat twelef yia nomo. Hem i rul fifti faef yia long kantri ya, mo hedkwota blong hem i stap long taon ya Jerusalem.* Mama blong hem, nem blong hem Hefsiba. 2 ✝King ya i stap mekem sin agens long Hae God, i stap folem ol rabis fasin blong ol hiten man ya bifo we Hae God i bin ronemaot olgeta i gowe long kantri ya, taem i tekem ol man blong hem oli kam stap long hem. 3 Hem i girap, i go wokem bakegen ol ples ya blong mekem wosip long ol narafala god, we papa blong hem King Hesekia i bin spolem. Hem i wokem ol olta blong mekem wosip long Bal,* mo i wokem wan aedol blong woman god ya Asera,* olsem we King Ehab blong Isrel* bifo i bin mekem, mo i stap mekem wosip long ol sta tu. 4,5 ✝Hem i wokem ol olta long tufala yad blong haos* blong Hae God, mo i stap yusum olgeta blong mekem wosip long ol sta. Be bifo, Hae God i bin talem se, "Haos blong mi long Jerusalem, hem i ples blong mekem wosip long mi nomo." 6 Hem i kilim pikinini blong hem, mo i bonem blong mekem sakrefaes long ol god ya. Mo oltaem, hem i stap wokem ol fasin blong faenemaot ol samting we bambae i kamtru long fiuja, mo i stap wokem posen, mo i stap go luk ol kleva mo ol man we oli save toktok wetem ol devel. Hem i stap mekem plante samting we i nogud long fes blong Hae God, nao i mekem Hae God i kros tumas.

7 ✝Mo hem i putum aedol blong woman god ya Asera long haos blong Hae God. Be Hae God i bin talem finis long King Deved ya bifo, mo long pikinini blong hem King Solomon se, "Yufala ol twelef laen* blong Isrel, yufala i man blong mi. Long olgeta ples blong yufala mi mi jusumaot taon ya Jerusalem blong yufala i putum haos blong mi long hem, mo haos ya i ples blong mekem wosip long mi nomo. Oltaem yufala i mas kam long hem blong mekem wosip long mi. 8 Mo sipos yufala i stap obei long olgeta tok blong mi, mo yufala i stap holem olgeta loa ya we Moses, man blong wok blong mi i bin givim long ol bubu blong yufala bifo, bambae mi mi no save letem ol narafala man oli ronemaot yufala i gowe long kantri ya we mi givim long ol bubu ya blong yufala." 9 Be ol man Juda oli no obei long ol tok ya, mo king ya i stap lidim olgeta blong oli mekem ol fasin we i nogud moa, i winim ol rabis fasin blong ol hiten man ya bifo, we Hae God i bin kilim olgeta long taem ya we hem i tekem ol bubu blong olgeta oli kam stap long kantri ya.

10 Nao Hae God i givim tok blong hem long ol profet we oli man blong wok blong hem 11,12 blong oli go talemaot se, "!Ol man Jerusalem wetem ol narafala man Juda! Mi mi Hae God, mi God blong yufala ol laen blong Isrel, mo tok blong mi i olsem. King Manase ya i stap mekem ol samting we i nogud we i nogud. Fasin blong hem i nogud moa, i winim fasin blong ol man Kenan* bifo. Hem i stap yusum ol aedol blong hem blong pulum yufala blong yufala i mekem sin. Mo mi talem long yufala, se from ol samting ya, bambae mi mi letem wan trabol we i nogud we i nogud i kam long yufala long Jerusalem mo long ol narafala ples long Juda. Taem ol man raonabaot oli harem nius blong hem, bambae oli sapraes tumas from. 13 Bambae mi panisim yufala, olsem we mi panisim ol man Sameria,* wetem King Ehab we i king blong olgeta, mo olgeta we oli kamaot biaen long hem. Bambae mi waepemaot yufala evriwan, mi mekem ples ya i klin gud, olsem we man i wasem plet i waepem i klin gud, blong i putumgud i stap. 14 Long taem ya, bambae mi tanem baksaed long ol man blong mi we oli stap laef yet, mi letem olgeta i go long han blong ol enemi blong olgeta. Ol enemi ya bambae oli winim olgeta, mo bambae oli karemaot olting blong olgeta, oli holem i blong olgeta, nao oli gobak long ples blong olgeta. 15 Yufala i man blong mi, be bambae mi mekem olsem long yufala, from we yufala i stap mekem sin agens long mi, mo yufala i stap mekem mi mi kros, i stat long taem ya we ol bubu blong yufala oli kamaot long Ijip bifo, i kam kasem tede."

16 King Manase ya i stap pulum ol man Juda blong oli mekem wosip long ol narafala god, mo blong oli mekem sin agens long Hae God, mo antap long ol samting ya, hem i stap kilim plante man tumas oli ded, we oli no mekem samting we i rong. Nao oltaem, taon ya Jerusalem i stap fulap long blad blong olgeta.

17 Ol narafala samting we hem i mekem, wetem ol samting nogud we hem i mekem, ol man oli raetemdaon long buk ya we nem blong hem Ol Stori blong Laef blong ol King blong Juda. 18 Mo taem hem i ded, oli berem* hem long hol long ston long ples ya we ol tri oli stap gru long hem klosap long haos blong hem, we nem blong ples ya, "Gudfala Ples blong Usaha", nao pikinini blong hem Amon i tekem ples blong hem, i kam king.

19 Nao long taem ya we Amon i kam king blong Juda,* hem i gat twanti tu yia blong hem. Hem i rul tu yia nomo long kantri ya, mo hedkwota blong hem i stap long taon ya Jerusalem.* Mama blong hem, Mesulemet we i dota blong Haruj blong taon ya Jotbaha. 20 King ya tu i stap mekem sin agens long Hae God, olsem we papa blong hem King Manase i mekem. 21 Hem i stap folem fasin blong papa blong hem, mo i stap mekem wosip long ol aedol ya we papa blong hem i stap mekem wosip long olgeta fastaem. 22 Nating we Hae God i God blong ol bubu blong hem, be hem i tanem baksaed long hem, mo i no save obei long ol tok blong hem.

23-26 Ol narafala samting we hem i mekem, ol man oli raetemdaon long buk ya we nem blong hem Ol Stori blong Laef blong ol King blong Juda.

Nao ol haeman blong hem oli girap, oli mekem plan agens long hem, mo oli kilim hem i ded insaed long haos blong hem. Be ol man blong hem oli go karem hem, oli berem* hem long hol long ston long ples ya we ol tri oli stap gru long hem, we nem blong ples ya, "Gudfala Ples blong Usaha". Nao ol man Juda oli go kilim ol haeman ya oli ded, mo oli putumap Josaea, pikinini blong hem i tekem ples blong hem i kam king.